胡杏兒囝囝滿月啦！西裝靚仔造型超搶鏡
廣告
胡杏兒啱啱先慶祝完38歲生日，屋企又再有喜事啦！原來自上月10月10日囝囝Brendan出世，今日足足一個月啦！杏兒今早就分享咗一張Brendan嘅黑超靚仔造型相！一齊嚟睇吓！
撰文：Sunday Kiss
相片：胡杏兒Facebook
西裝靚仔造型搶鏡
Brendan今日滿月啦！杏兒分享咗囝囝著住灰白直條西裝配「煲呔」嘅可愛相，雖然遮住Brendan雙眼，但一樣睇得出B囝白白滑滑好可愛！杏兒留言話：「滿月當然要著返套老西賀一賀佢！」
爸爸Philip都有留言話希望囝囝可以好似佢套衫咁紳士，好似佢副太陽眼鏡咁有型，仲要好似頂西方帽一樣咁醒目！唔知Brendan仔又收唔收到呢？
之前爸爸Philip仲大方分享Brendan仔嘅「美腿」俾大家欣賞，網友紛紛都話「好肥美」、「好想咬一口」！
杏兒一家都有大肆慶祝Brendan滿月，阿Phil分享照片話佢哋一家人好盡興咁慶祝Brendan嘅滿月，仲話希望囝囝做一個健健康康、快快樂樂嘅好男仔！見佢哋開晒香檳咁，好似爸爸仲開心過Brendan仔喎！
早前杏兒生日，胡說八道會成員一早為佢準備咗睡衣生日派對慶祝，5個契媽仲爭住抱Brendan，萬千寵愛呀！
