Sunshine Boy – 丁旨鋒

鋒仔讀呢間聖若瑟英文中學(SJAC)，同港島嗰間聖若瑟書院(SJC)都係叫St.Jo，不過兩間學校本身就冇「血緣關係」嘅！SJAC係觀塘區嘅津貼男校，係觀塘區嘅第一間開辦中學，男神黃子華都係喺度畢業架！

鋒仔係打開籃球嘅，仲啱啱代表學校贏咗學界籃球賽(D2)冠軍 tim！可能因為佢平時都好好動，所以形成佢嘅性格都好樂觀，成日都好好笑容，充滿正能量！

爆個小秘密俾大家聽！本來我哋係想影阿鋒仔個籃球Look嘅，同佢溝通完，佢仲好主動咁問：「使唔使我帶埋波嚟呀？」你唔怕煩當然係最好啦！點知到影相當日，佢就輕鬆咁孭住個書包，同一個小手抽紙袋出現。咦？說好的籃球呢？「咪喺度囉！」之後就徐徐喺個小手抽度，攞咗個未泵氣嘅籃球出嚟…… 「我屋企係得呢個咋！」 (@ 0 @)

好多男仔對擺pose影相，化妝set頭都會顯得唔係咁自在，不過鋒仔就由開始到影相當日都表現得好爽快，對我哋嘅要求幾乎都冇托手踭。主要係因為佢覺得一切都好新鮮，仲話：「冇所謂啦！咩都試吓嘛！」真係唔俾個Like佢都唔得！

化妝師話，男生女相嘅男仔，通常都靚仔架！點解佢無啦啦會咁講？因為佢話鋒仔笑起上嚟，同蔡思貝好似樣！竟然係咁！？睇真啲先！去片！

嚟到2015年，「學界男女神」都要增值吓，唔止要睇盡中學界靚人，仲要殺入大專界！

所以無論你係讀緊中學定大專，只要你認為自己或者身邊嘅同學仔有呢個資格，都可以自薦或推薦俾我哋! 由今期開始，成功自薦或推薦嘅話，仲有嘢送！

參加方法好簡單，只要將想推薦嘅同學，或者自薦勇士嘅facebook ，tag喺下面 “Comment”嘅位置；再將參加者及提名人嘅姓名、年齡、就讀學校、個人專長、聯絡電話，仲有一個月內影嘅近照兩張(全身及正面)，喺Sunday Kiss facebook專頁 inbox或電郵到[email protected]俾我哋；如果成功通過編輯部審核，成為「學界男女神」，自薦或推薦者就可以得到由遵理學校送出嘅「$300課程現金券」。

「學界男女神」，等緊你嚟挑戰!

撰文: Joanne

攝影: Paul Choi

攝錄: Anthony

剪接: Candy

Hair:Willson@KINGS Makeup

Makeup: Ida@KINGS Makeup

鳴謝:Kidult’s Party (提供場地)

及

贊助獎品