超簡單 糖冬瓜粟米鬚薏米水

超簡單 糖冬瓜粟米鬚薏米水

講起小小豬最鐘意嘅涼茶,就一定係粟米鬚水,一有粟米水佢就會不其然地狂飲。既然小小豬鐘意我就當然非常願意煲,不過就唔係成日買到,因為街市姐姐話一返貨就會晨早賣晒。今日竟然俾我又見到,所以就買少少加埋糖冬瓜同埋薏米嚟煲個 清熱 降火 糖冬瓜粟米鬚薏米水 啦~

撰文:小小豬的成長日誌

圖片:小小豬的成長日誌

其實依個我都真係成日煲,就係因為我成日都煲,我就以為同大家分享過,睇返….原來我係冇哦,所以就等我借今次機會同大家分享,因為依個涼茶真係好好味,而且係非常簡單,我想好多大小朋友都一定鐘意呀!

粟米鬚薏米水可以清熱降火,利尿消腫同埋清熱毒,加埋糖冬瓜就可以有滋潤同埋清熱生津止渴之效,而且味道又會甜甜地添!

材料:
粟米鬚一斤、生薏米1両(約半飯碗)、熟薏米1両(約半飯碗)及糖冬瓜適量~

清熱

做法:
首先就將啲粟米鬚洗乾淨~

清熱

生熟薏米都浸洗一陣啦~

清熱

煲內放入3L水,煲滾後就可以加入生熟薏米~

清熱

然後就用大火加蓋煲約10分鐘~

清熱

依個時候就可以加入粟米鬚~

清熱
繼續就用大火加蓋煲約15分鐘~

然後就可以因應個人口味加入糖冬瓜,我大約加半包左右啦~

加蓋慢火煲45分鐘~

隔清晒啲渣之後,就可以飲得啦~

小小豬真係勁鐘意飲,每次都係會快快手同我清晒成杯,仲一定要添飲。其實係唔係有效清熱氣或者對濕疹好我就唔太敢講,不過利尿就一定好有成效,因為每次飲完粟米水之後,小小豬去VV次數係密左又多左。去得VV多,咁就可以排下身體毒素,唔多唔少都應該有啲幫助呀!

溫馨提示:由於個別人仕體質不同,所以大家記得煲之前了解下自己,如有疑問,請先向註冊中醫查詢!
BY 小小豬的成長日誌
https://www.facebook.com/kinseymama/

更多精選內容