賴慰玲︰一定要試順產 痛足50小時也不怕

賴慰玲︰一定要試順產 痛足50小時也不怕

TVB劇集《女人俱樂部》一班「M Club」少女陸續成為人妻,陳嘉寶(Anjaylia)將於11月25日結婚,賴慰玲(Winki)更走前一步成為媽媽,預產期12月初,與好姊妹Anjaylia雙喜臨門!在TVB正在上位階段的Winki,因懷孕暫時停工,對她來說,建立家庭才是第一位,她有感自己已準備好做媽咪,當時並已認定舞台劇演員男友梁子峰,兩人便積極造人,很快傳來好消息!

對於很多人質疑她,為何不先結婚才陀仔,她處之泰然道,只要雙方是認真,次序並不重要,時機是否適合才是最重要。距離預產期愈接近,Winki的心情愈興奮,準備以順產迎接BB,她揚言人一世物一世,就算痛足50小時也不怕,「人生有幾十個鐘經歷呢樣咁震撼嘅事,都好值得紀念呀,痛咪痛囉,最緊要健健康康!」

撰文︰Ling
攝影︰Jacy Yip(部分相片由受訪者提供)
髮型︰Green [email protected] Salon
服裝︰JT’s Fashion
場地︰Le Secret by MioXpace (Tel: 9711 9533)

賴慰玲感恩整個孕期沒有特別不適,亦沒有爆妊娠紋,比較困擾只是晚上尿頻難以再入睡,要靠午睡補眠。
賴慰玲感恩整個孕期沒有特別不適,亦沒有爆妊娠紋,比較困擾只是晚上尿頻難以再入睡,要靠午睡補眠。

鄭嘉穎幫賴慰玲BB改名

Winki在演藝學院畢業後加入TVB,首部劇集就是《女人俱樂部》飾演張慧儀的少女版,演出備受好評,之後得到不少演出機會,在《殭》一劇飾演丘玲梅佔戲甚重,更與同劇的鄭嘉穎和陳凱琳(Grace)成為好友,現榮升BB的契爺契媽,Winki決定將BB的英文名交託契爺契媽去改。「佢哋算係最早知嘅朋友,嘉穎一知道就即刻提出幫BB改英文名,咁我咪交畀佢改。我唯一條件係M字頭,因為我啱啱有咗嗰陣,屋企隻貓仔死咗,佢叫Miranda,所以我想紀念佢。嘉穎已經畀咗一啲選擇我,都有啲心水。」

BB的契爺鄭嘉穎到場賀Winki結婚,還自薦為BB改英文名。
BB的契爺鄭嘉穎到場賀Winki結婚,還自薦為BB改英文名。

至於BB性別方面,Winki想對外保持一點神秘感,「想留番少少空間幻想吓,其實生仔生女都咁開心,到佢出世大家就會知㗎喇!」

Winki在懷孕期間,常與好友陳凱琳(右)和陳嘉寶(左)見面。
Winki在懷孕期間,常與好友陳凱琳(右)和陳嘉寶(左)見面。

18歲起許願︰想快啲做媽媽

現年31歲的Winki一直希望盡快組織家庭,她自18歲起年年許下同一生日願望︰「我要快啲做人阿媽,快啲生BB!」Winki笑指所有朋友都知道她恨做媽咪,所以對她未婚懷孕也不感驚訝,紛紛送上祝福。她有感今年是合適時候,與男友亦感情穩定,早已認定對方,便展開造人大計。

《女人俱樂部》一班「M Club」少女在現實中也成為好姊妹。
《女人俱樂部》一班「M Club」少女在現實中也成為好姊妹。
Winki與「M Club」姊妹和何雁詩早前舉行派對,一次過慶祝Baby Shower、陳嘉寶的Bridal Shower以及糖妹、陳瀅和何雁詩的生日。
Winki與「M Club」姊妹和何雁詩早前舉行派對,一次過慶祝Baby Shower、陳嘉寶的Bridal Shower以及糖妹、陳瀅和何雁詩的生日。

大肚結婚因為好得閒

Winki覺得在這個年代,只要雙方的感情認真,結婚生仔的次序並不重要,所以選擇先陀B後結婚,直至懷孕七個月才補辦簡單婚禮。很多未婚懷孕的準媽咪為了靚靚,大多選擇懷孕初期急急結婚,或待孩子出生後才修身補辦,Winki卻挺著七個月大肚舉行婚禮,「因為我太得閒喇!初頭仲有拍劇,拍到大肚五個月,之後好得閒冇咩做,就搞結婚啦,我哋都唔會鋪張,所有嘢又好ready,咁不如搞結婚。」在簡單而隆重的婚禮上,「M Club」一班姊妹、鄭嘉穎、陳凱琳和蔡思貝等好友都有到場見證,眾人喜極而泣。

Winki陀著七個月大肚和舞台劇演員丈夫梁子峰簽紙結婚。
Winki陀著七個月大肚和舞台劇演員丈夫梁子峰簽紙結婚。

生日第一次感到胎動

第一次胎動在Winki七月生日之時,一起床就收到BB的祝福。「我一起身,突然感覺到BB郁,即刻叫老公過嚟摸,BB真係郁,我就開始喊,好Amazing好開心!」

Winki在生日當天第一次感到BB胎動,絕對是她最開心的生日禮物。
Winki在生日當天第一次感到BB胎動,絕對是她最開心的生日禮物。

Winki笑稱,自懷孕後變得易喊,去產檢都喊一餐,更感染了身邊的朋友,好像第一次有朋友懷孕的陳瀅。「我大肚後佢第一次見到我,佢係咁話好得意,不斷督我個肚。最近喺Anjay個Bridal Shower,我哋又見到面,我BB郁嗰陣叫佢擺隻手埋嚟,佢嚇咗一跳!雖然我哋未見到BB,但佢喺入面有一種生命力,無論自己定身邊嘅人都感到Amazing!」好姊妹Anjaylia即將結婚,有否叫她早生貴子?Winki笑言要教育一下。「佢應該冇咁快,但話唔埋㗎,我有叫佢快啲生,等我BB有個伴。」

「M Club」中以Winki最快做媽咪,一班好姊妹都非常興奮。
「M Club」中以Winki最快做媽咪,一班好姊妹都非常興奮。

難頂花味洗衣粉味

Winki的身形一向纖瘦,食極都唔肥,得天獨厚令人羨慕。懷孕後她雖然食量變大,但一樣肥肚不肥人,至今重了20多磅。頭三個月她經常作嘔作悶,幸好孕吐情況不算嚴重,但一嗅到某些味道便立即作嘔,直至現在。「花味、酒味、洗衣粉呢啲濃味,我一聞到就好辛苦,連Hand cream啲味太濃我都唔得,我要不斷換洗衣粉、洗衣液,試到個味啱為止,依家屋企有五六支洗衣液,到我味覺無咁敏感先用番。」

食物的味道對她沒有大影響,最難頂是花味,將屋企原有的花統統搬出露台,而朋友約她食飯也不能喝酒了!懷孕至今陀得輕鬆,讚揚BB好生性。「係瞓覺轉身辛苦啲,但平時出街都冇乜嘢,我見有啲媽媽會恥骨痛好辛苦,我就冇乜特別痛楚。」

自懷孕後Winki的口味無變,但食量變大,她指在家飲食均衡,但出街會放肆一點,沒有特別戒口,只戒生冷凍飲,「想食我都會試少少,唔使戒得好清,我好怕壓力大。」
自懷孕後Winki的口味無變,但食量變大,她指在家飲食均衡,但出街會放肆一點,沒有特別戒口,只戒生冷凍飲,「想食我都會試少少,唔使戒得好清,我好怕壓力大。」

血問題無大礙 會私院順產

對於有報道指,她的血指數出現問題,導致私家醫院拒收,她澄清只要小事一樁,絕無影響胎兒,私院公院都收症。「我只係血入面有啲元素無咁穩定,有啲指數比較低,要check清楚啲,已經check咗無咩影響,我喺私家同公立都開咗file,兩邊都有觀察。」

Winki現已停工專心養胎,閒時閱讀育兒資訊及下廚,早前中秋節便炮製了自家月餅。
Winki現已停工專心養胎,閒時閱讀育兒資訊及下廚,早前中秋節便炮製了自家月餅。

Winki已決定在私院生BB,預產期12月初,準備順產,心情開始興奮起來。「終於覺得BB就快嚟喎,諗起就覺得好開心,我仲未識得驚呀。」距離BB出世只餘下短時間,Winki最近才開始為BB執屋,準備BB物品。人緣極佳的她,已收到很多朋友送贈禮物,根本不需要再添置新物品。「其實唔需要買太多嘢,唔使好華麗,BB最緊要有奶飲、有尿片換,其他嘢慢慢再執都唔遲,我都好多謝大家送咁多禮物。」

不怕順產︰痛咪痛囉

BB的靚衫、玩具並非重點,Winki比較著重BB的健康,故她必定嘗試順產及餵哺母乳。「我會偏向為BB選擇最好嘅嘢,順產同母乳都係好好,所以我好堅持要做呢兩件事。」Winki覺得順產對自己和BB都比較好,身體亦能較快復元,「人一世物一世,咩都試吓吖嘛!成日聽朋友講生仔好痛,有人仲試過痛咗50個鐘!係咪真㗎?我覺得人生流流長,有幾十個鐘經歷呢樣咁震撼嘅事,都好值得紀念呀!」Winki的性格爽朗,不怕嘗試,痛也不怕。「痛咪痛囉,只要所有嘢健健康康,我就好滿足。」

Winki在誕B後會繼續演戲,相信自己能平衡好工作與家庭,但她坦言做演員好被動,不會因為做了媽媽而局限自己的戲路。
Winki在誕B後會繼續演戲,相信自己能平衡好工作與家庭,但她坦言做演員好被動,不會因為做了媽媽而局限自己的戲路。

至於餵母乳則因人而異,若果自己奶水不足,Winki就不會強迫自己谷奶影響情緒。「我見到好多媽咪餵到好大壓力,我唔想自己係咁,到時睇吓BB同我啲母乳有幾夾先,但我一定會嘗試,會盡量堅持落去。」

最怕自己變怪獸家長

Winki為人樂觀、輕鬆,最怕壓力大影響情緒,尤其現在懷有小寶寶,更需要保持開朗心情,她希望BB將來都能懷著樂觀的性格,盡量在無壓力的環境下成長,但她知道這是一大挑戰。「我都怕自己變成怪獸家長,小朋友嘅壓力好多時來自家長,我想畀小朋友自由選擇,佢想做咩就做咩。不過我都知好難,細個你冇好好教佢,冇迫佢識1至10,但身邊同學個個都識晒,佢學業上唔夠人競爭,家長就開始怕輸蝕而催谷佢,我見過好多呢啲情況,家長都身不由己,當聽到老師話佢跟唔上,家長已經好緊張啦!」

加入TVB前她曾做過戲劇教育,明白戲劇對小朋友的發展有益處,建議家長可從講故事入手,自己也必定會為BB多講故事。
加入TVB前她曾做過戲劇教育,明白戲劇對小朋友的發展有益處,建議家長可從講故事入手,自己也必定會為BB多講故事。

所以Winki會盡做個輕鬆媽媽,不會為小孩規劃過多,「每個人成長都係自己經歷,獨自面對好多嘢,先成為我哋依家呢個人。小朋友成長都一樣,不論成功與失敗,佢都會有自己經歷,父母根本唔需要擔心太多。」

賴慰玲做人好簡單,能夠一直演戲已經好滿足,無論電視、電影或舞台劇,「無戲拍嘅時候就去湊BB,一樣咁開心,因為兩樣都係我鍾意嘅嘢,人生就係咁簡單咋嘛!」
賴慰玲做人好簡單,能夠一直演戲已經好滿足,無論電視、電影或舞台劇,「無戲拍嘅時候就去湊BB,一樣咁開心,因為兩樣都係我鍾意嘅嘢,人生就係咁簡單咋嘛!」

更多精選內容