Bob嫂發長文感謝老公 捱眼瞓照顧囝囝

Bob嫂發長文感謝老公 捱眼瞓照顧囝囝

林盛斌(Bob)和太太(黃乙頤)結婚十年,婚後接連報喜,早前Bob嫂又誕下囝囝Jaye,一家六口幸福又熱鬧。現在大多數家庭結婚生育一個起兩個止,絕對難以想像一家有六口,Bob嫂日日「一打四」,佢日常的廿四小時到底怎麼過呢。

撰文:Sunday Kiss

相片:Pearl Wong-L (黃乙頤)Bob Lam 林盛斌 @Facebook

Bob嫂發文感謝老公照顧囝囝

近日,Bob嫂喺社交網站上有感而發,寫長文感謝老公工作再忙,即使凌晨收工都捱眼瞓照顧囝囝。

Bob嫂話:「好多人都話我好勁呀!一個湊四個,阿Bob一定幫唔到你啦!佢咁忙!都係架!係幾勁架!不過我唔會話阿Bob冇幫到我嘅,因為佢係有得幫就儘量幫!話說…有一晚凌晨三四點,當佢啱啱完成工作返屋企撻落床之際,二家姐同三家姐不約而同叫媽咪。咁我當然去睇下佢地啦!點知跟住聽到四少喊,喊左幾聲就冇左喇!到我搞掂曬返房時,就睇到呢個畫面,其實我好多謝佢。佢可以唔理,或者叫工人嚟(我啲小朋友夜晚自己湊,工人可以完全休息)佢大條道理繼續瞓。但佢冇,佢選擇幫手抱下BB。所以我返房接手時,即刻多謝佢!佢即刻帶住返去瞓!」其實,阿Bob一向愛錫子女,佢曾經分享過每天清早看到她們就是他工作的動力。

阿Bob凌晨收工回家仍幫忙抱囝囝瞓,呢個畫面令Bob嫂十分感動。

Bob嫂「一打四」日常

六人的大家庭,Bob嫂日日「一打四」,佢日常廿四小時到底是怎麼過的?

姐姐剪腳甲,兩個妹在旁安慰。
四個女人圍觀細佬,阿Bob就負責影相。

Bob嫂同老公結婚十年,佢亦總結咗一個夫妻相處小心得俾大家:「就算幾老夫老妻,都要欣賞對方,同埋要講多謝!唔好老馮呀!」

為囝囝用環保尿片

Bob嫂日前喺社交網站分享細仔(Jaye)終於開始轉身喇!眼利嘅網民就留意到點解Jaye條尿片咁得意嘅?原來Bob嫂為囝囝穿上環保尿褲!

根據消委會報告指出,於2015年,大約有59,900個BB出世,如果以每位小BB每日用六塊紙尿片保守估計,一年就已經消耗多達二千多萬塊紙尿片。有見及此,Bob嫂為囝囝用環保尿片,希望為環保出一分力!

Bob嫂寫道:「Jaye Jaye 終於都開始轉身喇!雖然用尿布褲令個pat pat大個咗,但都無阻Jaye Jaye想轉身嘅心,其實用尿布褲係有佢嘅不便(因為要洗,不過可以用洗衣機),係可以克服嘅!就正正因為佢可以重用,令我唔需要擔心對環境產生負擔,為小朋友揹上不必要嘅業!*以上只係我自己嘅想法,都要配合自己嘅情況喇!」果然係環保媽媽!

為寶寶忍痛疏乳

育有四個寶貝仔女的Bob和Bob嫂,一直都堅持為佢哋準備最好的。早前,Bob嫂就跟大家分享塞奶的困擾,更為了寶寶忍痛疏乳,令人不禁講句:「媽媽真偉大!」Bob嫂形容餵哺母乳之路荆棘滿途,因為不論有奶冇奶都一樣麻煩。雖然無奶可以嘗試通乳,有奶而容易塞奶的也可以疏乳,但往往需要忍受不少痛楚。Bob嫂指自己是一名「富媽」,意思是有充足母乳的媽媽,所以她一直面對著塞奶的困擾。前兩胎餵哺母乳,她都會每隔兩至三個月就因為塞奶而發燒,但因為母乳媽媽不宜胡亂吃藥,所以她都唯有「死頂」。

𠴱種痛,好攞命!

最近生了第四胎,Bob嫂又再面臨塞乳的問題。這次她嘗試進行通乳,希望可以解決塞奶發燒的困擾。但不要看疏乳只是按摩,其實有經驗的媽媽就知道塞奶時按摩的痛楚絕對不能看輕!Bob嫂直言:「𠴱種痛,好攞命!」。她指疏奶時催乳師叫她「忍吓」,但她的內心其實想大喊:「忍忍忍!我唔想忍喇!」,陀B時要忍痛打針,生BB時又要忍痛,想不到生完仍要忍痛疏乳。

但為了孩子的健康,Bob嫂還是願意忍受痛楚,讓孩子享受最好的食物,得到最多的營養。不少人都留言支持Bob嫂,更大讚母乳媽媽十分偉大。也有其他母乳媽媽感同身受,留言指:「塞奶時嘅痛絕對比生仔時更痛!」,與Bob嫂共勉之。

三位姐姐行為倒退

除咗生理上的問題,細仔的出世,原來都對三位姐姐的心理有影響。自從細囝Jaye出生,各人的焦點都集中在細囝身上,三位姐姐自然感覺被忽略,開始做出各種反常行為以獲關注。Pearl舉例說囡囡本來可以自行如廁、吃飯,但現在卻要媽媽陪伴。

三妹更會在媽媽餵奶時吵著要陪瞓覺,撒嬌不成竟然還在旁邊擺出一副瞓覺「冧樣」,十分鬼馬!

Pearl特別關心囡囡起伏不定的情緒。她認為「行為倒退」跟「妒忌」不同,因為她認為三位姐姐大部份時間都十分愛錫弟妹,每天都要錫錫,只是當三位姐姐感到明顯被忽略,她們就會突然行為倒退,甚至情緒暴發,達至連媽媽也不能處理的地步。

Pearl指三位姐姐也有不同程度的行為倒退,甚至連九歲的大家姐也無一倖免。只是兩位大家姐的行為並不明顯,需要細心一點才能發現。媽媽表示大家姐的行為倒退比較容易處理,只要重新表現關注即可;但只有三歲的三妹就比較難處理了!

三妹現正處於自主期,比較人細鬼大,也開始有點小脾氣。Pearl指出行為倒退可能是小朋友天生的防禦機制,以反常行為作為爸爸媽媽的警號,以保護孩子的弱小心靈。

下頁:思考型爸爸森美 從旁觀角度看子女

更多精選內容