徐淑敏要追兩個仔

徐淑敏要追兩個仔

被譽為最美人妻之一的徐淑敏(Suki),2009年下嫁商人黃浩後密密造人,先後誕下三位千金,大女心瑤(Vianna)5歲、二女心柔(Renee)3歲、細女沁誼(Isabella)去年出世,現已七個月大。不過三個女都未心足,Suki希望半年後再努力,為老公追番個仔,「我老公想,我就冇所謂,可以配合佢,之後會參考吓啲生仔秘方。」豈不是當你生仔機器?「唔係,佢都好錫我嘅,好多人以為我生咁多個好辛苦,我真係一啲都唔辛苦,佢話可以嘅生多兩個啦。」

婚後真正人生開始

30歲就成了三女之母,Suki覺得現在才是人生真正開始,「老公一直好支持我,鼓勵我完成細個嘅夢想,以前屋企好窮,想學呢樣、做嗰樣都唔得,經過娛樂圈洗禮,體驗到世界好多之後,返到家庭為本,終於知道呢個係我想要嘅生活。以前冇刻意諗過組織家庭,但原來早已潛移默化,我爹哋媽咪好努力為頭家工作,煮好多美食氹我同家姐開心,呢啲生活點滴早已感染我,令我個人變得好family。」

Suki正逐一實現夢想,她正學豎琴實現音樂夢;想做留學生,今個月就到外國留學一兩個月體驗;想做生意,她正積極發展美容生意,更即將涉足網上時裝事業,當中會有幫人扮靚服務。「我計劃嘅嘢一一實現到,對人生係好大鼓舞!」

s2
Suki覺得老公好聰明,計數叻,錢銀應使則使,但對女兒供書教學就在所不計,最重要她們得到最合適的教育。

s3

Isabella的百日宴上,請了畫家駐場為三個女畫畫,Isabella的畫像肥嘟嘟好搞笑。

黃浩超級精明家庭男
做職業女性不容易,全賴有個大家庭,長輩可以幫手湊女,令Suki可以專心尋夢,「好彩生活喺個大家庭,有老公、奶奶、姑奶、我媽媽同工人姐姐幫手,成個家充滿愛與關懷。」尤其老公黃浩最幫得手,她甜笑大讚老公是超級family man,「我一向有嗰句講嗰句,好鍾意讚人,我成日同佢講『你真係一個好仔、好女婿、好老公同好爸爸。』佢好鍾意令身邊嘅人開心,尤其係屋企人、佢同事。」

兩人生活無憂,但黃浩為人精打細算,格價勁過師奶,Suki笑說:「佢要用最少錢得到最大享受,係絕對值得學習,佢真係慳到好多錢,好似成家去L.A.旅行,可以慳到八萬蚊,我哋會先飛台灣再去其他國家,因為國泰係本地膽,張機票要萬幾蚊,但由台灣飛去,張機票只係三千幾,因為有長榮同其他航空公司競爭,佢又會計mileage,成日有得upgrade,住酒店又有免費upgrade同送房,因為係申請信用卡禮品,佢同銀行關係打得好好。」

貪靚女立志選美
三個女細細個與爸爸餅印一樣,但遺傳了媽媽的貪靚基因,大女Vianna和二女Renee長大後已經「冇咁似爸爸」,仲識學媽媽扮靚,Suki笑稱兩個女封她為偶像,「佢兩個好貪靚,尤其是大嗰個,佢話媽咪,你平時好靚呀,我第時大個都要同媽咪一齊做嘢,要參加選美,所有嘢要以靚行先。」

Suki絕不反對囡囡選美,自己亦因選美才開竅,學到好多知識及人際關係,「各種扮靚技巧、溝通技巧、見識大場面,嗰一刻覺得好辛苦,但呢個絕對係人生一個highlight。」選美夠17歲就可以參加,17歲最多中學畢業,Suki不強求囡囡要先完成大學,「有時條命生成, 想改都改唔到,讀完書梗係好啦,但timing嘅嘢好難講。」

s4
Suki生三個後身形甚fit,皮膚依然白滑,她推介用蜂蜜、牛奶和生果DIY面膜,每日或隔日敷,一星期就見效!但她沒做運動收身,只靠食少餐,「我依家夜晚讀緊個鑽石課程,索性唔食晚餐,一讀書就瘦晒。」

搽指甲扮靚親子樂
Vianna絕對有潛質選美,年僅5歲已經對鏡頭好敏感,識扭動擺甫士。她最喜歡粉紅色,對自己的打扮好有主見,拍攝當日她很喜歡白色小手袋,堅持不肯放下,但只要講句「咁樣唔靚」,她就會乖乖放下,要跟媽媽一樣扮到最上鏡!

妹妹Renee都好貪靚, 但選擇比較另類,「家姐會搽粉紅色指甲油,閃令令;妹妹就鍾意搽綠色、藍色, 佢叫我幫佢搽墨綠色, 我問佢真係覺得好靚?佢話係!好靚!佢係另類啲,但我唔會阻止佢,女仔都唔一定要搽粉紅色嘅。」母女扮靚都可以玩得開心,去旅行Suki愛做spa整指甲,囡囡也嚷着要一齊做,「我會俾佢哋喺隔籬做指甲,但就冇兒童專用指甲油,照俾佢哋搽大人嗰啲。」平日她會盡量用兒童指甲油,沒有太多化學成分,水都抹得甩,亦不會攻鼻,「有啲可以成塊搣出嚟,可以去賣童裝嘅地方睇吓。」

s5
一家人計劃去日本放暑假兩個月,Suki與囡囡一齊學日文,老公就去玩,「老公都識日文,我哋全家都識㗎!」

開發右腦展創意
扮靚都講天分,Suki慨嘆自小似口舊飯,直至選美才發現自己對美感有天分,她見到Vianna那麼喜歡扮靚,想盡早發展她的天分,「睇到佢好有美感,畫畫好靚,所以我就送佢去學畫畫。」Suki揀興趣班好嚴謹,每次都要親自試堂,「師資好緊要,每個班我都會上堂先,好似學豎琴、畫畫、日文,我覺得好先會俾小朋友學,如果老師唔好,會直接影響小朋友對嗰樣興趣嘅睇法,如果老師太惡,都因為學得唔開心,而糟蹋天分。」

Suki好緊貼兩個女的學習情況,為了發揮其藝術天分,安排了她們入讀右思維幼稚園,playgroup已經開始讀,課程主要利用flash card圖像去開發右腦,而右腦主宰創意、藝術、音樂等潛能,縱使每日山長水遠由大埔到鴨脷洲返學,都在所不計,最重要她們讀得好開心,沒學返她們會哭。

s6
Vianna愈大愈靚,開始識打扮,視媽媽Suki為「靚女偶像」,她知道媽媽是選美出身後,都話大個要選美,拎個冠軍回來!

忙學六文七語
原本她與老公有共識小學要揀國際學校,不想因功課壓力而破壞親子關係,但讀了兩年幼稚園後,發覺中文程度的確稍遜,為此Suki好煩惱,「我老公話點解人哋個小朋友識咁多字,點解你唔識嘅?學校有教普通話,但識講唔識睇,依家要佢學番多啲文字。」Suki照讓囡囡in了兩間國際學校,試一試水溫,不過失敗而回,「我覺得佢表現正常,但都唔得,可能要多啲技巧,一入去要同老師講早晨,冇叫你郁就唔好郁,要專心望住老師。唉,我哋失策咗,依家搵咗個老師教面試技巧,補埋中英文,之後都想再試吓新加坡國際學校同弘立書院,呢兩間都着重中英文,全英文學校就唔考慮喇。」

Suki希望趁6歲前語言黃金期,打好中英文底,再學多國語言,兩個女有讀日文,早陣子兩夫婦陪兩個女sit堂學日文,驚覺她們早已學識好多!「日文老師同佢哋全日文對答,問乜都識答。」原來不只三文四語,是六文七語!「仲有印尼文,我奶奶係印尼華僑;西班牙文就學校教嘅;仲有法文,保鑣哥哥講法文嘅,不過最有興趣都係普通話。」依家小朋友真係忙過大人!

s7
Vianna入讀的國際幼稚園以英普教學,中文字認識不多,Suki急急為女兒惡補中文,「廣東話識聽識講,普通話識講,佢都會同我哋講普通話,但唔係好識睇中文。」

s8

童心繪畫
Suki與Vianna應邀參加「香港電訊eye畫出繽Fun世界」創意藝術互動工作坊,大會主題「童心創未來」,鼓勵孩子發揮藝術潛能,並宣揚共融精神,培育小朋友成為對社會有貢獻人士。活動另設繪畫比賽,籌得善款將撥捐以兒童共融為使命的「親切」(TREATS)。Suki嘲笑自己小時候「似嚿飯」,沒那麼多活動發揮所長,所以想女兒盡早發掘潛能,尤其是她最愛的畫畫,片段中她分享了女兒畫畫的趣事,如畫全家福經常沒有爸爸,變成全女班,究竟點解呢?想知就睇–> 呢度

 

●撰文:Ling ●攝影:Paul Choi(部分相片由受訪者提供)
●化妝:Soie ●髮型:Green [email protected] Salon
●場地:馬鞍山循道衛理小學

更多精選內容