抱兩歲大仔去街 周汶錡 沿路錫不停

抱兩歲大仔去街 周汶錡 沿路錫不停

要數圈中靚B,名模周汶錡(Kathy)的混血大仔Jacques一定榜上有名,擁有法國血統嘅Jacques眼大鼻又高,皮膚白裡透紅又靚又cute,係人都爭住想抱抱佢啦!何況係媽媽,難怪日前周汶錡抱住大仔行街,不時捉實Jacques隻手仔又索、又錫,好肉緊呀!

撰文:Sunday Kiss

圖片來源:新傳媒圖片庫、周汶錡Instagram

周汶錡 有子萬事足

周汶錡跟法籍老公Julien結婚5年,兩人婚後育有兩名「混血小王子」Jacques和Avner,幸福美滿。近日周汶錡出席公開活動時表示好想出埠過聖誕節,她和丈夫已計劃農歷新年到法國滑雪:「本來想唔帶細仔,但大仔當年六個月大就出埠,所以我都要公平啲,會帶埋細仔去法國,挑戰吓自己喺雪地上照顧兩個小朋友,依家乜都要公平。」

Kathy被問到對兩個兒子有冇偏心?她笑說對大仔偏心啲:「我個細仔係20號出世,我習慣每個月20號都會上載一張細仔嘅相喺社交網站,呢方面我對大仔做得好足,但細仔有時會skip咗。」

 

連奔波兩地工作的阿姨周麗淇都錫燶姨甥仔,之前Jacques生日舉行生日派對,Niki都返港出席!

 

嗲暈媽咪

日前周汶錡兩母子去咗銅鑼灣shopping,兩歲的Jacques出街全程由媽咪抱,兩隻肥嘟嘟手仔一隻搭住媽咪肩膊,另一隻就揸實媽咪隻手,十足樹熊一樣嗲到爆!

素顏便服牛仔褲,一袋二袋仲抱埋個仔,周汶錡湊仔出街同普通媽媽無異,當然,係左手戒指粒鑽石大咗幾卡。

 

 

雖然有媽咪抱住,但大仔好攰忍唔住放蚊!

錫仔錫唔停

囝囝依賴媽咪,媽媽又何嘗唔係錫仔錫到一個點呢?Kathy忍唔住捉實Jacques隻手仔又聞又錫唔捨得放手。

 

 

終於行到去泊車位見到司機,周汶錡至捨得放低Jacques畀佢喺地下行兩步。

細仔 有模特兒的天分

43歲Kathy生完兩個仔都無乜走樣,身材依舊咁纖瘦,令人羨慕。談到兒子有沒有做模特兒的天份,Kathy說:「細仔好有模特兒天分,用相機對住佢,佢會追住個鏡頭,唔眨眼,大仔就要我捉住佢影相,影一兩張就走,要同佢講數。」

 

可愛造型吸粉絲

周汶錡向來經常同大家分享兩位囝囝嘅得意靚相,鍾意扮靚的Kathy當然唔會錯過幫囝囝扮鬼扮馬嘅機會,之前她就分享了兩兒子的中秋和萬聖節造型,網友大讚可愛!

兩歲Jacques一手搭住弟弟Avner,好有大哥哥風範!

 

 

兩歲嘅Jacques扮吸血鬼夠可愛,細佬Avner就戴上長帽!

講到兩個囝囝性格有沒有不同,Kathy透露二人的確大不同,大仔好識氹人,而細仔好有自己個性,唔鍾意就會尖叫。問到細仔是否比較難湊?她就說:「知道佢個性格就得,都ok易湊!」相信Kathy這位靚媽咪也好很耐性,教導兩位小王子吧!

 

更多精選內容