從「衞生防護中心」一篇文章 說到幼稚園選校

從「衞生防護中心」一篇文章 說到幼稚園選校

近日各報章不約而同引用衞生防護中心在網上「非傳染病直擊」一篇名叫「活躍兒童的學業成績更佳」的文章。家長對文章議論紛紛,以下為兩位意見不同的家長,針對該文章內容的討論,因為討論談到幼稚園選校,想大家會有興趣一讀,故記錄下來。

撰文:趙榮德

相片:新傳媒資料室

甲:家長甲 乙:家長乙 趙:本人

兒童應多玩多運動?

趙:各位家長,對衞生防護中心(衞防)那篇主張兒童及青少年每天進行足夠的體能活動,即係玩多啲,運動多啲,有何意見?

甲:我贊成,我上網睇過篇文章,我完全同意文章嘅講法,因為文章講得有根有據,結論是來自「美國一項包括近12,000名青少年的研究發現,活躍的青少年於數學或英文科獲得「A 」的比率,較不活躍的同輩高20%。」

乙:我冇上網睇過,我只喺報紙知道有呢個研究,但研究只講青少年,冇講兒童,此其一。第二點係,古語有云:「勤有功、戲無益」,運動是戲之一種,點會提高到兒童嘅成績?你用咗啲時間去打波、去跑步,成績點會好咗?你話嘞!

甲:表面上係冇關係,但實際上係有嘅:因為正如「衞防」文章講,運動和體能活動可直接或間接透過生活、認知或心理三方面,給兒童或青少年帶來即時和長遠好處。」在生理、認知方面,遊戲或運動會促進神經元的發展和神經突觸的可塑性(即係會知多啲,記得多啲),呢個功能變化會提高學習成果及學業成績。在心理方面,於體能活動後,孩子會有信心及更專注課堂上的學習。

幼稚園選校
兒童及青少年除了學習,是否應每天進行足夠的體能活動,運動多點?

運動抑或催谷對學業有用?

乙:玩得多會心散,運動得多會疲累!

甲:你講得啱,玩得多,運動得多係唔好嘅,但研究表示「進行其發展階段的體能,即係適可而止的遊戲同運動就會給孩子提升更健全的頭腦,亦會為佢哋嘅學業帶來額外效益。

乙:我始終係相信叫孩子讀多啲,做多啲功課,勤力操練,成績才有保證。一日到晚叫佢玩,讀嗰啲Happy School,點會上到好嘅小學?

趙:話題似乎由「運動對學業有益」轉為「催谷對升學有用」,同Happy School未必好喎,對不對?

幼稚園選校
現時的幼稚園除了重視知識學習,更著重小朋友多元發展。

甲:冇問題,佢認為催谷一定對孩子有用,我唔贊成,因為唔係個個孩子的資質同性格是可以催谷的,我就接觸到兩個不成功催谷的個案。第一個係個女被媽媽送進一間一、 三、五要默書嘅勁催谷的幼稚園,而個女怕默書,因次次「紅雞蛋」,結果驚到唔肯返學要轉校。第二個是惡媽媽由小三「強迫」個女彈鋼琴,由第一級(小三)彈到第八級(中五),嗰個媽媽再強迫個女報「演奏級」,但個女憤然對媽媽話:「媽,我幫你彈咗八年琴啦,我憎死佢,現在我讀中五,我大個喇!從今日起,我封琴唔再彈!」以後個女再不彈琴。以上證明催谷冇用,我主張選讀書時讀書,遊戲時遊戲的Happy School,即係以兒童為中心的幼稚園,大都是免費的,因為呢種幼稚園均衡發展,孩子會健康啲,叻啲。

乙:咁將來點入到好小學呀?

趙:平衡發展,寓遊戲於學習,有助孩子找到自己的興趣,如果家長與學校攜手鼓勵子女閱讀,發展佢哋對語文及事物的興趣,對將來小學升學面試有一定幫助。結論是「勤有功,戲亦有益」;均衡發展,才會得到好成績!

幼稚園選校
相對過分催谷,影響小朋友情緒,「勤有功,戲亦有益」,均衡發展才是對小朋友最好。
幼稚園選校
趙榮德

趙榮德

前喇沙書院副校長,現任社工註冊部 紀律委員會會員、香港輔導教師協會榮譽顧 問。曾任教育局家庭與學校事宜委員會副主 席,熟悉香港教育及升學制度,同時為香港 大學專業進修學院之客席講師,亦為升學指南作家,現有著作多達廿二本。

下一頁︰啟思幼稚園幼兒園(九龍塘正校) 啟發潛能

啟思幼稚園幼兒園(九龍塘正校)

下一頁︰聖嘉勒小學暨幼稚園 自主設計一個月課程

聖嘉勒小學幼稚園 讓幼兒自主設計一個月課程

更多精選內容