喜歡大家庭 不設防造人 錢嘉樂湯盈盈喜迎第三胎

喜歡大家庭 不設防造人 錢嘉樂湯盈盈喜迎第三胎

錢嘉樂與湯盈盈結婚5年先後誕下兩女,大女凱晴(Alyssa)4歲,幼女凱琪(Kassidy)2歲,一家四口不時溫馨出巡,不過盈盈似乎未滿足,喜歡熱鬧大家庭的她已不設防想追多個,生仔固然好,繼續生女亦冇所謂。錢家喜迎第三胎,錢嘉樂除有心有力配合到底外,為感激盈盈辛苦湊女,早前以天價買入港島區半山豪宅單位獎勵太太,有樓又有B,難怪盈盈表示有第三胎就退出幕前做全職媽媽。

撰文:Sunday Kiss

圖片來源:新傳媒圖片庫、湯盈盈微博

湯盈盈錢嘉樂 隔兩年生一個

錢嘉樂與湯盈盈近年有女萬事足,2015年生完細女凱琪,盈盈去年產後復出拍處境劇《愛•回家之八時入席》,因為甩唔到演員戲癮,年初再接拍處境劇《愛•回家之開心速遞》,令計畫好的生仔計劃一再擱置。據知情者透露:「兩年前生細女時,盈盈已經40歲係高齡產婦,醫生都叫佢想再生就好好計劃,盡量喺兩年內完成第三胎,點知佢返無綫拍劇停唔到,雖然時間好穩定星期六日又唔使開工,但每日放工佢都仆返去照顧兩個女,其實都好辛苦。早前盈盈終於決定停落嚟準備生多個,仲同公司報定案話如果有咗就即刻請假,嘉樂唔想盈盈操勞同有壓力,直頭勸佢唔好撈,所以《開心速遞》好大機會喺盈盈幕前最後一套劇。」

盈盈樂樂於12年結婚,翌年誕下大女凱晴(Alyssa),幼女凱琪(Kassidy)亦於15年出世,大女樣子像嘉樂,幼女似盈盈,一家四口幸福滿瀉。

 

湊女親力親為

現年已42歲的盈盈,平時親力親為照顧兩個女,再陀B體能上絕對應付得到,不過生仔唔係話中就中,所以年中已開始調理好身體與作息時間,希望半年內會懷孕成功,所以日前好姊妹鍾麗淇生日開Party,盈盈未見出席。而錢嘉樂最近完成在台灣拍攝的古惑仔電影《黃金兄弟》,亦留港休息配合造人大計。

 

日前鍾麗淇生日大搞生日派對,佘詩曼、周家蔚、文頌嫻與梁靖琪都有現身,七姊妹中的盈盈因為要養好身體陀B而戒夜蒲冇出席。

送樓最實際

盈盈負責生B,錢嘉樂就負責搵奶粉錢,近年在電影圈甚為吃得開的他,中、港、台周圍飛拍電影,又與鄭伊健、陳小春等巡迴各地開古惑仔演唱會,對於盈盈勞心勞力照顧兩個女與頭家,錢嘉樂心存感激,仲用行動來證明,「畀獎金!數百萬當係碎銀!」的錢嘉樂早年以1,280萬買入北角寶馬山豐林閣一個七百幾呎的單位,最近又花過千萬入市,買了一個港島半山單位給愛妻盈盈當獎勵。知情者透露:「盈盈好神秘,只係話好開始老公送咗贈樓畀佢,唔肯講喺邊度,只係知位於港島區半山,價錢亦係天價,佢話地方大過依家住嗰度好多,買定都啱喇,因為生埋第三胎一家五口,仲有最少兩個工人,一屋咁多人真係要四、五間房先夠住。」錢嘉樂錫老婆就係人都知,口甜舌滑的他,識得送樓最實際,氹得盈盈心花怒放,願意放棄幕前事業做其湊仔婆。

自細女出世後,錢嘉樂旺上加旺,近年他馬不停蹄job接job,為不少電影做武指又舉行古惑佬世界巡迴,早前四位加埋超過200歲的古惑大叔又開拍電影《黃金兄弟》,錢嘉樂負責執導,日前煞科終可返港休息。

 

 

錢嘉樂兩年前以1,280萬買入北角寶馬山豐林閣一個七百幾呎單位,與盈盈及兩個女築安樂窩。最近他再斥天價買入半山豪宅,愈搬愈豪。

孕味濃

事實上,盈盈生完細女都無刻意修身,是因為她有意在年內生第三胎,所以想生完封肚一次過回復美好身段。而根據過往兩胎的紀錄,盈盈每次陀B都變重量級孕婦,因為媽媽好吸收,所以有咗唔夠三個月已露餡,而鬼妹仔性格的盈盈,對所有大肚婆禁忌都百無禁忌,所以陀仔陀得特別輕鬆。上周五(10日),盈盈下午3點與細女凱琪離開寶馬山寓所,到北角上興趣班,雖然有外傭同行,但2歲的凱琪非常黐媽咪,經常纏著盈盈要抱抱,面對可愛的囡囡出嗲功盈盈亦難以招架。當日所見,盈盈黑色背心加leggings,外穿鬆身恤衫,身形豐滿的她孕味都幾濃。

這日盈盈貼身黑背心外穿鬆身恤衫,風一吹脹卜卜身形即現形。

 

上周五(10日)下午三時許,盈盈拍完劇即返寓所接細女外出返興趣班,囡囡抱上身即好嗲咁伏在她的肩膀上,可見母女感情非常好。

 

雖然有外傭同行,但盈盈湊女親力親為,睇佢一手抱女一手向外傭指示方向,完全是偉大媽媽力的表現。

 

送完細女凱琪返屋企,盈盈再去學校接大女凱晴放學,咁頻撲都堅持自己接,可見盈盈樂此不疲。

坦言期待第三胎

周日(12日)晚上,盈盈一家四口出席親友在北角酒店舉行的婚宴,見記者在場採訪,錢嘉樂先單拖走出門口接受訪問,對於有指將會迎接第三胎,錢嘉樂話想等女兒大一點才追多個,後來盈盈亦加入訪問,兩公婆十指緊扣愈講愈興奮,錢嘉樂更鮮有地大講與囡囡的生活點滴及教育方向,還向記者投訴兩個女在家以全英文對話,玩死英文唔好的錢嘉樂。

最初獨自接受訪問的錢嘉樂,對於生多個最大的憂慮是怕盈盈照顧小朋友過於辛苦,呢個廿四孝老公真識為老婆著數。

 

大指緊扣合體接受訪問時,盈盈不時小鳥依人望實錢嘉樂,二人的默契盡在不言中。

 

盈盈話兩個女性格大不同,妹妹凱琪外向好逗人開心,不過亦好黐身,婚宴當晚不時見盈盈抱實愛女,而大女凱晴就自己走開玩。

 

盈盈:生第三個就退出!

這時記者再問盈盈是否想停工生多個?她望住錢嘉樂甜笑直認好想,又揚言生第三個就會退出幕前,而錢嘉樂亦指太太鍾意熱鬧,表示贊成老婆退下火線照顧小朋友。當問錢嘉樂是否買樓獎妻,他與盈盈即時對望狂笑齊聲說:「係買咗!不過地點就唔講得你知,再搬都係為咗啲女。」

 

冇刻意修身的盈盈體格壯健,老人家想說坐圍大好生養,盈盈生第三胎應該毫無難道。

為女減產

家有一對寶貝女,為照顧囡囡,盈盈近年只拍處境劇《愛‧回家》系列,貪其時間穩定又唔困身,每日收工回家仍可以跟女兒說故事,真的很著重親子關係。

 

拍劇以外盈盈的主要工作是湊女,當中包括教做功課及做親子勞作,早前她親手為細女凱琪做了萬聖節特別服飾,非常有心機。

為女轉性

從前浪子性格的錢嘉樂,今時今日已變成不折不扣的Family Man,錢嘉樂經常在外工作,試過兩個月冇見過女兒,所以一返港就爭取時間湊女,兩個女都很冧爸爸,經常攬攬錫錫說「爸爸I love you」、「Miss you」,前世情人打孖上,徹底令浪子錢嘉樂變廿四孝爸爸。

下一頁:思考型爸爸森美 從旁觀角度看子女

更多精選內容