林嘉欣任兒童電影節大使 唔畀囡囡睇自己作品

林嘉欣任兒童電影節大使 唔畀囡囡睇自己作品

暑假開始,家長都忙於為小朋友尋找合適的活動參與。全港唯一一個專為小朋友而設的電影節「香港兒童國際電影節KIFF」,來到第2屆,請來了影后級星媽 – 林嘉欣擔任大使。嘉欣除咗幫手宣傳之外,亦都有參與選片,其中一部《神奇女孩》就係佢嘅精心推介,佢仲話到時會同兩個囡囡一齊去睇添!

撰文:Joanne 攝影:曹君丞 相片:新傳媒資料室、林嘉欣IG

電影可以打開對話空間

丈夫是導演,嘉欣本身是演員,一家人與電影都脫不了關係,嘉欣亦表示看電影是其中一個主要的親子活動!「因為我哋星期一至五都唔睇電視,周末就會出去或者喺屋企睇都有。我覺得睇戲可以了解到唔同地方嘅文化,講故事嘅方式,可以擴大世界觀。而且可以免於家長式嘅說教,你想傳遞啲咩訊息畀個小朋友,都可以好簡單、好快咁打開一個對話嘅空間。」

KIFF今年精選出10部全新及經典電影,其中肯雅導演烈卡里昂韋尼拿(Likarion Wainaina)的作品《神奇女孩》,更加是嘉欣親自挑選的。「《神奇女孩》係講一個6歲嘅小朋友,身患絕症,但係佢嘅想像力加上整條村嘅配合,令到一切都變得有可能!呢部戲冇好犀利嘅特技,但係充滿希望,佢細路女嘅勇氣會感動到大家!」

嘉欣嚟緊都會帶兩個囡囡去欣賞KIFF嘅電影。

唔畀啲女睇自己作品

雖然媽咪在香港有很高的知名度,但囡囡是經由同學的口中,才得知媽咪是一個「大明星」,「好似之前佢哋睇我一個廣告,裡面有個小朋友叫我做媽咪,佢哋都會問點解。咁我就會解釋畀佢哋知,因為媽咪係一個演員,當時飾演一個媽媽,咁個小朋友咪會叫我媽媽囉。」不過嘉欣強調自己是一個演員,並不是明星,更加唔會畀囡囡睇自己嘅作品,「因為都好dark 呀!睇《怪物》咁會驚啦!等佢哋大個自己去發掘啦!」雖然囡囡對嘉欣的工作很感興趣,不過之前她帶囡囡去睇自己配音的動畫時,她們似乎完全忘記了這件事,嘉欣說:「都好嘅,可以更加投入劇情!」

嘉欣強調自己是一個演員,並不是明星。

睇戲都要學禮儀

戲院係公眾場所,家長帶小朋友去睇戲,好多時都會出現一些尷尬的情況,例如小朋友說話聲浪太大,常追問劇情等等,嘉欣的育兒方法一向受到家長的推祟,未知在這方面可有心得與家長們分享?「其實去睇戲又好,去美術館又好,都有一啲特定嘅禮儀要遵守,所以事前都除咗要同小朋友講明一陣入到場有啲咩唔做得之外,唱吓歌仔都有用㗎!平時入場前二汶唱嗰首歌,啲動畫又得意,啲歌詞又易記,入場前同小朋友唱兩次,一定會記得!」

嘉欣話可以唱歌仔學睇戲嘅禮儀。

自製機會 等囡囡掛住自己

大女出世之後,嘉欣做了5年全職媽媽,全力照顧兩個囡囡,正因為有了這5年全職媽的經驗,嘉欣發覺自己更加熱愛演戲,現在大女(7歲)已升讀小學,所以嘉欣又再投入電影拍攝工作。近日跟隨團隊到澳洲外景,行程長達3個星期,做媽媽以來,從未試過離開兩個女這麼長時間。「我出發前已經寫咗30封信,請Auntie每一日擺一封落信箱,等佢哋每日都收到一封我寫嘅信,我知道佢嗰日上敲擊堂,就問吓佢敲擊學成點呀?細女(5歲)就細個啲,對3個禮拜都未有咩概念,所以我就攞咗30塊Lego砌埋一齊,叫佢每日拎走一舊,咁佢視覺上就會知道我大概幾時返。我覺得咁都好嘅,可以製造啲機會等佢哋掛住我!」最終嘉欣好成功呀!兩個女日日同佢通電話,都話好愛好愛好愛⋯⋯媽咪呀!

做了5年全職媽媽,嘉欣發覺自己更加熱愛演戲

 

第2屆香港兒童國際電影節參展電影包括:

 

-《非同凡響》(Distinction;香港) *開幕電影
-《神奇女孩》(Supa Modo;德國/肯雅) *電影大使之選

《神奇女孩》(Supa Modo;德國/肯雅)

-《ET外星人》(E.T. the Extra-Terrestrial;美國) *經典之選
-《天籟夢想》(Ballad from Tibet;中國)
-《大壞蛋狐狸》(The Big Bad Fox and Other Tales;法國)
-《持家小木蘭》(The Breadwinner;加拿大/愛爾蘭/盧森堡)
-《小腳板漫遊巴黎》(Cléo & Paul;法國)
-《踢出我天地》(Hero Steps;哥倫比亞)
-《海盗的寶藏》(Tesoros;墨西哥)

-《鬼靈精怪大酒店3:怪獸旅行團》(Hotel Transylvania 3: A Monster Vacation;美國) *閉幕電影

 

 

門票現已公開發售,公眾可於TheGrand戲院售票處、The Grand戲院網站及The Grand手機應用程式購買,每張透過網上或手機程式購票的門票將收取手續費。

下一頁:第2屆香港兒童國際電影節KIFF 大量兒童工作坊免費參加

更多精選內容