楊張新悅宣布第四胎性別

楊張新悅宣布第四胎性別

早前宣佈懷第四胎的楊張新悅(Nicola)今日出席活動,透露現時懷孕7個月,預產期係7月,並宣佈BB性別。

撰文:Sunday Kiss|圖片來源:楊張新悅FB

楊張新悅宣布第四胎性別

本已育有三個囡囡的楊張新悅(Nicola)宣布今胎佗B女。Nicola表示上個月驗血,才得知BB性別,又話之前相士話過佢老公前世有好多女朋友,所以佢一早估到BB性別,嚟緊屋企就四條Queen啦!不過Nicola表示本身都無打算再懷孕,亦無諗過追仔,所以無失望,仲話可以唔使再學點湊男仔,都係好事!

楊張新悅宣布第四胎性別

宣佈封肚

Nicola表示生埋今胎真係封肚啦!仲叫傳媒唔好祝佢連生貴子,最後希望每個小朋友都可以健康成長。

 

十年前退出娛樂圈的楊張新悅(Nicola), 早已發覺娛樂圈不適合自己,所以十年前與教育局前政治助理楊哲安結婚後息影,改寫人生,先後誕下三個女Lucy、Lily和Leah,分別8歲半、7歲和3歲,Nicola專心相夫教女,以教好女兒為目標。Nicola深知身教的重要性,她重返校園完成環境管理學碩士,希望學以致用教囡囡環保知識及創作,亦能讓她們看到媽媽如何努力求知。

相信自己教女有一套的Nicola,教得大女二女聽話自律。直到細女出世,其小霸王的性格完全顛覆了她的教女觀,她需要為細女重新學做媽咪,調整教女方法。自成為媽咪的第一天,Nicola已相信為人父母要捱,並盡心盡力教好女兒三方面:品德、創造力及自理能力,讓女兒將來能自己行出一條康莊大道,「唔辛苦點得世間財?唔辛苦點做一個好父母?」

3歲細女是小霸王

Nicola 三個女兒的性格各有不同,大女的身體語言好強,喜歡打跆拳道、跳舞等動態活動,惟說話比較害羞;二女則性格大膽,說話能力強,表達清晰,喜歡說個不停,Nicola舉例說:「佢哋行街想飲汽水,我叫佢哋自己買,大女會好緊張,二女就即刻大嗌:『唔該要一支汽水,唔凍嘅!』佢哋慢慢長大就開始睇到有唔同。」Nicola讚揚兩女品性純樸,做錯事會接受斥責並向父母道歉。

楊張新悅畢業於港大法律系及環境管理學碩士,讀書成績卓越,她的讀書心得是要先明白讀書的意義,讀書是為你自己而非父母,兼且有不同學習方法,「如果小朋友唔明白讀書為乜,就讀咩都冇用。有關讀書方法我先生都有心得,好似背誦生字,佢會將啲字串成一個故 事,等小朋友易記啲。」
楊張新悅畢業於港大法律系及環境管理學碩士,讀書成績卓越,她的讀書心得是要先明白讀書的意義,讀書是為你自己而非父母,兼且有不同學習方法,「如果小朋友唔明白讀書為乜,就讀咩都冇用。有關讀書方法我先生都有心得,好似背誦生字,佢會將啲字串成一個故 事,等小朋友易記啲。」

相隔幾年的細女Leah,卻是家中的小霸王,連家姐都臣服於下,像她的跟班,Nicola笑言細女不覺得自己「細」,以為自己與家姐一樣大。「佢自信心好強,家姐做乜佢又想做,家姐要乜佢又要,甚至點番家姐幫佢做嘢。」

三姊妹偶有爭寵吵鬧的時候,媽咪會教導她們說話時只要改變語氣,對方就易接受得多。

楊張新悅重新學做媽咪

自家中出現了小霸王,其硬頸程度令滿有湊女經驗的 Nicola 也招架不來,以往的教女方法應用在細女身上,完全不奏效,令她起初感到洩氣。「佢性格好強、好硬頸。我以為自己掌握到做媽咪嘅真諦,以為自己識教,直到細女出現之後,我嘅信心被打散晒,我想叫佢做一樣嘢,佢死都唔肯,例如叫個女專心食飯唔好落地,我話係家規,大女二女一聽就跟,但細女睬你都傻照樣落地,我出埋朱古力獎賞佢都唔睬我。」原來細女見到家姐食完飯去玩,她就跟著家姐,Nicola知道對付細女要一路溝通發掘問題,再正面回應她,「我叫佢食完飯先同家姐玩,或者叫家姐等埋佢先玩。」

Nicola笑稱與丈夫楊哲安皆是多言之人,女兒們都有遺傳,一家五口圍在一起就好熱鬧。

Nicola重新學做媽咪,仍在摸索不同方法去教導三個女,對她來說是一場持久戰,「我希望喺一個和諧嘅環境下,對三個女用唔同方法教到我想教嘅嘢,第一係品德,書幾時都可以讀,成世流流長,我都係大個先再進修,但品德一定要從小教;第二係創造力,當一個人嘅思維硬框框,到佢20歲先教已經太遲,我要從小引導小朋友用唔同方法睇一件事、做一件事。」

今個暑假一家人去歐洲旅行,主要到農莊住民宿體驗生活,每天走到大片草地及農場玩耍,踏單車四圍去。
Nicola有請工人姐姐,但講明姐姐是一個老師,而非僕人,毋須服侍小朋友,只需幫手做家務、買餸及接送返學放學,帶女出街毋須工人跟從,「我寧願屋企亂都唔想縱壞小朋友。」

培育創意︰勿給予答案

要訓練小朋友的創造力,一定要多用腦袋,父母不應凡事直接給予答案,應讓小朋友有思考過程,Nicola說:「小朋友鍾意發問,佢哋從小就慣咗乜都問父母,好似佢哋想食糖,你會叫佢哋問准你,因為你都唔想佢哋亂食,咁佢哋就問慣咗。去到某一個階段,佢哋開始有思想,你就唔想佢哋問咁多,我會叫佢哋自己諗吓先,『Don’t give me questions, give me answers. 』你諗到有幾樣嘢想做,我就同你一齊分析。其實老闆同員工都係 咁,老闆實話:你哋唔好畀問題我,你哋自己諗解決方法。」

父母想鼓勵子女多創作的話,Nicola建議必先鼓勵他們不要害怕接觸,她說:「驚就乜都做唔到,我有鄰居唔怕小朋友倒瀉嘢,仲畀小朋友繼續用自己方法練習倒嘢,頭20次都倒瀉,到第21 次就倒得好好喇,大人都要好多年先練到。」

小朋友的思想天馬行空,比大人無框架,所以更加需要鼓勵小朋友多思考,發掘無窮創意,Nicola會由得小朋友用無厘頭方法做事,說不定有驚喜,她又提醒父母要忍耐,不要凡事否定小朋友的方法。「可能佢搞吓搞吓,搵到條更加犀利嘅方法,好似佢著一件衫你教佢點著,但佢想用其他方法,你就唔好局限佢。」Nicola盡量不為小朋友的各項發展設下框架,但要有三個條件才能成事:第一父母要忍耐、第二時間、第三是危險程度,只要在安全的環境下,父母就盡量讓小朋友自由發揮。

Lucy和Lily最近參加了Atom Academy的STEAM課程,尤其對機械人製作十分感興趣。
Lucy和Lily正在設計自 己的「上山下海飛行棋」。

返學重品德興趣班展創意

在三個女當中,Nicola覺得各有各的創作力,大女多在身體語言上創作,行步路都特別過人;二女在思想上比較天馬行空;細女則未有明顯方向,但Nicola笑她愛在制度上挑戰,「佢唔會跟住你條路,佢要行先,行佢想行嘅路。」

Nicola十分鼓勵小朋友廢物利用,發揮創意變成新玩意,例如紙皮、瓶瓶罐罐收集一堆。

大女和二女就讀傳統學校,Nicola喜歡傳統學校能教好品德、規矩與中國文化,惟發掘創意方面需要家長努力,但Nicola能投放的時間不足,而且她並非萬能樣樣識,好似大女喜歡跆拳道、二女喜歡科學,Nicola就安排她們上一間提供多樣創意興趣班的學校,大女打跆拳,二女學畫畫,再一齊學用環保物料砌機械人。

年紀小小的Leah參加小朋友跆拳道班,表現有板有眼,獲導師Master Yeung讚揚。

「二女好鍾意研究,成日用唔同顏料加水撈來撈去,整濕張紙吹乾又剪出嚟,科學研究呢啲嘢我真係唔識,要搵專業人士去教,好似呢間學校就有 STEAM課程去教小朋友創作機械人,佢學得好開心。」Nicola亦對大女喜歡跆拳道表示十分支持,因為從跆拳道當中可以學到品德,包括尊師重道和紀律。

細女Leah專心畫畫創作「Party like a flamingo」。

做媽咪辛苦過做特首

「做父母係要捱,唔係享受。」Nicola 揚言第一日做媽咪就明白此道理,當父母接受了,就不會埋怨湊小朋友有多辛苦。「唔辛苦點得世間財?唔辛苦點做一個好父母?每一晚我都多謝個天,我仲未死,我今晚仲可以舒舒服服瞓呢張床,希望個女今晚唔好喊。第二日起身,發現個女成晚冇喊,真係要再多謝個天!」

自第一日做媽咪起,Nicola就明白做父母要捱,不應埋怨湊小朋友有多辛苦。

Nicola 笑言做媽咪這份工,比做特首更辛勞,「林鄭月娥都冇我哋咁辛苦呀!」Nicola認為小朋友的頭十年非常重要,父母要專注「做好呢份工」,她已為家庭簽下終身合約,盡心教導三個小老闆,她首先要學懂親力親為湊女,生得三個女兒,當然要有本事一拖三。好多父母生一個已經要工人姐姐和長輩幫手湊,生兩個請兩個工人,出街也不敢帶齊兩個小孩。育有兩女的陸永也曾表示,最佩服Nicola經常一拖三出街,毋須工人姐姐跟從,究竟她有何方法?

Nicola與丈夫深信方法總比問題多,帶小朋友出外探索時,會讓她們自行研究解難,不會直接給予答案。

出街一拖三訓練自理能力

「如果我身為媽咪唔能夠一手一腳帶三個小朋友出街,他朝有一日要走難,唔通我話工人唔喺度,我帶唔晒佢哋走咩?我生幾多個,就要湊到幾個多,我要訓練自己,同時間訓練埋小朋友自理能力。」Nicola解釋,訓練小朋友的自理能力好簡單,就是每天讓小朋友照顧自己,每次出街亦絕不帶工人姐姐,讓她們明白出街不會有幫手,久而久之養成自律習慣。「佢哋知道出街唔會有跟班,想出街就只能自己照顧自己。有次我一拖三帶佢哋去海洋公園,大女二女因為好想去,就自動自覺執嘢入背囊,當時細女仲好細,我要孭佢出去,佢哋見我孭住BB咁重,一個話幫手攞奶,一個攞尿片。」

Nicola每日忙湊三個女,經常要說話輔導,她笑言最怕自己喉嚨痛,有話說不得。
Nicola認為旅行分好多種,遠至非洲、歐洲,近至海洋公園、本地郊區皆是旅行,小朋友去那一個陌生環境也可探索學習,所以她經常安排本地一天遊帶三個女玩。

Nicola 透過經常帶女兒出街,令她們明白出街會有好多情況,見陽光猛烈會識帶太陽眼鏡,去郊外就懂得帶防蚊產品,尤其大女做得好,二女就會跟,Nicola最常做的出街訓練就是去超級市場。「先準備一個購物清單,一個負責拎嘢,一個負責睇清單,出發前我會問佢哋有冇嘢想要,佢哋話想食朱古力,就睇番屋企有冇,真係冇的話就睇佢哋本 stamp book,平日表現好會有 stamp,佢哋表現好的話就畀買,事前會傾好晒,如果去到佢哋有嘢想買,就話下次再擺入個list度。」 Nicola笑言,每逛一次超市需花上兩三小時,既要選擇合用產品,又要格價,可以學習很多。

Nicola認為旅行分好多種,遠至非洲、歐洲,近至海洋公園、本地郊區皆是旅行,小朋友去那一個陌生環境也可探索學習,所以她經常安排本地一天遊帶三個女玩。

關鍵詞
楊張新悅

更多精選內容