歧視

診所低能奇觀-截肢爸爸被歧視 勇敢囝囝:我保護你!

熱話

廣告

有位手臂截肢嘅爸爸同囝囝睇醫生時被人歧視,囝囝見狀勇敢開口反駁,仲同爸爸講:我保護你!相信喺小朋友心目中,依位爸爸一定係個英雄或超人!

原文:「診所低能奇觀」專頁 (文章獲作者授權轉載)| 圖片:irasutoya、新傳媒資料庫

有日一對父子嚟到診所。
仔仔如常活潑地行埋嚟同我講:「姑娘登記!」
我:「好呀,你睇定爸爸睇呀?」
佢:「爸爸睇呀,佢咳呀」
我:「好呀,咁你坐坐先呀」
佢哋兩父子坐低後,坐喺附近嘅兩位阿姨盯住爸爸看…
A姨姨同B姨姨講:「咦呀,好核突呀」
B姨姨:「咁你仲望?」
爸爸嘅手臂截肢了,一邊都只剩下胳膊…
A姨姨:「佢咁樣我好難唔望呀,好心啦,一係就著長袖衫嘛,仲要著背心,想嚇死人咩,好肉酸呀」
B姨姨:「你擰轉面啦」

A姨姨:「望到我心都寒埋啦陰公,搞咩搞成咁呀」
爸爸坐側身希望可以盡量遮掩身體上嘅不完美。

仔仔望望爸爸問:「爸爸呀,點解你要避呀?」
爸爸冇出聲。
仔仔繼續追問:「你冇做錯嘢點解要避呀?」
仔仔見爸爸冇反應,就向住姨姨講:「我爸爸冇做錯嘢,點解你哋要講佢呀?爸爸佢打低咗怪獸先可以喺度㗎!你哋有冇打過怪獸呀?」
姨姨們互相望望對方,唔出聲。
仔仔繼續講:「我爸爸一啲都唔肉酸」
爸爸扯扯仔仔嘅衫:「好啦夠啦」
仔仔堅定咁望住姨姨們:「到我保護你!」
兩位姨姨齊齊打側身坐,再冇出過聲,望都唔敢再望,安靜地睇完醫生攞埋藥離開診所。

雖然我唔知佢哋兩父子之間有過咩故事或打過咩怪獸,但係爸爸喺小朋友心目中,一定係一個英雄或超人。