【夫妻之道】人夫冇湯飲 狂呻唔知點同老婆行落去
廣告
日前有一篇引起網民激烈討論嘅文章，內容係一名人夫呻太太一個星期只煮兩三次飯，想飲啖湯水都冇得飲，最後仲因為咁話：「唔知點同佢行落去！」夫妻之道就係咁？婚姻點解會咁脆弱呢？
撰文：Sunday Kiss 圖片：myTV SUPER
老婆煲湯煮飯好應該？
呢位人夫應該一個人擔起頭家嘅，所以就覺得「返工咁辛苦，放咗工返屋企，想食個飯飲啖湯，攤抖吓」。同埋太太既然主力喺屋企湊小朋友，煮飯煲湯嘅任務，自然係交俾佢。
太太：「想飲自己買！」
人夫既然呻得，當然會有理由嘅，佢話太太一個星期先煮得兩日飯，其他都係買外賣，就算係煮嘅都係「簡單嘢」，終於忍唔住開口叫太太煲啖湯濕吓個口，點知太太話煲湯好嘥時間，要湊小朋友又睇唔到火，叫佢如果想飲嘅就自己買。
人夫聽到，當然好失望啦！事關佢想飲湯，都係想健康啲啫，飲出面啲味精湯，飲嚟都冇用⋯⋯講到呢到，人夫就嘆咗口氣，仲話：「真係唔知點同佢行落去啦！」
文章一出，網民隨即展開激烈討論！有人就撐人夫，話煲煲湯要幾多時間，唔想睇火就用電磁爐、高速煲！男人出去捱好辛苦！有人就撐太太，話女人喺屋企湊仔大都好辛苦，啲男人唔識體諒，為啖湯就話唔知點行落去，不如娶個湯煲或者工人姐姐啦！
其實唔好話為碗湯，兩夫妻喺個家庭裡面都有自己嘅崗位，有時都應該退一步，互相體諒一下啦！
