BB安睡小貼士 改善睡眠模式與睡前儀式

BB安睡小貼士 改善睡眠模式與睡前儀式

小JM轉眼間已經由BB變成幼兒啦,唯一未變嘅就係臨瞓要奶咀「陪瞓」。小JM依然會半夜會突然醒左要再搵返個奶咀,之後安慰自己再返,但如果咁啱奶咀並唔係手邊觸及得到嘅範圍內嘅話,少不免都係會「求救」,甚至會坐起身喊住搵。小JM仲係小B個陣就會半夜都要奶奶,但而家大左,小JM需要嘅就會係奶咀,「奶咀」亦隨之成為左小JM既嘅安睡必須品之一。為左拆解小JM睡眠問題嘅呢一個「謎」,我呢位新手媽咪亦早已上網搵左啲資料及請教其他媽媽去了解一下,希望可以幫小JM改善一下睡眠質素。

撰文、圖片: 傑。斯與晴|編輯:YIU

 

BB睡眠模式

其實每位小朋友都會有唔同嘅睡眠模式,而且睡眠模式仲會隨著小朋友長大而有所改變。正如我地大人一樣,會掛住玩而夜瞓。原來小朋友嘅睡眠模式係會跟著成長期而有所轉變,仲明顯地睇得出係會越瞓越少添架!為左令小B們可以瞓好啲,爸媽們都用盡唔少心力同腦力,務求令小B可以早啲瞓。

其實爸媽可以從小慢慢為小B培養一個特定睡眠時間及睡前儀式,令小B知道做齊晒睡前儀式後就係睡眠時間。日子有功之後,小B就會明白完成睡前儀式就要乖乖瞓覺架啦!

等我分享一下小JM由BB至幼兒期睡眠模式啦!

初生 ~三個月

。 一日大約瞓15個鐘左右;但每次可能只會瞓 2 至 3個鐘

。 每日瞓覺次數不等,因為BB仲係適應期,嘗試適應係母體外環境,

所以小BB瞓覺係不分晝夜架!

六個月

。 每日睡眠時間會少於15個鐘,而且睡眠時間已經明顯比以前長,可以瞓到3至4個鐘

。 呢個時期BB已經開始慢慢適應母體外環境,而且仲開始慢慢會 On Schedule 咁去食同瞓添

。 BB已經開始習慣 「夜晚要瞓」呢個定律,所以夜晚睡眠時間明顯比日頭長

六個月 以上

。 每日依然可以瞓上十幾個鐘,每次約 3 至 4 小時左右

。 BB開始識自己調節睡眠時間

小提示:

小B已經開始意識到日與夜嘅存在,可以試著俾小B係日頭瞓少啲,玩多啲放下電,等小B夜晚可以更加容易啲入睡。

 

一歲 以上

。 已經由小B成長為幼兒,晚上睡眠時間約為10 至 12小時

。 因為小B已長大,會識自己調節睡眠時間,所以日頭可能只會小睡兩次,每次約一到兩小時左右。

。 需要為小B設定一個睡眠時間及睡前儀式

。 當睡前儀式完成後就要同小B講晚安,熄燈/調暗

 

小提示:

當小B踏入幼兒期,健康院姑娘及醫生都會建議爸媽唔再俾小B用奶樽飲奶,以免養成壞習慣,而且有機會更易夜半醒來,如果唔好好戒掉壞習慣,以後要改就更難了。

 

一歲半 以上

。 越接近Trouble Two,小B就會越難專心入睡(長輩會俗稱為「心野」)

。 小B會嘗試調節自己嘅睡眠時間,有時日間只會小睡一次,時間約1小時左右。

未知.gif

小提示:

切記臨瞓前同小B玩得太興奮,以致小B們難以入睡。臨瞓前可以同小B「傾計」、講Bed Time Story,但不宜做一啲過份激烈玩意,因為之後要小B將興奮心情收拾好去睡覺係一件好難嘅事!

未知.gif

B唔夠瞓都有影響?

小B唔夠瞓有無影響?我地大人唔夠瞓個人都會忟忟憎憎,好易嬲係咪先?

其實小B都一樣有情緒,一樣會好似我地大人咁因為唔夠瞓太攰而會比較容易造成情緒波動,例如會比較容易哭鬧、忟憎同易扭計一啲。而健康院醫生同姑娘亦都會提倡要小B們早睡,因為無足夠休息及睡眠時間會影響到BB食慾、新陳代謝同吸收,係直接影響到BB健康成長添!而且睡眠不足亦都會間接影響到學習。

JM睡眠儀式」分享

由小JM 初生到而家都試過好多種唔同嘅方法,而且隨著小JM越來越大之後,有啲方法亦好快變得 “唔Work” ,所以當爸媽嘅就只好不停的變更方法,務求令小B快快安穩入睡。

未知.gif

BB時期嘅「睡眠儀式」

1.)臨瞓前一個鐘沖涼

2.)沖涼後按摩

3.)食奶及抹口

4.)用包被包住以增加安全

5)聽住「白嘈音」來瞓

6.)較暗啲燈光

 

個人認為將燈光較暗係好重要,因為要令BB知道日夜之分,天黑就要乖乖瞓覺

幼兒時期「睡前儀式」

1.)臨瞓前一個鐘沖涼

2.)拎埋陪瞓奶咀

3.)刷牙

4.)入睡房準備開始Bed Time Story

5.)Kiss Good Night

6.)熄燈瞓

<

自從小JM懂事後,我地已經教會小JM沖完涼後玩多陣就刷牙仔,再去自己拎奶咀入房瞓,所以每當小JM知道要拎奶咀就知道要入房瞓,有時見到未開房門仲反而會叫我地:「開門、開門,BB噯噯豬!」

通常入到房我都會問小JM要唔要一齊睇書講故事,我買左幾套細細本嘅小小書放左係床頭附近,每晚睇唔同嘅故事,一齊學習新嘅故事同事物。睇完故事我地就會準備瞓覺。臨瞓前會講「Good Night」再來多個Good night Kiss。

之後就會正式熄燈瞓。當然,小JM都會有唔合作時,但我地就一於好少理,會同小JM講: 爸爸媽媽噯噯豬啦,唔玩啦。晚安。通常講完後我地兩個都會「扮瞓」,小JM見到我地都瞓晒之後自己都會好乖乖去瞓。睡前儀式係小B們學習成長嘅重要一環,可以令小B從小培養出早睡早起嘅好習慣。更有助令小B們容易入睡,而且睡前嘅Bed Time Story 時間仲有助促進親子互動同感情添。

你地小B又有無一套特有嘅睡眠模式呢?又會唔會同小JM一樣有「睡前儀式」來幫助入睡?不如一齊來分享一下!

如有任何查詢/合作,歡迎聯絡我同小JM參與產品試用或者各樣活動
媽咪嘅Email:sleepyceci@hotmail.com
小JM嘅Facebook Page:傑。斯與晴(Jolie Babe。小JMの成長印記)

更多精選內容