孖仔孖心肝 前主播鄭萃雯︰追雙倍奶最辛苦!

孖仔孖心肝 前主播鄭萃雯︰追雙倍奶最辛苦!

一個幸福的家,由結婚生小孩開始。很多父母都希望生夠兩個,組成四口之家最完美,前TVB新聞主播鄭萃雯(Karen)一樣計劃生兩個,結果快人一步打孖上!最初照超聲波時竟發現有兩粒閃閃,Karen和老公頓時呆了,腦袋一片空白,老公更一整天茫茫然,Karen笑說︰「我問佢係咪唔開心,佢話唔係呀,我哋要換車。」對於一次過中獎,Karen最初感到不知所措,但平定心情之後,她開始好期待孖B的出現,「呢個經驗真係好少人有,我真係好驚喜!」兩個孖寶卓言和卓喬出世相差一分鐘,哥哥個頭較大和圓,弟弟面形尖一些,雙眼皮較深、眼睛圓潤,Karen笑言自己最初也分不清呢!

撰文: Ling

攝影: Issac Poon(部分相片由受訪者提供)
化妝及髮型: Gary [email protected] Makeup
服裝: Michael Kors
場地: NAMCO Asobi Park PLUS (www.facebook.com/namco.hk)

孖仔孖心肝 前主播鄭萃雯︰追雙倍奶最辛苦!01
究竟邊個係哥哥弟弟?鄭萃雯指左邊是哥哥,個頭較大較圓;右邊的弟弟個頭尖一點,眼睛圓潤一點,雙眼皮亦較深。

鄭萃雯︰「眠乾睡濕」的真正意義

生過小朋友才明白父母的偉大,Karen十分有同感,切身了解到「眠乾睡濕」的真正意義。「喺深夜嘅時候,你會為佢哋喊,因為有好多擔心,死喇……我想喊……」Karen覺得生命無常,很多事情不能掌握,包括小朋友的健康。「陀B嗰陣醫生已經話我孖胎風險比較高,容易患上妊娠毒血症、雙胎輸血症等等,個個星期都要覆診照超聲波,但無論我幾小心行路、食嘢,都未必阻止得到,如果是但一個有事點算呢?」

孖仔孖心肝 前主播鄭萃雯︰追雙倍奶最辛苦!02
鄭萃雯在TVB新聞部任職長達11年,由實習生做起。
孖仔孖心肝 前主播鄭萃雯︰追雙倍奶最辛苦!03
另一TVB前主播林小珍(右)在《香港早晨》叫錯鄭萃雯做盤翠瑩,片段一度在網上瘋傳。
孖仔孖心肝 前主播鄭萃雯︰追雙倍奶最辛苦!04
照顧孖胎雖然要付出雙倍辛勞,但得到的快樂是more than double。

多一份幸福 多一份風險

陀孖B有多一份幸福,但亦多一份風險。Karen個子小小,陀孖胎一點也不輕鬆,妊娠反應強烈,所承受的痛楚亦比其他人來得早。「單胎孕婦大約陀到七個月,盆骨先開始撐大覺得痛,我四個月就痛,瞓喺度轉唔到身。」任記者期間主力醫療線的Karen,與很多醫生相熟,她有藉機會問醫生解難。「我問醫生點樣可以嘔少啲,醫生話食啲乾身嘅食物,例如餅乾、多士,唔好因為冇胃口走去食粉麵、粥,原來食濕嘢會令你更加想嘔!」

孖仔孖心肝 前主播鄭萃雯︰追雙倍奶最辛苦!05
Karen陀孖B時,比一般孕媽媽的痛楚來得早。

懷孕37周食全餐

懷孕期一切順順利利,直至生B當日,一直希望順產的Karen,最後因催生不成要剖腹。「懷孕37周第一日,醫生要幫我催生,試咗八個鐘都唔得,結果要開刀『食全餐』!」

孖仔孖心肝 前主播鄭萃雯︰追雙倍奶最辛苦!06
Karen笑言當初也分不清誰是哥哥、誰是弟弟!

對比起順產之陣痛,Karen覺得開刀的情景更恐怖,有肉隨砧板上的感覺。「成個手術室有好多人,包括婦產科醫生、兒科醫生各兩個,護士有兩組,因為要照顧兩個BB。我未生前以為我生仔一定喊,但佢哋係咁同我講嘢,生咗第一個我想激動之際,姑娘就要我對手帶資料,對完就到第二個出世,我又讀多次,我根本冇時間醞釀眼淚,冇晒情緒!」

孖仔孖心肝 前主播鄭萃雯︰追雙倍奶最辛苦!07
回想頭三個月的黑暗日子,Karen話好有陰影,但看到小朋友健康成長,一切也值得。
孖仔孖心肝 前主播鄭萃雯︰追雙倍奶最辛苦!08
看著兩個孩子一同睡著了,Karen終於可以休息一下。
孖仔孖心肝 前主播鄭萃雯︰追雙倍奶最辛苦!09
為了給予孩子最好,Karen堅持餵母乳,即使奶量不足以餵飽兩個,她也盡量一餐母乳,一餐奶粉,令兩個孩子都有人奶飲。

頭三個月人生最黑暗

好多媽媽都認為,坐月照顧初生BB,比生仔來得更痛苦,無論體力、情緒和精神上,皆已瀕臨崩潰邊緣!「我依家對湊初生BB有陰影。」

Karen形容產後頭三個月是人生最黑暗的時候,堅持餵母乳的她,最艱辛是要為兩個BB追奶。「母乳對BB發育好,同BB嘅連繫亦特別深,所以我唔想放棄。就係我呢份堅持,令我休息嚴重不足,因為佢兩個嘅作息同食奶時間唔同步,就算我泵出嚟都好,餵完呢個到第二個醒,我又會去睇吓,每餐之間我平均只有半個鐘休息,而半個鐘亦未必瞓得著,我仲要沖涼、食嘢,坐月一日要食五餐㗎嘛!」

孖仔孖心肝 前主播鄭萃雯︰追雙倍奶最辛苦!10
兩個小朋友的進食和作息時間不同,每餐之間Karen只有半小時休息。
孖仔孖心肝 前主播鄭萃雯︰追雙倍奶最辛苦!11
Karen最嬲自己有時因為太眼瞓,打翻了泵出來的珍貴母乳,「我喊到癲咗!嚎哭呀!」

每餐奶之間只睡半小時

體力及精神上的透支,令Karen哭過無數次,更埋怨自己不夠奶,擔心BB捱餓。「追奶真係好大壓力,覺得造物主創造女人出嚟,應該要足夠餵飽自己小朋友㗎嘛!雖然我堅持餵,但我奶量只夠餵一個,另一個要補奶粉,兩個間住一餐人奶一餐奶粉。」

最令她崩潰是當她千辛萬苦泵完奶,卻因自己眼瞓倒瀉了,「試過幾次,我喊到癲咗!嚎哭!我已經唔夠餵,仲要倒瀉咁珍貴嗰包!」

孖仔孖心肝 前主播鄭萃雯︰追雙倍奶最辛苦!12
TVB新聞部十分體諒母乳媽媽,特別間房讓Karen泵奶,又遷就她的泵奶時間來派assignment。

Karen因為怕再影響採訪工作及其他同事,最後堅持了一年三個月停止餵母乳,她感謝TVB新聞部上上下下對她的包容。「由我放產假到餵母乳,我已經影響咗同事成年,我要定時泵奶,公司為咗我間咗間泵奶房畀我,如果有assignment撞咗我泵奶時間,上頭就唔使我去,但有啲醫療古仔我要自己跟番,有時都撞咗泵奶時間,要去附近商場或酒店嘅育嬰室解決。」

孖仔孖心肝 前主播鄭萃雯︰追雙倍奶最辛苦!13
Karen最喜歡兩個小朋友一左一右睡在她的膊頭上,感覺最溫暖。

孖仔帶來的快樂不止雙倍

由懷孕、出世、到照顧一對孖仔,Karen比其他父母付出雙倍辛勞,但得到的快樂卻不止雙倍。「佢哋成長路上有兄弟作伴係好溫馨,佢哋有時好自動自覺錫吓、氹吓對方,或者跌倒會想扶起對方,仲有佢哋識得分享食物。我最鍾意見到佢哋瞓覺個樣,真係好想啜埋去,仲有兩個畀我啜喎,我覺得真係好窩心、好溫馨。」

孖仔孖心肝 前主播鄭萃雯︰追雙倍奶最辛苦!14
看著小朋友睡覺的樣子,Karen就好想啜下去,「仲有兩個畀我啜喎!」

早已計劃生兩個的Karen,一次過滿足了生兩個的願望,Karen決定提早封肚,同時間湊兩個已花去她大量精力。「如果我再生小朋友,我諗我已經冇體能、顧唔掂,因為佢兩個係男仔好活躍,我好似看牛仔咁看住佢哋。」

孖仔孖心肝 前主播鄭萃雯︰追雙倍奶最辛苦!15
Karen最不捨TVB新聞部一眾同事,臨走前兩天已哭個不停,連講再見也難於啟齒。

難捨TVB新聞部11年情

卓言和卓喬現已2歲大,Karen為他們的學業鋪路時,發現自己在TVB的工時與孩子的上學時間好難夾,希望星期六日可以陪伴孩子,她思前想後決定以孩子為先,結束與TVB新聞部的11年賓主關係。由實習時期做起的Karen,一直未有轉職,與新聞部上上下下的感情深厚,對於離開萬分不捨。「入面啲人真係好好,我臨走前兩日分別有兩場farewell,包括出外景嘅攝影師、車長、工程人員一齊同我食飯,我喊到豬頭咁樣,佢哋由細睇到我大,我做錯事佢哋又好包容我,當我要親口同佢哋講拜拜時,真係好唔捨得!」

孖仔孖心肝 前主播鄭萃雯︰追雙倍奶最辛苦!16
Karen話一次過生兩個夠晒數,已經沒有精力應付多一個初生BB。

最難忘的採訪

專責醫療新聞的Karen談起難忘的採訪,最打動她是一些人性化的故事,當中一個有精神問題的16、7歲年青人的故事,最令她動容。「呢個年青人原本係完全唔想見人、收埋自己,我睇住佢透過攝影、搵人幫助嘅方法慢慢走出陰影,最感動係我睇住佢從有病、慢慢好番,到依家佢人生態度好積極。由佢中學到大學畢業我哋都有聯絡,佢搵到工又即刻話我聽,呢份人情味係呢份工畀我最大嘅得著。」

孖仔孖心肝 前主播鄭萃雯︰追雙倍奶最辛苦!17
兩個孖寶最喜歡玩車車,拍攝當日一見到車車就玩個不停。

轉職醫療公關工作

一個階段的完結,亦等於另一階段的開始。Karen現轉職醫療公關公司的顧問工作,並開設了新facebook專頁「傾醫啲」,擔任醫療主播訪問醫生、護理人員及名人,與讀者一齊討論健康話題。Karen可以繼續在自己熟悉的範疇工作,時間亦彈性,有更多時間陪伴一對孖寶,能夠平衡好工作與家庭,「呢度我已經settle咗,嚟緊要專心搞孖仔嘅學業喇!」

下一頁:思考型爸爸森美 從旁觀角度看子女

下一頁:DJ 朱薰 推崇「羅家英」教學法

更多精選內容