戀戀沖繩 星夢郵輪親子之旅

戀戀沖繩 星夢郵輪親子之旅

一家大細去沖繩旅行,無論想輕鬆寫意睇風景嘅大人,抑或想試勻刺激新奇玩意嘅小朋友,坐郵輪就可以一次過滿足晒!

戀戀沖繩 星夢郵輪親子之旅

星夢郵輪有好多玩樂設施,Keicy、Kassy 都鍾意游水,剩係喺泳池都玩咗半日喇!加埋其他動態、靜態活動,自由參加,一家人全程舒舒服服唔使趕餐懵,喺沖繩可以親親大自然之餘,小朋友更吸收好多新嘅事物同埋文化㖭^^

郵輪去到沖繩,當然要上岸遊覽名勝啦!那霸、宮古島風景超靚,我亦都預先報名參加 local tour,跟住導遊周圍去。

「博愛號半潛水式水中觀光船」 3 姊弟最愛

佢睇落似普通嘅渡輪,不過原來有一條隧道行樓梯落去下層嘅玻璃船艙,非常有特色!因為窗戶比較大,視角較多,加上艘船會隨住海浪擺盪,大家都好似潛咗入水底咁樣!

3 姊弟好鍾意小動物,所以當船長帶佢哋搵大海龜嘅時候,超興奮呀!
除咗見到海龜,仲見到珊瑚、小丑魚呀!


海水好清澈、好乾淨,提醒 3 姊弟要愛護環境,先可以欣賞到咁美麗嘅海洋。

溫馨提示:
1. 易暈船嘅朋友,請食定暈船藥。
2. 下層玻璃船座椅好矮,老人家起身住坐低可能有啲吃力。

暢遊上野德國文化村

另一個難忘嘅行程,係上野德國文化村。

呢個係主題公園,因為島上居民喺明治時代(1868~1912)曾經向落難嘅德國船員施以援手,德國為表感謝,所以喺呢度仿照 Marksburg Castle 建立博愛紀念館,可以感受一下昔日氣氛。

附近個公園有瀡滑梯以及攀爬設施,3 姊弟都玩得好開心^^

海天一色 來間大橋

無論咩角度望向大橋,都係「明信片」級數,而且海風吹吹吓,好舒服,夠晒治癒,真係咩煩惱都冇晒呀!

呢條全長 1690 米嘅來間大橋,係連接宮古島同埋來間島,喺橋上面,可以眺望宮古島碧海藍天嘅優美景色。

 

嚟到日本,當然要 shopping 吓啦!
沖繩嘅超市、藥妝店好好行,有好多嘢食、好多嘢買,Keicy、Kassy 行到唔捨得走呀哈哈!

溫馨提示:
呢次旅程,雖然春天出發,天氣都開始回暖,但係郵輪長期喺海中心,氣溫比較低,所以家長們可以為小朋友帶定少少保暖衣物;另外,如果屋企人易暈浪,可以帶定少少藥物傍身。

 

FB: KeicyKK

更多精選內容