楊思琦:仍然相信愛情

楊思琦:仍然相信愛情

01年香港小姐冠軍楊思琦,16年來經歷人生不同的高低起伏,5年前她選擇做單親媽媽,獨力撫養愛女。雖然她的愛情路並不易走,但提到對感情的期許時,更表示仍相信愛情。

原文:東方新地

撰文:劉倬延
攝影:Issac
場地提供:唐人館

楊思琦:BB畀到好大嘅力量我

由當選到依家,十六年,你事業有冇高低潮?

當然有高、低潮啦,選完嗰幾年TVB畀好多嘅機會,做司儀、主持、拍劇,但後尾其中有少少年份機會就會冇咁多,我人生嘅低潮嚟講,係我帶住小朋友返嚟嗰輪不停有好多負面報道,嗰時其實都有啲唔開心,瞓唔著、食唔落飯就冇,不過有新聞嘅時候,好多記者打嚟問有冇回應呀,就覺得又答?都唔想講嘞。

但我最開心嘅地方就係,湊住個小朋友,見到佢已經好開心嘞。亦都冇報道所講我產後抑鬱嗰啲啦!個BB畀到好大嘅力量我,見到佢,我啲辛苦就唔記得晒。

思琦表示近期主要去內地做商演,一個星期有三至四日在內地工作,其餘三至四日在香港,所以一有時間就會陪囡囡。

有無諗過唔要個BB?

梗係唔可以啦,上天畀我嘅禮物嚟㗎嘛!雖然另一半未必適合你或者發展到成為一個家庭,但係我覺得唔可以剝削咗佢喺呢個世上嘅權利,同埋就算係我一個,我相信自己都有能力同埋會畀到足夠嘅愛佢。加上媽咪畀到我最大嘅支持,一來湊小朋友佢有經驗,另外佢覺得有啲咩都可以重頭開始嘅啫,佢又整好嘢畀我食、又成日同我傾偈,所以我唔會唔開心囉。呢個社會唔係全部都係圓滿家庭,都有好多係單親家庭,雖然我唔係好想去做單親媽媽,但冇選擇底下,又好唔好彩做咗,但都唔緊要,我享受其中,小朋友又開心,已經係我能力做到最大嘅嘢嘞。

有人戥她的感情事不值,她反而豁達說:「過去由得佢過去,成日留戀以前,要向前望吖嘛,所以我都唔會成日諗以前點。」

女兒冇見生父

佢有冇見過爸爸?法律上係咪應該會?

點會呢?佢係跟我㗎嘛,出世嘅時候決定咗係跟我,所以唔會囉!個女依家都5歲,最基本佢幼稚園嘅時候,老師會話畀佢聽家庭有爸爸、媽媽,佢知道我哋個家庭係冇爸爸,但我同佢講,我哋有公公婆婆,佢都好清楚囉。

 

囡囡性格係點?

囡囡性格好活躍,好鍾意講嘢、鍾意唱歌,郁身郁勢,好有表演慾,又好鍾意同小朋友玩,我有朋友有小朋友,佢成日都會掛住,叫我打電話畀佢哋。我閒時又會帶佢食嘢、帶佢行街、去圖書館、書局、學嘢,游水、跳舞,其實都幾忙下㗎!

重提當年是媽媽鼓勵她學化妝及打扮技巧才選港姐,「如果冇選香港小姐、冇入呢行,我諗我應該好早結婚,因為我諗住廿幾歲就生小朋友,應該有幾個㗎嘞,咁依家都有一個,好開心!」

囡囡讀國際學校,負擔重唔重?

其實都重嘅,小朋友都有好多嘢學,唔係淨係學費,興趣班呀、加埋食嘢,好多開支㗎!再開心啲,帶埋佢去旅行,更加使得多,遲啲三、四年班又話去咩交流團,要努力啲賺錢呀!之前有兩、三個月喺橫店拍緊內地電視劇,有試過好掛住個女,因為嗰時佢仲細,同埋嗰套劇要打、好辛苦,又凍、又掛住媽咪、又掛住個女,嗰時都有啲思鄉病,但依家佢大咗啲,就算我打電話返去佢都識聽,以前太細個就算視像我望到佢,佢都周圍玩其他嘢,唔知係咩事,依家會知道、識得叫婆婆打電話畀我,冇咁覺得距離好遠嗰種感覺。況且依家又冇咁長時間唔喺香港,不過我執行李佢會問:「媽咪,你去邊呀?幾時返嚟呀?帶埋我去吖!」

距離選港姐已十六年,樣貌變化不大,保養心得是,「開心囉,希望衰老嘅速度減慢啦!」

 

感情唔係想就有

感情狀況如何?

其實都好忙碌,都唔會有機會發展,又要做嘢,其他時間撥晒畀個女,一個禮拜得番三、四日,仲唔陪佢好guilty㗎喎!都好講緣份,唔係你好想就有㗎嘛,所以隨緣囉,唔會話一定要有呀、人有我有呀!中間都有啲追求者嘅,但係冇發展嘅,我覺得未必係適合。

說到今屆港姐冠軍雷莊𠒇,「你睇得獎嗰晚啲相都靚嘅,同埋入行後識化妝,又唔同呢,好多人都話我離開TVB後靚咗,我諗係因為依家識得化妝。」

你仲相唔相信愛情?仲需要愛情?

我仍然相信愛情嘅,都需要嘅,但唔知幾時、邊一刻會嚟搵我囉!哈哈!唔係個個喺感情路上都咁平坦,我相信都會有啲特別嘅小插曲發生,之後有新嘅嚟或者有更加好嘅,先至會去珍惜,我亦都相信會有呢一日嘅。不過我一有時間就會想陪個女多啲,因為都擔心第時佢反叛期唔聽我話青少年總會有反叛期,希望佢知道我盡心盡力去照顧佢會懂事啦!

無綫搵你拍劇你OK?

如果有啱嘅節目,我都wellcome去合作嘅。同埋我同TVB都唔會話有咩過折,只不過嗰時合約完咗,問我續唔續約,但我覺得我嗰陣時嘅年紀我真係想出去睇下囉!如果我簽多六、七年,都四十幾歲,都好年長啦,仲點行出去呢?佢係加人工畀我嘅,其實對我好好嘅,只不過我真係好想去試多啲嘢,因為女仔唔同男仔嘛!

工作以外的時間都用來陪伴女兒成長,有信心給予女兒足夠的愛。

下一頁:思考型爸爸森美 從旁觀角度看子女

更多精選內容