魚腥草竹蔗茶

清熱降火 魚腥草竹蔗茶

食譜

廣告

早前約左朋友去油糖TEA時,見仲有少少時間我就入去街市八卦下,就係咁我又學識煲多款既可以滋潤降火,又增強抵抗力嘅 魚腥草竹蔗茶 。聽左店主介紹,又好似幾好咁(最重要就係唔難煲),所以就請佢幫我執左一份材料返去煲俾兩位老細飲啦!

 

 

 

撰文:小小豬的成長日誌
圖片:小小豬的成長日誌

今次嘅主角就係魚腥草,其實我之前都只係聽過,但就真係完全冇接觸或者有諗過用嚟煲涼茶。聽店主講原來魚腥草係非常好,可以話係天然第一抗生素,飲左就可以增強免疫力,同時照顧我地嘅呼吸系統,而且亦具有消炎作用,所以對感冒、傷風、咳嗽及喉嚨發炎都好有幫助。

煲嘅同時加埋青橄:對喉嚨有消炎消腫;糖冬瓜:清熱降火,稀釋濃痰易咳出;竹庶:清熱降火、生津止喝,所以煲出嚟就會非常清甜而且仲好有益,大人同小朋友都啱飲呀!

材料:

魚腥草約半斤、竹蔗一扎、青橄約20粒及糖冬瓜一小包~

做法:

依啲就係魚腥草,其實就係魚腥草菜嘅根莖~

由於係根莖關係,所以就要洗得乾淨啲,我就慢慢洗將啲小根都除走,白雪雪感覺好似好啲~

將所有魚腥草洗乾淨~

青欖用刀背略拍扁;竹蔗洗淨破開兩邊~

煲內放約4L水,然後隨水加入所有材料(糖冬瓜除外)~

待滾起後,用大火加蓋煲約30分鐘~

之後加入糖冬瓜~

再轉慢火加蓋煲多1小時30分鐘~

最後再焗15分鐘,隔渣後就可以飲得啦~

其實係煲嘅過程都有丁點擔心,唔知個味會係點?好驚會有一陣腥?不過飲左第一啖就真係完全疑惑全消,因為真係超級清甜,又有好香竹庶味,就連小小豬都不知幾鐘意飲呀~

味道唔錯之餘,飲完喉嚨仲好舒服,食完咁多熱氣食物要潤一潤啦!

溫馨提示:雖然各種食材都係好溫純,不過始終個人體質都有所不同,我啱飲時又未必每個人都啱,所以大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

BY 小小豬的成長日誌

 

下一頁:滋潤止咳海底椰粟米湯