胡杏兒 陳敏之陪太子上playgroup 辛苦過拍劇！
廣告
對藝人嚟講，平時拍劇唔止係考驗演技，亦都係考驗緊佢哋嘅體力！胡杏兒 陳敏之都係非常賣力嘅藝人，但係兩位星媽喺做番媽媽嘅角色時，都係一樣咁投入賣力！最近佢哋就將陪囝囝上Playgroup嘅相同片PO咗上IG，佢哋嘅付出嘅體力，應該都係辛苦過拍劇啦！
撰文：Joanne 圖片：陳敏之、胡杏兒及李乘德IG
胡杏兒：係Baby Gym？定我做緊Gym？
日前胡杏兒同老公陪10個月大嘅囝囝返Playgroup，睇相杏兒好似捉唔住精力充沛嘅Baby Lee咁，難怪佢話：明明話係Baby Gym class，點解好似我做緊Gym咁？
杏兒老公李乘德都有一齊去，睇佢抱住個仔倒豎蔥，又唔似係好吃力喎！不過佢同杏兒嘅感想都係咁上下！「BB健身班，係希望培育小朋友嘅空間意識，身體協調同力量。不過就冇人話畀我哋知，實質上係鍛鍊父母多過鍛鍊BB！」
睇吓杏兒平時PO囝囝嘅相，都應該知呢個仔係好動㗎啦！
一字馬！難我唔到啦！我練緊擺隻腳上頭喇！（設計對白）
放晒啲電，攰喇！
陳敏之囝囝子樂就大個啲，歲半左右上playgroup，唔知又會上啲咩呢？
敏之話囝囝而家已經跑得好快，精力無窮！
令到媽媽咁辛苦，咁委屈嘅Playgroup，究竟係要做咩嘅呢？
原來係玩「捐山窿」！
要個大人去捐個小朋友嘅隧道，都應該好迫好辛苦㗎喇！天何況敏之擁有42吋長腿，仲要爬得耐啲添！
但係敏之為咗囝囝，一樣瞓身落力！儘管佢把口不斷嗌「好熱！」同「好尷尬！」
喺隧道另一邊嘅子樂，唔知係覺得好驚，定係畀媽咪嘅偉大所感動，就只係不斷大聲咁喊喇⋯⋯
不過敏之就應該好滿意自己嘅表現，仲形容自己係真人示範咗，咩叫「世上只有媽媽好！」
阿仔，你大個咗就記得要孝順媽咪啦！
