絕世好爸減產培訓 黃浩然 秘招谷仔讀華仁

絕世好爸減產培訓 黃浩然 秘招谷仔讀華仁

加入無綫多年一直搏殺拍劇的黃浩然,14年患上罕見的「貝賽特氏症」要停工養病一年,康復後他不再盲目衝刺,選擇一切以家庭為重,為了有健康的身體照顧太太莫家嘉(KaKa)及兩個可愛的兒子(6歲Kayden及4歲Ransley),黃浩然放棄演藝事業上的鬥爭﹐享受慢活。全身爆肌的黃浩然性格一點也不粗獷對住囝囝是個溫文的絕世好爸,陪讀書陪遊戲,軟硬兼施親力親為湊仔。今年9月大仔Kayden在傳統名校華仁升讀小學,黃浩然更刻意減產,負起培訓兒子重任,而日前他更親自湊大仔返放學。

撰文:東方新地

圖片來源:新傳媒圖片庫、莫家嘉Insatgram、黃浩然微博

黃浩然 秘招谷仔讀華仁

黃浩然以前是個工作狂,劇接劇日夜顛倒,終於捱出大病,3年前患上「貝賽特氏症」,令其人生觀徹底改變,此後他決心戒煙、勤做運動,亦開始注重飲食,更懂得珍惜自己及家人。年前復工後,黃浩然每年只拍一至兩部劇,其餘時間全部留給太太及兒子,知情者透露:「黃浩然個病可以好嚴重,亦都有機會復發,經歷死過翻生,佢唔再諗咩上位拎咩視帝,屋企又唔係等佢搵錢開飯,依家除咗拍劇,其他工作佢都好少接,佢仲同公司講明唔會劇接劇,每拍完一部都要有充足時間休息。」

黃浩然
3年前一場大病,令黃浩然醒覺家人比工作更重要,最近唔使拍劇,不時一家四口出巡,大手拖小手,好溫馨。
黃浩然
黃浩然與Kaka雖然工作各有各忙,但一家四口每逢生日或任何喜慶節日都會一齊慶祝,夫婦二人以身教讓兒子知道,家人永遠是最重要的。

 

被迫做怪獸家長

太太KaKa做形象設計經常要周圍飛,黃浩然經常要負起照顧兒子的責任,拍劇以外,他都盡量爭取親子時間,如陪兒子食早餐後送他們返學,放假又會外遊,帶兒子去郊遊、沙灘,讓小朋友擴闊眼界。至於升學問題,去年大仔Kayden仍在讀K3時,黃浩然曾在訪問中表示感到非常頭痛,也承認自己是怪獸家長:「有時迫於無奈要做怪獸家長,我有畀阿仔參加國語比賽,不過就唔會為入名校而幫佢報面試班,我同佢講如果間學校覺得你叻,就會考到。我寧願佢讀書讀得開心。」黃浩然強調不會催谷兒子的學業成績,而是鼓勵他們多作嘗試:「大仔一星期有三日上興趣班,如學琴、踢足球,點知踢咗一年波就話唔鍾意,咁就唔再學。呢個世界有咁多事物,唔畀佢試佢係唔會知道鍾唔鍾意。小朋友都有壓力,即使家長唔將佢哋去比 較,佢自己亦會同身邊同學比較。」

 

黃浩然
兒子上興趣班,黃浩然雖有工人姐姐,但都堅持親自送子上學!

大仔入讀華仁小學

黃浩然這套收放自如的育兒方式,成功教出了兩個乖巧而又能主動去學習及探索的兒子,今年9月,大仔Kayden入讀傳統名校華仁小學,不過由於幼稚園就讀出名是Happy School的靈糧堂幼稚園,K3才揸筆寫字,而黃浩然沒有幫兒子在外補習,所以升小一後難以習慣每日排山倒海的功課及測驗,開學後不久Kayden曾因為功課壓力而大喊,黃浩然與太太KaKa即從旁協助,令兒子逐漸適應小學生活。

黃浩然
黃浩然與太太KaKa自小已培養兒子思考及創作,所以一有時間就會教囝囝砌Lego、多閱讀!

大仔Kayden遺傳了母親的藝術天份,喜歡做勞作手工及繪畫,更會教囝囝執樹葉,廢物利用去做勞作,創意無限!

黃浩然 親自湊仔

早前黃浩然拍完新劇《果欄中的江湖大嫂》,即放大假休息,大把時間可以親子。據知大仔Kayden讀華仁小一上午班,每日中午就放學回家,黃浩然會親自監督Kayden做功課及溫習,完成後就會讓兒子有自由時間,玩自己喜歡的玩具或活動。周二(19日)晨早6時半天未光,黃浩然親自帶Kayden落樓搭校車,放學時他又駕車前往華仁接放學,湊仔絕不假手於工人,而Kayden返學放學都是面帶笑容,看來已適應了小一的校園生活,很喜歡返學。

黃浩然
天未光,黃浩然親自送大仔Kayden落樓等校車返學。

黃浩然
放學時黃浩然又駕車去華仁小學接放學,廿四孝爸爸冇得彈。

升小一有壓力

據知情者透露:「黃浩然同KaKa教仔都採取開放態度,唔會話谷佢哋死讀書,但就會定落啲規矩畀佢哋,始終小朋友都唔可以太鬆散,當囝囝唔聽話時一樣會鬧,賞罰分明。佢哋好著重培養囝囝藝術同創作思維,一家四口會一齊砌Lego,又會出外寫生,都好健康益智㗎!今年華仁收咗哥哥Kayden讀小一,細佬Ransley有得跟住上就更加冇壓力,黃浩然教個仔唔需要做成績最Top嗰啲學生,只要自己盡咗力就得,早幾年佢大病完,明白健康同快樂先係人生最重要嘅嘢,所以唔會迫啲仔做佢哋唔鍾意嘅嘢。不過華仁始終係傳統學校,學術同品德一樣著重,開學冇耐Kayden覺得好吃力,佢兩公婆已經要睇緊啲功課,仲要抽時間同阿仔默書同溫習,雖然辛苦,但黃浩然兩公婆都親力親為,想畀個仔知一齊陪住佢,有乜困難父母都喺身邊!」

黃浩然
除了要照顧升小一的大仔Kayden,黃浩然亦沒有忽略4歲讀 的細仔Ransley,早前他獨自帶細仔外出,天氣轉冷為他著好外套,慈父樣出晒來

家庭第一

42歲的黃浩然07年加入無綫,多年來為事業拼搏不言休,大病後終領悟人生意義肯停下腳步,現在他把家人放在第一位,培訓兒子成為他的第一任務。對於當年臥在病床上,為照顧他非常奔波的太太KaKa,黃浩然更是心存感激,照顧兒子亦唔會冷落老婆,兩夫婦有時都會撇低兩個仔外出撐枱腳,冇大細超㗎!

黃浩然
早前本刊影到夫婦二 人一齊去參加阿Sa蔡卓妍的生日party,飲了酒的黃浩然冇揸車, 與KaKa一齊call車回家。
黃浩然
黃浩然大手拖小手湊仔,太太Kaka都覺得好冧,忍唔住影父子的背影!

下一頁:思考型爸爸森美 從旁觀角度看子女

更多精選內容