黃長興

黃長興家庭為首 安於做配角

育兒

廣告

法籍港男黃長興(Stefan)有份演出的無綫新劇《棟仁的時光》,當中飾演的「潮州佬」一角人氣急升。黃長興在公仔箱靜了一陣子,集中精神搞餐廳,不過也會盡量抽時間照顧家庭。大女晞桐(Paige)已經三歲半,細仔子晉(Tristan )快要兩歲,形象鬼佬,內裏傳統的他,一直渴望組織大家庭,不過有見老婆Peggy陀第二胎好辛苦,就打消追多個的念頭,一家四口已經夠幸福。

撰文:Ling
攝影:Woody、部分相片由受訪者提供
化妝:Gary Cheng@Help Professional Makeup Studio
髮型:Johnathan Shum@HAiR
場地:A la maison XXL Seafood & Grill (Tel: 2510 0123)

黃長興家庭為首 安於做配角

黃長興憑《棟仁的時光》中「潮州佬」一角大受歡迎,傻氣得來又非常正直,大家都是非常看好他和Emma(趙希洛飾)的這一對歡喜冤家。Stefan坦言做演員都希望成為主角,但魚與熊掌不能兼得,做主角就要犧牲好多家庭時間,令他心情矛盾,但家庭始終排第一位,為了家庭他安於做配角,返屋企才做男主角,希望待仔女長大一點,演藝事業就更上一層樓。

一家人靚仔靚女,Stefan笑自己fashion sense不高,裝扮以舒適為主,小朋 友的打扮交由太太話事,「有時我都要太太幫我揀衫。」

拍劇與家庭之間感矛盾

Stefan既要拍劇,又要搞餐飲,在太太Peggy誕下第二胎後,都未能抽空照顧家庭,令他帶點愧疚。前年聖誕前夕,他的心情更矛盾,期待接到第四套劇,但又想與家人過聖誕新年。「有三個月我都忽略咗屋企人,夜晚好夜先返屋企,甚至半夜返,都想有個break陪佢,最後我冇收到新通告,可以放假一齊去玩。希望新一年好快有監製打俾我,『長興,可以開工喇!』咁就好開心喇。」

前年Stefan一連拍攝三劇,包括《財神駕到》、《乘勝狙擊》,安守本分做配角,在仔細老婆嫩的階段下,未上位一線都是一件好事。「做主角所花.時間同精神,係好難照顧兩個小朋友,雖然有媽咪同工人姐姐喺度,但做一個主角要百分百投入角色。反而我依家嘅角色可以令我認真拍嘢,有事業又可以睇到小朋友成長。等佢哋大少少,希望我可以慢慢擔任重啲嘅角色。」

囡囡2歲才冧爸爸

Stefan他形容囝囝愛笑愛玩,是個陽光小男孩,「男仔開朗多嘢講會好啲;女仔就最好矜持少少,斯文啲,不過囡囡性格活躍,係面對人多先怕醜。」

女兒是爸爸的前世情人,Stefan當然好錫個女,但他笑言到囡囡兩歲半,才真正「被女冧」。「佢兩歲時先黐爸爸多啲,成日掛住我想同我一齊返工,我哋嘅關係比之前close咗好多。不過我都冇話錫仔定女多啲,兩個都係自己親生,一樣咁愛錫。」

不過小朋友總有呷醋的時候,尤其是女仔,Paige偶爾都會爭寵,訪問拍攝期間有見Paige剛睡醒,樣子比較呆滯,爸爸媽媽先與細佬合照,Paige見狀突然精神百倍,嚷着要一齊影,就此情況下拍攝了多張全家福!Peggy笑囡囡最常爭抱,「我抱緊細佬,佢就話媽咪要抱我,第二個抱細佬啦。」

與敏之囝囝做buddy

Peggy兩胎同是開刀生,以母乳餵哺,大女僅維持五個月,細仔就比較堅持。「上次唔係好識餵,好遲先真正識餵,所以好難追奶,有少少半途而廢,慢慢就冇咗奶。今次我希望餵到幾多得幾多,有睇書學習,我本身唔係多奶,所以要keep住三個鐘餵佢食,如果唔係奶量會減少。」

Peggy坦言因為怕痛,所以兩胎都是開刀生,但她堅持餵哺母乳,盡量給予小朋友最好的營養。

兩人的好友陳敏之在2016年12月底同樣開刀生B仔,他們在訪問當晚已前往探望,Stefan好開心他與敏之的囝囝是同年出生,將來可以做buddy一齊玩。Stefan稱讚敏之是做事認真的人,一定已做足功課學湊仔,如果有需要他們樂於給予意見。

教仔女的方向要一致

兩夫婦皆是靚仔靚女,更是慈父慈母,甚少對仔女發惡,最重要是教仔女的方向要一致,不讓孩子覺得任何一方「好恰啲」,或者要其中一方做晒衰人。「我哋生BB前已經諗清楚點教好小朋友,我哋覺得兩人一致係最啱,好似阿女做錯事,太太會企喺我呢邊先,即使係我唔啱,背後先再同我傾番。」

Stefan形容囝囝愛笑愛玩,性格開朗,是個陽光小男孩。

要體諒全職媽媽的付出

Stefan與Peggy的相處之道是互相體諒、互相遷就,男主外女主內,Peggy在家中做全職媽媽,專心照顧兩個小朋友。自建立家庭後,Stefan明白到全職媽媽的辛苦程度不下於爸爸工作,作為丈夫必須理解及體諒太太為家庭的付出。「爸爸出去工作係有壓力,但唔好以為媽咪喺屋企冇咩做,其實媽咪喺屋企都好辛苦,有時辛苦完又唔出聲,壓力仲大過我哋。」

教女法文從歌謠入手

Stefan在法國長大及讀書,法文是母語,當然要教育下一代,囡囡都遺傳到語言天分,現在能說能唱簡單法文。Stefan指法文頗難學,教囡囡法文從耳熟能詳的英文歌謠入手,再教唱法文版,「佢都有興趣學多個版本,尤其是佢鍾意唱歌,所以都學得好快。」

自有小朋友後,Stefan把原先的法國餐廳改裝,變得家庭化,從食物至檯櫈都變得加大碼,以一班人分享食物為題。

他回流香港後當過兼職法文老師,見過好多有志想學法文的學生,因工作關係每星期只上一兩堂,每堂一兩小時,並不足夠,他建議最好可以到當地半年,才能學好基本法文。其實語文最好從小學習,愈早學習吸收力愈快,但家長絕不能強迫孩子學習,應視乎孩子的興趣。「當興趣班學吓都冇壞, 好似鋼琴、芭蕾舞咁。如果小朋友鍾意又有天分,應該盡早學習,因為小朋友早期吸收得快啲。」

絕不送仔女過法國讀書

約五歲就移民法國的Stefan坦言,當地大部分學校有政府資助,學費全免,但校風太寬鬆,學生讀書全無壓力,反令學生不懂珍惜讀書的機會,所以他不考慮送仔女過法國讀書。「因為好多學校都免費,連家長對教育都隨便少少,唔似得香港學費比較貴,家長睇得緊啲;同埋法國好多假期,令小朋友成日抱住玩嘅心態。」他寧願為仔女選擇鄰國英國或加拿大升學,一來學好英文比較重要,二來校風比較嚴謹,「送仔女過去都安心啲。」

雖然女兒是前世情人,兩歲多的Paige亦好黐爸爸,但Stefan強調自己不會偏心,兩個都是親生嘛。

送去外國讀書都是長遠計劃,父母現階段要先為仔女鋪路,屆時讓仔女自行決定。Stefan對香港的學校不熟悉,全交由Peggy打理,Peggy指中文好重要,希望仔女先入讀本地學校打好中文底。「嚴少少都冇所謂,雖然身邊朋友都話香港讀書壓力大,但先嚴後放鬆冇咁辛苦,或者可以揀啲無咁傳統、適合仔女嘅學校。」

紅娘!