便秘

【筋肉寶寶養育記】Bb無便便點算好呀?醒你5大方法減低BB便秘機會!

專欄

廣告

好多BB加固後都試過便秘,雖然筋肉寶寶係人奶BB,不過佢都試過3日無便便,想屙個時好似生仔咁出幾次力面都紅晒都未屙到、屙完出嚟便便好硬同份量唔多,而且明顯唔開心同脾氣差左。

為左令佢有以前的暢快生活,我試左1D方法希望幫佢改善,下面講講成效如何:

按摩肚仔:20%work,所以好快就試其他方法

多D爬爬:30%work,比佢多D郁動都會對腸道蠕動有幫助

食水果:40%work,依樣要睇BB肯唔肯食,同埋要留意返好似香蕉低纖維含量的水果就盡量唔好比太多

天天菜菜:60%work,依招一開頭無咩用,但慢慢佢既便便開始無咁硬

飲水:80%work,依招對好多父母嚟講都係超級大難題,點先逼到BB飲水呀?

既然飲水係最有效既方法,咁各位就從依方面入手啦:增加BB飲水量大作戰!!

1, 多方面嘗試不同的器皿

筋肉寶寶前期唔鍾意用匙羹飲水,後期轉用學習杯佢就勁鍾意,所以各位可以嘗試比BB用唔同既器皿,從而發掘佢鍾意既器皿就會更事半功倍!

2, 增加飲水量

每當一記起就比佢飲,唔需要等到佢食完嘢先飲。有幾次筋肉寶寶全日飲唔到一半水,我係晚上六點開始每15分鐘比佢飲一飲,去到佢臨訓前都補返平時的份量。就算每次佢只係飲幾啖,但將佢飲的次數增加都可以令到佢飲的份量增加嫁。

3, 唔會俾水或奶以外的飲品

就好似大人一樣,當食過更甜更美味的食物,自然對淡味食物的興趣減低。我覺得暫時仍未係時候俾BB試依類產品,畢竟水對人係最有益的飲料。

喺我用完以上三個方法後,佢就由一日半支學習杯份量既水到宜家一日兩支;便便就近乎日日有,同埋唔洗點出力就有啦。

另外,如果奶粉BB就有機會更早出現便秘唔少爸媽會考慮轉奶粉牌子同埋會再早少少比水BB飲,以減低奶粉既熱氣及幫助BB減低無便便的機會。其實BB真係幾日都無便便就咩方法都要試下,到最後仍然無改善就一定要帶佢睇醫生呀。祝各位既BB天天順暢天天好心情!

預告篇:嚟緊會有家居裝修既文推出,想睇既朋友記住留意住我專頁既發佈呀!

Kylife#90後媽媽#分享新手育兒經歷#享受每天與囝囝和貓貓共同成長的時刻