小一派位69.9%派頭三志願 叩門就會冇咁激烈?

小一派位69.9%派頭三志願 叩門就會冇咁激烈?

2018年小一統一派位將於6月2日放榜!教育局發言人表示,本年度共有32,171名適齡學童參加統一派位,而獲派頭三個志願的學童共22486人,即69.9%,較去年上升2.3%,是近6年來的新高。咁高命中率,係咪等於今年叩門唔駛爭崩頭?

撰文:Sunday Kiss 圖片:新傳媒資料室

命中率高 龍年效應失效?

由於本學年的小一新生,主要是在2012年龍年出生的龍仔龍女,適齡學童共約6.8萬人,比去年增加2千人。為應付學生人口上升,今年教育局在全港逾一半校網「加派」,每班全數增加至28人至33人。根據過往數據,每到龍年,適齡學童人數上升,派位滿意率就會下跌,但今年參與小一派位學生人數較去年少;而自行分配學位及統一派位階段獲派首三個志願學校的學童人數合計,整體滿意度為82.9%。

滿意度高=派得好?

雖然睇數據,滿意度的確係幾高,不過咁又係咪等於真係有8成以上嘅學童,都派到心儀學校呢?其實又唔係必然嘅!相信唔少家長都有睇過網上流傳嘅「明星填表策略」,當「劉德華」仲係大部份人心目中嘅必然首選時,有唔少家長已經開始「退而求其次」,將「余文樂」同「蕭正楠」當成頭號對象。

近年趨勢甚至係,有啲家長為咗唔想派去自己冇揀嘅學校,就開始將「阮兆祥」當做二、三選。最後如數據所顯示,有近8成派到頭三志願,但如果最後真係獲分派到「阮兆祥」嘅,又係咪真係會甘心?事實上,有邊個唔想要「劉德華」!?所以統計上嘅滿意度高,係咪就等於叩門競爭冇咁大?家長可以自己衡量。

叩門位人人都爭得!

小一派位

仲有,話就話今年參加統一派位嘅適齡學童有32,171人,但係家長要知道,「叩門」唔係只容許有參加統一派位嘅學童去申請,就算冇參加統一派位,甚至已經有直資私立學位喺手嘅,都一樣可以爭埋一份,而且叩門亦不受校網限制,所以係咪依然會爭崩頭?又自己衡量吓啦!

提提大家!

教育局只會確保所有參加統一派位的申請人,每人分配到一個學位,所以就算派位結果不理想,家長在未有其他offer前,都應先往派位學校註冊,否則等於自動 放棄學位。在註冊後,家長仍可到心儀學校叩門,一般結果會在面試後的一至兩個星期內公布,屆時家長可前往原先獲派的學校取回「小一註冊證」,取消獲派的學位即可。

註冊詳情

家長須依照指定日期(即6月5日或6日),前往獲派的學校辦理入學註冊手續,若家長因事未能依照指定日期或時間辦理註冊手續,必須預先與獲派學校的負責人聯絡,以便作出特別安排,否則將被視作放棄學位處理。

下一頁小一派位6月2日放榜 叩門懶人包袋定先

下一頁 28間熱門官津小學 叩門面試貼士一覽

更多精選內容