李國麟拖女兒晒愛 : 個女拍拖我會呷醋!
原文：東方新地
相片：新傳媒資料室
李國麟咀女兒惹非議
62歲TVB「綠葉王 」李國麟，近日在《溏心風暴3》中，演曾救夏雨一命的恩公，劇中更有個寶貝女岑麗香，二人有不少父女內心戲，交織出不少火花；跳出角色，李國麟對自己15歲女兒Cherie一樣錫到燶，由細到大女兒亦視父親為偶像。不過今年七月時，佢因為上載同女兒慶生的親吻照，就引來網民爭議！
李國麟拖女兒晒愛
早前李國麟返TVB開工前，就先揸車同女兒去電視城附近的將軍澳一商場逛街，李國麟泊低車後，兩父女就手拖手行街睇嘢，15歲的Cherie差不多有爸爸咁高，雖然還有些Baby fat ，但束起髮髻的她輪廓鮮明，更有點像無綫女藝人江嘉敏。李國麟大部分時間都係陪睇，陪女兒睇完首飾又睇手錶，完全將阿女放第一位！
兩父女撐枱腳餵嘢食
行到攰，兩人在商場地下的Cafe開餐，兩父女黐到實出去揀嘢食，李國麟就交由女兒負責點餐俾錢，自己就先去搵位坐；開餐期間，點了沙律的囡囡，不時餵爸爸食車厘茄，爸爸又將自己吃的牛角包切開，餵埋入口俾女兒吃，兩父女感情好到不得了！
父女情深
吃飽後，李國麟見仲有時間，就陪女兒到公園散步，都話女兒是爸爸前世情人，見李國麟望實女兒已經冧爆，全程慈父上身，不停用手機幫女兒影相，Cherie又突然搭住爸爸行，兩人一路行一路傾，更不時笑到咔咔聲。
李國麟：「個女拍拖我會呷醋！」
15歲的Cherie，剛升上F4，自小受父親演戲薰陶，對演藝深感興趣，對娛樂圈亦充滿好奇。不過李國麟就叫女兒諗清楚先，始終娛樂圈好複雜，唔係話努力就會成功！但佢表示唔會阻止女兒，會將自己的經驗同佢分析。
李國麟又稱Cherie細細個時咩都會同自己講，但女兒慢慢長大又進入反叛期，呢年幾已經唔似以前咁無所不談。問到Cherie有冇拍拖，李國麟就話現時未有，但就話如果女兒第時拍拖，自己真係會呷醋！
問到如果囡囡想向娛樂圈發展，李國麟又會唔會支持呢？囡囡就搶住答：「我相信喺邊方面佢都會幫我！」跟住反問爸爸：「係咪先？」李國麟就鬼馬地答：「除咗財政方面！」Cherie聽完之後就作勢拍打爸爸，兩父女完全無隔閡，甜到漏呀！
