為快樂移居大馬 私校價錢讀國際學校

港媽為女兒快樂學習移居大馬 私校價錢讀國際學校

熱話

廣告

喺香港,小朋友嘅讀書壓力非常大,讀書同快樂從來都扯唔上關係。80後港媽Kelly為咗2個囡囡陳穎(9歲)同陳真(5歲),2015年決定離開香港移居馬來西亞。2個囡囡入讀當地國際學校,唔單止無讀書壓力,學費仲非常平!Kelly話,移居馬來西亞唔單止令囡囡有返個快樂嘅童年,仲學習到如何享受生活。

撰文:Sunday Kiss|圖片由受訪者提供
FB:快樂姐妹花

為快樂移居大馬 私校價錢讀國際學校

對於好多家庭嚟講,國際學校嘅價錢係遙不可及,普通家庭負擔唔到。但原來喺馬來西亞讀國際學校嘅學費同係香港讀私立學校嘅學費差唔多,大女讀緊小三,每月學費約HK$3,300港元,每年書簿費HK$1,000以下,無其他雜費;細女讀緊K2,每月學費約HK$1,200,學費全包無其他雜費。

冇考試冇默書 遊戲中學習

「喺馬來西亞國際學校讀書係冇考試、冇排名、冇默書!學到幾多係你自己嘅,同香港好大對比!佢哋(馬來西亞國際學校嘅學生)係遊戲中學習,學校喺小朋友小一開始已經會帶佢哋去老人院、孤兒院去做義工。」

學校逢星期三同五都有特別課堂,星期三最尾個堂叫CT堂,俾小朋友學禮儀、學禮貌、學習尊重其他人、學正面態度;星期五最尾個堂係興趣班,小朋友可以按自己興趣選擇興趣班,可以學羽毛球、睇書、手工藝、畫畫等等。囡囡讀書無壓力,學得反而更加多。而且學校每年約有180日假期,小朋友讀書都比較輕鬆。

大學選擇多 學費平

馬來西亞有超過170間國際學校,吉隆坡佔50多間。Kelly表示,其實囡囡都可以入讀馬來西亞政府學校,但基於學習環境同升學嘅前途最終選擇國際學校。馬來西亞有唔少英國或澳洲嘅大學喺吉隆坡設分校,依啲大學分校嘅文憑都是由當地學校發出,而馬來西亞大學學費普遍亦比當地平宜接近一半,等同學生可以用一半學費獲得英國或澳洲嘅大學文憑學位。

移居門檻低 30萬港元定存即可

Kelly係透過馬來西亞第二家園計劃移居當地。申請《馬來西亞 第二家園 MM2H》條件,非常簡單,只需準備

  1. 近 6個月入息/政府退休金 證明,月入超過 rm10,000/ 約HK$20,000以上
    (付月結單或糧單證明)
  2. 港幣100萬 的6個月定期存款單(此定期存款待移民局查閱後,定存資金可自由提取,不用保留)
  3. 申請無犯罪記錄證明(即良民證)

如資料齊備,9成申請都可以獲批,審批需時約4-6個月。

當申請批准後,需要親身到馬來西亞任何銀行(匯豐/中銀/其他),開立定期存款戶口*即可,所以移居馬來西亞門檻真是相當之低。
*(如申請人年齡於50歲以下,須要rm$30萬/約HK$60萬;如申請人年齡於50歲以上,只須rm15萬/約HK$30萬)

Kelly亦提及,馬來西亞只須做定期存款,而非其他國家的「投資」移民。因「投資」是有風險,而「定期存款」是沒有風險。「我而家放HSBC定存,每年有3.2%利息。而且住耐咗覺得唔適合自己隨時可以拎錢走,唔駛坐移民監同罰息,唔駛太擔心適唔適合(移居)。」

生活指數低

馬來西亞生活指數低,Kelly表示佢哋喺當地買間2065呎4套房嘅屋,只需要HK$340萬,而水費約HK$22,電費約HK$200,石油氣費約HK$45。「新年細女撞到鎖骨,入咗私家醫院 Sunway 睇急症,再轉上醫院內專科骨科,前前後後1-1.5小時走得,醫藥費只需HK$684」

Kelly又提到,雖然馬來西亞必須要揸車,但喺馬來西亞養車並唔貴。喺馬來西亞入油約HK$4,入滿油缸約HK$100左右。「喺馬來西亞購買大部分屋苑都包車位,有啲仲送兩個車位。」

奶粉價錢亦比香港平一半有多,「細女飲美素佳兒3號,馬來西亞買rm$52(約HK$100),香港同一個款一樣荷蘭出口要HK$399一鑵。」

喺馬來西亞睇戲只需HK$20左右,身高110cm以下免費。

曾考慮台灣日本 最終選擇馬來西亞

好多人都諗過移民,但馬來西亞從來都唔係移民嘅熱門地。Kelly話曾經考慮過移民台灣同日本,但最後選擇馬來西亞。唔選擇台灣嘅原因係台灣讀書嘅主要語言係國語,而且大學唔受國際認可。

後來因為爸爸嘅一位同事嫁咗俾馬來西亞華僑,於是舉家到馬來西亞旅遊,親身了解當地居住環境、學校以及醫療,最後選擇移居馬來西亞。「揀馬來西亞嘅最大原因喺當地國際學校好多,佢哋嘅語言天份好高,社區配套都係全英文,小朋友可以好好咁學習國語同英文。」

但面對好多人都覺得離開香港學習新語言會導致小朋友唔識得再講廣東話,Kelly就話:「我哋係屋企都係講母語講廣東話,無必要為咗學英文同國語走去放棄自己語言!」

最唔習慣交通 學識慢活

Kelly話喺馬來西亞生活最唔習慣係交通。「馬來西亞唔同香港,唔會一落樓下就有巴士,去邊都要揸車。始終馬來西亞地方大,唔似香港咁方便。」但佢認為喺溝通上同文化上都無太大問題,大家都識講國語英文,甚至好多都識得講廣東話。

「馬來西亞嘅人好單純,冇機心,淨係依一點已經好值得係度生活。」

好多人都話,馬來西亞嘅人做嘢好慢。Kelly就認為佢哋唔係做嘢慢,而係享受生活,享受工作,佢哋對於工作嘅要求無香港咁急,只要完成到就可以。「依度生活嘅人嘅步伐比較慢,比較低調」

唔好單方面聽人意見 應該親自去了解

Kelly建議考慮移民唔可以單方面聽人哋嘅意見,可以去旅遊住6-7日,去睇下當地環境、去街市睇下物價、睇下學校、住所。「生活係你自己嘅,你必須親自嚟睇多啲、見多啲。我睇學校需要有小朋友喺課室上堂,咁你就可以瞭解小朋友上堂開唔開心。」佢建議想移民嘅人先嚟旅遊,親自感受下適唔適合再決定要唔要移民當地。