開通奶奶有秘訣 薛家燕:唔好搞破壞

開通奶奶有秘訣 薛家燕:唔好搞破壞

8歲出道做童星,拍戲拍到33歲嫁為人婦;93年因為丈夫拋妻棄子再次出山,今年67歲的家燕姐終於捱出頭來,大女石祐珊幫得手、細女石耀珠剛從港大碩士畢業、明年六月更加要為二仔石耀庭舉辦婚禮,正式娶新抱榮升新奶奶。
仔大女大,明明可以退休享兒女福,做定準備湊孫為樂,不過家燕姐永不言休,不但享受繼續為觀眾帶來歡樂,還不時有新搞作,今年會研製自家嫁女餅,新年就先試牛刀以「家燕媽媽」做招牌出曲奇:「整餅係因為當年嫁人自己乜都唔識,的起心肝去學咗一年廚,第一樣學識嘅就係整蛋糕!」

撰文:朱小博
攝影:Simpson Chiu

百圍喜酒擺足兩日

去到邊都喜氣洋洋笑容滿面,近日的家燕姐更是額頭鑿住個囍字一樣,快要被她感染到想跟住跳番part十字舞。原來早前兒子石耀庭向拍拖三年女友Zoe求婚成功,將會在今年六月於洲際宴客舉行婚禮。「本來係預咗擺五十圍酒,不過最近開始發覺仲有好多人想請都唔夠坐。早排去到新加坡登台,又有粉絲話買定機票出年要睇我娶新抱喎,佢哋由細睇到我大,一早唔係粉絲做咗好朋友,個個都係真心替我高興,我都好想個個都嚟齊。」

二仔石耀庭(左一)今年向拍拖三年的幼稚園教師Zoe(左二)求婚成功,今年六月 就會拉埋。家燕姐對這位未來新抱讚不絕口,而Zoe亦都一早融入家中。

所以最近家燕姐和阿仔再商量,起碼要擺兩日酒至夠,一晚是他的朋友和親戚,另一晚就要讓家燕姐請圈中人。「講就話出年六月至擺酒,但好多嘢依家要安排定。年尾登台、出年工作、家燕媽媽曲奇禮盒、仲有擺酒啲嘢,依家晚晚同珊珊(長女)點幾鐘仲傾緊WhatsApp講公事,然後執衫執屋,阿仔婚後話想搬番去我隔籬間屋住,話近啲方便照顧我。佢哋都仔大女大,知道媽媽開始老,需要人照顧。」

兒子石耀庭的喜酒暫定擺兩日, 因為家燕姐圈中朋友太多,仲有 粉絲話要買定機票看她娶新抱,家燕姐希望人人都開心。

未來奶奶要通氣

33歲嫁為人婦,家燕姐結婚第13年,丈夫石保慶突然消失毫無音訊,直至三年後家燕姐通過律師提出離婚才再次蒲頭。雖然此段婚姻是失敗收場,家燕姐依然有肺腑之言要跟將為人夫的兒子說:「婚姻係兩個人組成一個家,未必所有嘢都啱啱好、夾得到,但一定要互相有溝通。我教個仔,最緊要做一個負責任嘅男人,娶得人哋返嚟、生得仔女出嚟,一定要對老婆、仔女負責任,呢種丈夫就肯定唔會衰得去邊。我老公當年一走了之係為咗第二個女人同金錢,仲有一個原因,始終離唔開屋企教育。佢屋企四兄弟,四個都離婚,我唔敢話係父母嘅錯,但影響一定有。正常人,見到後生仔嗌交係唔係會勸交,話一人少句唔好傷感情呢?邊有人見到我同老公嗌交,就攞鋪床鋪出嚟叫我老公不如出廳瞓呢?我好畀心機煮完餐飯,問佢幾點返嚟,奶奶竟然捉咗佢出街食飯……有啲人就係咁,鍾意虐待人嚟證明自己嘅優越。我第時做奶奶,一定唔會做搞破壞嗰個人,兩公婆嘅事,都係畀人哋兩公婆自己解決。」

本來打算以自家製嫁女餅賀一賀娶新抱,聯絡廠商時,家燕姐靈機 一觸,趁住聖誕新年先行推出「家燕媽媽」曲奇及蝴蝶餅禮盒,爭做 送禮佳品
大女石祐珊是得力助手、兒子石耀庭明年娶妻、三女石耀珠則剛 從港大碩士畢業,家燕姐話有得必有失,丈夫離家雖然遺憾,但 兒女亦因此特別懂事乖巧。

細個食南拳北腿唔識煮飯

年紀小小就出道做童星,直到嫁人前,家燕姐未入過廚房、連電飯煲都唔識用。「當年拍拖,結婚前梗係出嚟食吓飯,互相了解吓先啦。佢問我識啲乜、鍾意做啲乜,我好自豪咁話,我識講日文、普通話,識跳拉丁舞同中國舞,又識北派同南拳北腿。佢聽完一啲都唔興奮,淨係問我識唔識煮飯……我八歲就拍戲,不嬲阿媽都唔使我入廚房,見到佢個樣咁失望,我又係個傳統女性,咪覺得咁樣做人老婆唔合格囉。」

由白飯都唔識煮,到 為了家庭學識中西美 食可以一個人煮一圍餸菜,家燕姐話復出拍戲養家後,不單止 沒空煮食,連吃飯盒 的時間也擠不出來。

跟李曾超群學烹飪

醒覺後的家燕姐跑到李曾超群報烹飪班,由整曲奇蛋糕開始,學師一年,中西美食由前菜到甜品樣樣識整。「我由以前飯都唔識煲,到後尾一個人準備三日煮起十二個人一圍酒菜。我仲記得最開頭焗蛋糕,第一次整已經call定朋友嚟分享,點知次次發蛋都失敗,蛋糕變蛋餅,直到第七次至終於有蛋糕食。到後來,我唔止識整蛋糕,仲學埋唧花,屋企人朋友個個生日都係食我手製蛋糕。我最叻係海南雞飯,滑雞、雞湯、椰油飯仲有醬料都係自己整。仔女就最鍾意我用黃薑整嘅印尼雞,仲有我蒸魚最拿手,同啲酒樓大廚學番嚟,一條魚啲肉蒸出嚟要夠滑就一定要幫佢『化妝』,即係面頭薄薄上一浸豆粉囉……呢幾年坦白講,我連食飯嘅時間都冇,都係喺化妝間、車上面求其食飯盒,好耐都冇煮過飯囉!」

燕姐由不擅下廚變廚藝高手,第一樣學識就是整蛋糕。剛剛推出了「家燕媽媽」曲奇及 蝴蝶餅,今年更會研製自家嫁女餅,把「家燕媽媽」出品發揚光大。

山窮水盡絕路回頭

因為丈夫不辭而別,由家庭主婦變經濟支柱,本來毫無金錢支援,都好歹有屋住、有那些年拍戲積蓄。誰知道幾年後連樓都被夫家收回,積蓄亦快見底,所以97年家燕姐才迫於無奈復出,接拍《真情》好姨一角:「當時仲未有《真情》拍,仲以為前夫會返嚟,點知一走已經年幾兩年。樣樣都唔順心唔順手,無咩錢剩又搵唔到工,嗰日仲要樓上裝修,天花板個水晶燈都跌埋落嚟。睇住啲仔女喊,我真係好灰心,覺得連盞燈都蝦我。我住喺25樓,嗰一下真係行出去露台,伸咗一隻腳出去……走投無路就係呢個感覺,好彩大女叫住我,肥仔又叫我返去食薯條,呢個時候我想提醒吓大家,人有可能會遇上絕境,但係你放心,個天係一定會畀條路你行。」

83年嫁給商人石保慶,家燕姐更為了讓自己做個合格人妻和人母,息影並且專攻廚藝足足一年,可惜付出得多、回報則少。

恰巧電視台找家燕姐參演《真情》,好姨角色一炮而紅,登台邀約不停,連周星馳都找她拍《食神》。「講起上嚟好好笑,《真情》受歡迎,由每集半個鐘加碼到45分鐘,又有其他嘢忙,每日天光返屋企,仲要幫仔女簽手冊執書包,成日都執錯晒,搞到仔女叫我唔好再搞佢哋啲嘢。因為太忙冇時間去銀行攞錢,屋企水電都畀人cut晒,開住工菲傭打畀我話冇towngas又著唔到燈。為方便去申請提款卡啦,點知又唔識用,畀櫃員機食咗三次卡……當時壓力好大好徬徨,過咗講番咪好笑囉,真係學無止境,做人每日每個階段都有新嘢學。」

丈夫突然消失,對丈夫大失所望, 又因為經濟拮据感到徬徨,當年家燕姐就是在這個25層樓的家中 露台跨出一隻腳,差點做傻事。

求神恩典大病不死

雖然從小家庭不完整、爸爸又不在身邊,家燕姐說,有得必有失,也是因為這段經歷,三個兒女學會愛惜媽媽、知慳識儉,並且十分團結又懂事。「好姨個角色因為掉低親生女唔理好負面,開頭大女珊珊唔畀我拍。第二次電視台再搵我,我話畀珊珊知要搵錢、要養家,唔拍唔得。佢話:『媽咪,咁你放心拍啦,細佬妹等我嚟照顧!』我當其時真係感動到攬住佢喊。家姐真係咁多年幫咗唔少手,細佬妹亦都好尊重佢又聽話,就算呢幾年大個晒,有啲咩事問完我,都有個習慣要問埋家姐先。」

09年大病一場,最危急關頭,薛家燕最擔心最遺憾的是,三個兒女都不在身邊。

2009年,家燕姐因為膽石手術發高燒,又患上急性胰臟炎併發肺炎,好多人問除了立定遺囑,有否擔心不能再復出幕前?「當時擔心梗係唔係呢樣啦!我三個仔女都喺美國唔喺身邊,我係向神祈禱,仔女未返嚟,千祈唔好畀我死住!仲記得當時珊珊話要辭工返嚟陪我醫病幫我手,我話咁大間公司有份好工,千祈唔好辭住。但係珊珊喺email度話,份工冇咗可以搵番,但係冇咗個媽咪,佢唔會再搵得番……」

家燕媽媽X嘉誠爸爸

大病初癒後,家燕姐的步伐沒有慢下來,反而更活躍、搞作更多,今年除了辦家燕媽媽藝術學校、推出家燕媽媽曲奇糕點外,現時已傾定新一輯《流行經典五十年》主持工作、新電影及新電視劇,還有四、五場登台,2018年的工作一早排滿。不說不知,原來不言休不言退,要從「家燕媽媽」的稱號由來說起。話說早年某大學民調,在50多位社會知名人士中選出最理想的爸爸和媽媽,你肯定想不到,最後勝出的爸爸是李嘉誠,而媽媽就是薛家燕。即是話美滿人生好簡單,除了錢,就是快樂。「我覺得一個人來到這個世上,應該要珍惜這些生存的日子。要活得精彩,活得有意義。我從來冇厭倦過我嘅行業,因為我喜歡跳舞唱歌、喜歡說話見人,我亦喜歡扮嘢逗人開心。早排出街行入升降機,幾個後生見到我就忍唔住笑,原來佢哋晚晚都要睇埋《皆大歡喜》至肯瞓,你話幾開心呢?我十幾廿年前拍嘅戲,十幾廿年後仲可以帶畀人歡樂,有一個職業能分享自己呢方面嘅天份,得到掌聲同回報,你話人生仲有咩可以比呢樣嘢更滿足?」

家燕姐熱愛娛樂圈這一行,喜歡跳舞唱歌,扮嘢逗人開心,「有一個職業能分享自己呢方面 嘅天份,得到掌聲同回報,你話人生仲有咩可以比呢樣嘢更滿足?」
96年復出後,家燕姐成為開心果,也創造不少角色,包括《真情》的好姨、《皆大歡喜》的十字步都是經典。
67歲仍然樂於工作為大家帶來歡樂,家燕姐的工作已經排到2018年年尾,過完年就會投入主持新一輯《流行經典五十年》。

更多精選內容