【兒童眼瘡】過來人分享 洋甘菊眼瘡療法

【兒童眼瘡】過來人分享 洋甘菊眼瘡療法

近兩、三個月,不約而同有朋友問我當年野人生眼瘡最後點搞掂,就連我4年幾前喺3B MaMa Blog分享過嘅眼瘡療法Blog都有人留言再問,既然係咁,我就喺呢個比較多人睇到嘅親子平台分享多一次小朋友生眼瘡嘅經歷啦!

撰文&圖片:3B MaMa | 編輯:Chloe

洋甘菊眼瘡療法

想當年,孖人弟弟右眼角入面無啦啦生咗粒細細嘅瘡,令隻眼微微腫起。分別睇咗兩個普通科醫生,都話唔大件事。只要熱敷粒瘡+滴眼藥水就會好翻!

但點知過多個幾兩個星期後,粒瘡愈變愈大,隻眼愈黎愈腫!最後都係決定帶孖人弟弟去睇眼科!

洋甘菊眼瘡療法

醫生話係眼瘡,因為熱敷咗都冇變細,所以要挑走粒眼瘡!!!!!但醫生表示呢個年紀生眼瘡最麻煩(當時小朋友都未夠4歲)。

如果係大人,因為坐得定,基本上喺CLICNIC打支麻醉針喺眼,然後挑走粒眼瘡就得,好簡單。但如果係BB,做法都一樣,但因為BB年紀仲細,大人好難挾實佢坐定定。所以就算係挑眼瘡咁少嘅事,都要。全。身。麻。醉!!!!!!!!

一聽到要全身麻醉,做父母嘅心態當然係抗拒啦,始終對身體唔好嘛。當時醫生就話個手術唔急嘅,所以仲有時間可以考慮(只要粒瘡唔發炎就唔急做手術)

就係呢個時候。。。喺網上見到有人用呢種洋甘菊茶包浸出嘅茶敷眼係WORK。雖然眼科醫生話熱敷咗咁多個星期都冇效,再熱敷落去作用都不大。但。。。總之我就唔想小朋友要全身麻醉,所以都盡最後綿力試試。

洋甘菊眼瘡療法

由於粒瘡咁大,熱敷次數都好密。好似一日3餐+TEA TIME咁,一日敷4次!!!!!我每次用一個茶包加熱水泡茶,然後用條小手巾「索」咗啲茶,扭乾小毛巾就熱敷落粒瘡位置,手巾一唔熱就再重覆以上步驟,直到茶唔熱,就唔再敷。網上話咁樣熱敷需要持之以恆3個月。

洋甘菊眼瘡療法

感恩弟弟熱敷咗唔使一個月,粒眼瘡已變到芝麻咁細。雖然變細咗咁多,但恐防粒瘡變大翻,熱敷仍然繼續,只係次數冇咁密。一直再熱敷多一個月,粒眼瘡完全冇咗,後來都有好幾個朋友試過呢個「洋甘菊眼瘡療法」都有效!

Close up of asian little girl one eye infection isolated on white background, eyelid abscess, stye, hordeolum. Concept of health, disease
資料圖片

甚至孖人弟弟再生眼瘡,我都係再用呢個方法搞掂咗粒瘡(眼科醫生話眼分泌比較多嘅人,生眼瘡機會都相對高。所以生過眼瘡嘅人,好容易會再生第二次!!!!)

大家如果生眼瘡,都可考慮下呢個熱敷法,不過記住小心,唔好熱到燙傷隻眼同埋有疑問最好梗係去睇醫生問翻專業意見!

3B MaMa親子生活館

更多精選內容