明星撞鬼

電台﹑酒店﹑錄影廠都撞過!精選8個明星撞鬼實錄 包你愈睇愈心寒⋯⋯

熱話

廣告

明星不時要出國去唔同地方工作,又成日做嘢去到三更半夜,老實講都幾容易會碰見啲靈界朋友。夜半嘅拍戲片場、電視城女廁、電台直播、酒店,喺呢啲地方當然有明星試過見到靈界朋友⋯⋯除此之外,小編仲精選咗更多明星撞鬼實錄俾大家睇,包你愈睇愈心寒!

撰文:東方新地 | 圖片:Instagram、新傳媒資料庫

1. 張敬軒 誤闖兇宅

大家睇過恐怖片都知道,好多故事都係由一班人因為好奇心驅使,誤入一啲人類唔應該去的地方,然後遇上重重靈異怪事!原來歌手張敬軒小時候都有類似經歷,闖入一間大屋到處影相,之後先知出事!

歌手張敬軒小時候住在廣州,佢同朋友經常路過郊外一間品字形大屋,但發現間屋長期無人住,於是好奇下與朋友試過爬入屋睇!接住發現屋裏有好多神怪擺設,於是佢同朋友影相留念。

返到屋企後,佢將相機記憶卡放入電腦將相片放大,發現相片竟滿布白色一點點。起初佢哋以為係灰塵,但放大睇清楚先發現竟然每一點白色都係人的五官和咆哮的臉!嚇到佢即時將相片刪除,再也不敢踏足那間品字形大屋!

2. 狄易達電台遇鬼影怪聲

相信大家無論睇鬼片定聽長輩講,都會知道透過相機鏡頭,可以影到一啲人類肉眼睇唔見的事物,所以每當遇到怪事,都有人會選擇用相機鏡頭去查個究竟。同時世上曾出現唔少靈異照片,都係人們影相後先發現相中多咗唔應該出現的朋友!歌手狄易達都試過!

呢件事可能唔少網民都知道。有一次狄易達去電台做訪問,DJ幫佢影咗張相,然後放上微博。點知不久後網友不停轉發,原來佢哋發現相入面多咗個人影,佢知道之後都覺得好心寒!狄易達又話有時喺直播室都幾驚,因為除咗自己同DJ之外就冇其他人,但有時聽到啲聲,都唔知係邊個講嘢咁。所以狄媽媽就會俾一道平安符佢放喺銀包入面,仲教佢唔好亂諗嘢,做人要光明正大就得!

3. 關楚耀酒店靈異事件

雖然小編唔多信神鬼之說,不過就同大家一樣,經常都會聽到唔少關於住酒店要注意之事,否則好容易撞到「老友記」!原來歌手關楚耀入行前一次同家人旅行時,就係在酒店房間手多多所以遇到靈異事件!有時真係唔到你唔信。

關楚耀未入行前,有一次跟家人去夏威夷旅行,去到酒店房見到掛了好多土人面具,因為當時媽咪同妹妹都嚇親,所以便將面具拿下來。本來都冇事發生,不過去到晚上沖涼時,就睇到有啲影行來行去!

第二日佢同妹妹都病咗,所以懷疑那些面具是用來辟邪,拿下來後便有鬼作怪!關楚耀又話自己平時冇戴護身符,不過都會戴一啲金的飾物擋邪。

4. 陳錦鴻錄影廠遇女鬼唱歌

大家都知道錄影廠長年不見天日,陰氣重就好容易遇到嗰啲「朋友」!曾效力無綫多年的資深演員陳錦鴻在電視城的歲月流流長,當然都有遇過怪事!

多年前陳錦鴻趕拍劇集《獄焰驚情》(又名《蘭花劫》),多次遇到無法解釋的怪事。有晚凌晨時分,陳錦鴻如常在電視城十五廠開工,由於位置較入,給人陰森感覺。當晚佢只係拍攝一場簡單文戲,對白唔算複雜,偏偏成晚食螺絲,NG好多次!

到監製唐基明第二日睇重播時,卻發現之前一晚所拍的片段,全部只有畫面,演員講對白的聲唔見晒!反而錄得一把陰森女聲,仲唱住類似《等着你回來》的老歌。怪事接二連三發生,無綫即提前進行開廠拜神,祈求拍攝順利。

5. 歐陽震華 俾鬼拍醒

歐陽震華(Bobby)都試過喺男休息室遇過怪事:「嗰日係日頭,見未夠鐘入廠,咪喺男藝員休息室瞓覺。點知突然俾人拍醒,我好清楚聽到一聲大力拍大髀嘅聲。」

「我扎醒咗,但成個男藝員休息室都冇人,我成身都唔郁得,維持咗一陣,之後我望一望錶,可能夠鐘入廠,嗰啲嘢想叫醒我!有工作人員話有細路仔嘛,但我就未見過。嗰次之後都冇再入過去,咪搞!」

6.滕麗名 女廁撞邪

當年滕麗名剛加入《真情》劇組,《真情》於舊清水灣電視城6號錄影廠拍攝。而6廠位於舊城較入、亦較陰一邊,最近6廠女廁更係全城「陰中之陰」,以往已傳出過不少鬼故,所以好多藝員都避之則吉,情願行遠兩步去其他廁所解決。

偏偏有一晚阿滕人有三急,惟有硬着頭皮衝入去6廠女廁解決。該女廁共有4格、4個洗手盆和4面鏡子,由門口至貼牆依序排列。

佢揀選最近門口廁格,衝入去以最快速度解決後,即時衝返出來用第1個洗手盆洗手。當佢邊洗手邊望向鏡時,竟發現自己個樣出現喺最後一塊鏡中,嚇到佢標冷汗,即時以極速跑返入錄影廠!

7.甄子丹 台灣拍戲靈異事件

人稱「宇宙最強」嘅甄子丹,大家可能覺得佢剛陽味重,英明神武,應該無論何方「朋友」都唔敢惹佢?但原來佢都曾經遇過靈異事件,而地點係台灣!

甄子丹入行多年,入行初期曾經到台灣拍戲,去到一個盛傳非常猛鬼的片場拍攝。某日丹爺在片場開夜班,拍了一段時間後便放宵夜,本來工作人員到附近買宵夜只係十多分鐘路程,但佢哋竟去咗半個多小時先回來!

丹爺仲發現買宵夜返嚟的人個個面如死灰,在多番詢問下佢哋先講出頭先在古裝街見到一大班騎住馬的士兵!但呢晚明明得佢哋呱組攝製隊在片場開工,咁班士兵係咩人呢…

後來大家調查後,發現原來唔少人都見過呢班騎馬的恐怖士兵,仲有人話佢哋塊面係癟冇五官,而馬匹的四蹄都唔係在地上走動!呢個傳聞一直在台灣的電影界流傳,直至該片場清拆、土地被太陽暴曬了一段日子,呢班恐怖士兵先再沒有出動!

另一件事係發生在台灣一間著名酒店,該酒店在世界各地都有分店,而台灣分店就出晒名猛鬼!甄子丹去台灣工作都不時入住該酒店。丹爺有朋友在走廊遇過倚牆而行的無頭鬼,但佢本人入住多次,一直都相安無事,所以對鬧鬼之說自然不信。

後來丹爺再次入住該酒店,先發現酒店裝修和以前截然不同,門口多咗一副對聯,而酒店大堂以至餐廳等地方都掛滿字畫,但唔知寫咗啲咩。

經朋友解釋,丹爺先知道呢啲字畫及對聯都係玄學師傅所寫,目的係鎮壓亡靈,因為酒店的所在地原來係二戰時期的亂葬崗!當年有唔少人喺呢度被日軍虐殺。講到呢度,大家都可能估到係邊間酒店啦!雖然依家酒店格局唔同哂,但曾經發生過嘅事,就信不信由你啦⋯⋯

8. 張栢芝媽媽 泰國靈異實錄

對神神怪怪有興趣,雖然沒有宗教信仰,但不時都會去泰國拜四面佛,仲遇過靈異事件!四、五年前栢芝媽同三位子女栢芝、碧芝及豪龍去曼谷,入住當地一家K字頭的酒店,佢哋住地下嗰層,一開玻璃門就有私人泳池那種。

栢芝媽憶述當晚栢芝打電話話自己間房啲燈不停貶,但當佢同大仔去到後,啲燈貶得更厲害,嚇到眾人即刻抱埋Quintus(栢芝次子謝振南) 搬房。但搬房後先記起未攞Quintus啲奶樽,栢芝媽折返後,隨時有一陣涼風迎面吹來,佢即時講:「唔好搞細路仔呀,我過嚟攞番奶樽咋。你要搞,搞我,唔好搞細路仔呀。」

而嗰啲「朋友」似乎聽得明,栢芝媽攞奶樽返房後,便一個人走到泳池邊不停地喊,子女點叫佢都冇反應,足足喊咗一個幾鐘!栢芝媽第二日就Check Out離開,栢芝亦好心咁提醒新住客間房有嘢,叫佢哋小心。

電視城靈異事件

電視台被喻為陰氣重的地方,鬧鬼傳聞無日無之,尤其不時聽到藝員遇見靈體。將軍澳電視城未落成之前,大台總部位於清水灣電視城,而其前身係昔日邵氏影城,當年有多個影星及導演曾在邵氏宿舍自殺,加上已故影星傅聲亦是在清水灣道汽車失事而死亡,故電視城鬼故層出不窮,勁多藝員同工作人員亦曾經撞鬼。

入廠禁忌:唔好向上望

有傳靈體好鍾意睇人拍戲,當所有燈都向下打,佢哋只能匿喺燈上面陰暗處,而藝員間有個不成文規定,入廠唔會向上望,否則就好易見到污糟嘢!又係喎,鏡頭甚少影向燈光頂,真係愈諗愈驚!

黑布冚鏡頭

閂廠冚機原來係行規!控制台嘅人會望到機裏面影嘅嘢,所以唔係正式錄影時,工作人員會用黑布冚住鏡頭,以免睇到污糟嘢!

化妝間的腳步聲

另一則傳聞發生於清水灣舊廠化妝間,事發時有兩位負責梳頭、化妝員工,閒來無事,坐於化妝間睇電視,突然聽到有「人」行入嘅腳步聲,喺鏡子睇到係一名中年男子,佢哋以為有人需要化妝,點知一轉身竟然鬼影都冇隻!此外,道具部走廊亦一直流傳有「人」身穿旗袍,經常於深夜時分喺走廊走來走去,至於係人定係鬼,咁恐怖,梗係冇人敢去證實啦!

鬼都去食飯

話說某晚,有兩名工作人員打算從地下搭電梯上二樓飯堂食飯,當電梯門打開時,二人見到一男子行出來,初時大家不以為然,當到達二樓打開門時,方才於地下步出嘅男子竟然又於二樓入電梯,嚇到兩人目瞪口呆!