舒緩小朋友咳嗽 快靚正 紅糖薑茶食譜

舒緩小朋友咳嗽 快靚正 紅糖薑茶食譜

一向氣管唔多好嘅小小豬,早晚都會咳。咁佢嘅咳又唔係話好嚴重,但一聽到佢咳得密密時,都總係帶點心痛。原本打算去買桔餅煲湯俾小小豬飲,不過同學仔媽媽就介紹左我一個快、靚、正方法,屋企又有齊材料,所以就試下煲依個 紅糖薑茶 啦。

 

 

 

撰文:小小豬的成長日誌
圖片:小小豬的成長日誌

 

舒緩咳嗽 紅糖 薑茶

其實我都知小小豬唔係病嗰一種咳,可能係早晚溫差大,再加上平日又多食生冷嘢,所以就引起咳嗽誘因。

紅糖薑茶 就可以保暖身體及止咳平喘,而且都只係用屋企都會有嘅簡單材料就得,最好就係時間唔耐,只係需要15-20分鐘就完成。

材料:
依個係一份量材料:生薑3片、陳皮1角、紅糖少許~

做法:

陳皮浸軟刮去皮瓤;薑去皮切片(由於唔係每個小朋友都受到薑嗰一種味,所以切薄片就好啦)~

煲內放約1.5碗水~

然後隨水加入所有材料~

見水滾後就即轉用慢火~

之後轉慢火加蓋煲多15分鐘~

可以因應個人口味,加入適量嘅紅糖(唔好為左令小朋友飲就加多啲糖,因為太甜的話就會”張”喉,咁就會仲咳多啲。建議落1茶匙多少少啦)~

最後焗大約5分鐘,等啲糖溶左之後,就可以飲得啦~

雖然係帶有少少薑味,不過味道就唔會好濃,所以小小豬都唔抗拒呀~

當然第一次煲我就同小小豬分甘同味,我都飲一半試下,飲落就有啲似蕃薯糖水嘅味,但就甜多少少。

小小豬又好似明顯係咳少左,起碼瞓著左都冇咳醒,同埋早上起身咳嘅密度又好似平日少左,我諗依個紅糖薑茶對小小豬都起左少少作用呀!

 

溫馨提示:由於個別人仕體質不同,所以大家記得煲之前了解下自己,如有疑問,請先向註冊中醫查詢!

下一頁:滋潤止咳海底椰粟米湯

關鍵詞
紅糖薑茶

更多精選內容