【親子共讀】菜姨姨推介 適合0-6歲書籍   點樣揀點樣講故事|布書+膠書+硬皮書+知識書

【親子共讀】菜姨姨推介 適合0-6歲書籍 點樣揀點樣講故事|布書+膠書+硬皮書+知識書

親子共讀真的很重要,要讓小朋友愛上閱讀,家長先要為小朋友選擇合適的書本,原來除咗書嘅內容之外,書本的質料都會令小朋友引起小朋友的興趣。親子共讀專家菜姨姨(蔡淑玲)推介各年齡層小朋友適合共讀嘅書籍類型,希望將親子共讀嘅功用發揮得最好。

撰文:Kamen|攝影:Cliff

適合0-6歲親子共讀書籍

菜姨姨認為應該因應小朋友嘅年齡去選擇書籍,「如果小朋友只有幾個月大,其實未睇得清楚嘢,所以選擇多字的書籍未必好適合,到大個啲先開始能夠吸收圖片同文字,所以家長應該因應小朋友的年齡選擇合適嘅書本進行親子共讀,將親子共讀嘅功用發揮得最好。」

親子共讀
菜姨姨第一代故事媽媽,積極推廣兒童繪本及親子共讀。

親子共讀

適合0-9個月親子共讀書籍:布書

對於0-9個月大的小朋友,菜姨姨建議父母可以購買布書同幼兒進行親子共讀。「BB仔啱啱出世,眼球發育未成熟,就好似大近視咁矇矇矓矓咁,淨係睇到黑白,漸漸眼球發展先至睇到色彩。」菜姨姨拎起這本《海洋動物》的布書,一拎上手就發出「擦擦」嘅聲音,「呢本書嘅特點係會發出聲音,書本有鏡子,BB可以睇到自己嘅樣,另外因為幼兒嘅眼球發展未成熟,布書以黑、白、紅做主色,刺激BB眼球,最緊要係布書唔會整親BB,所以比較適合幼兒睇。」

親子共讀
布書嘅特點係拎上手有「擦擦」嘅聲音,令BB感受到圖書嘅感覺。
親子共讀
布書以黑、白、紅做主色。

適合6個月-12個月親子共讀書籍:膠書

當BB長大到半歲大左右,開始鍾意「揸」住唔同嘅物件,父母可以比啲膠書BB「揸」。菜姨姨拎起《Freddy the Frog》:「依種膠書即使跌落地下亦唔會爛,而且防水,BB沖涼嘅時候都可以睇,膠書嘅色彩比較柔和,適合眼球開始發展嘅小朋友。」菜姨姨提醒家長唔需要指住啲字比小朋友睇:「好多家長好緊張問:『係唔係要指住啲字呀?』你想像下一個BB點會識睇字,佢哋睇嘅係圖畫多,文字對於BB嚟講都只係圖像。」

親子共讀
膠書即使跌落地下亦唔會爛,而且防水,BB沖涼嘅時候都可以睇。
親子共讀
膠書嘅色彩比較柔和。

適合1歲-2歲親子共讀書籍:硬皮書

1歲半左右嘅小朋友可以學始學習書本上的知識,菜姨姨建議家長可以幫佢哋選擇同日常生活有關的硬皮書。「書本以日常生活、身邊發生嘅事為主,父母共讀時可以將重點放係圖片,等小朋友進入佢哋認識嘅世界,另外家長不妨選擇圓角的硬皮書,咁小朋友就唔會睇書期間受傷。」

親子共讀
有關便便的書籍可以吸引小朋友。
親子共讀
父母共讀時可以將重點放係圖片,等小朋友進入佢哋認識嘅世界。

適合2歲-3歲親子共讀書籍:圖畫書

2歲半左右係小朋友嘅反叛期,小朋希望有返自己嘅控制權。「每一個小朋友嘅成長到有唔同嘅階段,而唔同嘅階段小朋友係需要時間去適應。2歲至3歲嘅小朋友最鐘意父母大聲為自己講故事、唱兒歌,當小朋友願意定嘅時候就需要留意,當佢好興奮要玩,父母唔可以同佢哋爭書。」因此依個階段父母可以揀圖畫書作為共讀嘅書籍。圖畫書同日常生活有關,通常用擬人法嚟講故事。菜姨姨用《菜園愛書》作例子,指出親子共讀嘅過程可以增加挑戰性,可以用問問題嘅方式吸引小朋友,培養小朋友嘅觀察力同注意力。父母唔可以心急,要一步一步引導小朋友。

親子共讀
親子共讀嘅過程可以增加挑戰性,可以用問問題嘅方式吸引小朋友,培養小朋友嘅觀察力同注意力.
親子共讀
書內有不同的蔬菜,全部掛上笑臉。

親子共讀

適合5歲-6歲親子共讀書籍:知識書

「5至6歲嘅小朋友最鐘意講「屎、尿、屁」,每一日最鍾意就係睇自己嘅便便。」菜姨姨建議同5至6歲嘅小朋友進行親子共讀時,可以選擇《番薯變成了便便?》依一類知識性嘅書,透過圖畫同小朋友講解人體腸道嘅運作,小朋友唔單止興趣大增,仲能夠吸收知識。

親子共讀

更多精選內容