李霖恩培育四驅女戰士

李霖恩培育四驅女戰士

80、90年代風靡全港男生的卡通片《四驅小子》,曾掀起一股迷你四驅車熱潮,男仔放學後與同學片車,儲零用錢買零件砌車鬥靚鬥快!近年潮流興復古,四驅車鹹魚翻生,當年一班小學雞都已為人父,包括《愛.回家》的「樓尚友」李霖恩(Glen),已是一仔一女之父,近年都重拾興趣玩車,更與友人合資辦四驅車場,聚集一班車迷鍊車、搞比賽,挑起了大女Gianna(李清宜)的戰鬥心,常嚷着要一齊比賽,Glen就砌了一架粉紅戰車給她,希望將四驅車這個老少咸宜的玩意,一代傳一代。

2
一家人最鍾意去迪士尼玩,探探Gianna最喜愛的公主。

瞞李少光秘密玩車

「直路後彎轉急彎轉斜, 年齡無分參賽決勝者⋯⋯」吳婉芳主唱的《四驅小子》主題曲,相信勾起好多80後的回憶,《四驅小子》漫畫80年代推出,90年代初播映動畫版,熱潮席捲學界,Glen升讀拔萃男書院中一時,就迷上了玩四驅車。「中一開始有零
用錢,見個個同學都玩,咁我屬於窮困嗰班⋯⋯」筆者忍不住打斷他,你爸爸是前保安局局長李少光喎,「個個都以為我含住金鎖匙出世,其實我老竇都係由低慢慢讀上嚟,我老竇都唔係有錢屋企出身,我出世嗰陣老竇都係租人哋間房住。」當年的李少光在入境處任職,1995年才升上入境處助理處長,再一步步爬升至2003年接任保安局局長。李少光教仔嚴厲,沒給予零用錢給兒子,由細到大拒買玩具,但媽媽心軟私下俾少少錢,他就逐少儲錢買零件砌車,放學就秘密與同學玩車,隱瞞爸爸李少光。「中學有好多課外活動㗎嘛,成日走去牛津道坑渠度玩車,玩完就收埋喺書包,佢唔會摷書包㗎嘛,哈哈!當年幾十蚊有一架,儲兩三個禮拜就買到,但買完又恨囉,成日出好多零件,有啲好靚嘅殼,嘩見到同學仔個個都有,又繼續儲錢買。」

長大後有錢買到心頭好,卻沒時間玩,由中一至今砌過廿幾部戰車,現仍有十幾部未拆盒,「我鍾意以前四驅小子啲款,最鍾意一部叫『原始皇帝』,係壞人嚟㗎,同個主角係咁鬥,但我覺得部車好型。」他大嘆拍劇忙碌沒時間玩,現正拍攝《刀下留人》戲份較多,《愛.回家》五月拍完後亦有新工作安排,但最重要是怕自己太沉迷。「我一沉迷就要玩到最勁,我好驚會發生,我好易沉迷喺一樣嘢度,除咗女人之外。」

Glen忙於拍劇工時長,湊兩個孩子的重任落在太太身上,所以孩子與媽媽的感情較深厚都能理解。
Glen忙於拍劇工時長,湊兩個孩子的重任落在太太身上,所以孩子與媽媽的感情較深厚都能理解。

囡囡粉紅戰車出賽

玩四驅車都是80後一代最多,甚至已為人父,Glen希望四驅車能一直延續下去,教仔女玩四驅車好過行商場、玩電話,「玩四驅車喺親子相處好有幫助,因為四驅車好多零件,有摩打、齒輪、啤令、轆⋯⋯全部同真車一樣,點樣令架車運行呢啲原理,都可以透過四驅車教小朋友。」

Glen坐言起行,近來開始帶囡囡Gianna去自家四驅車場睇比賽,學玩四驅車,更砌了兩架粉紅戰車給她落場比賽。「佢好鍾意比賽,見到人哋比賽就好開心,所以第一部車係俾佢用來比賽,比完就想自己部車快啲去贏人,問人點樣改裝。」

Gianna有一顆頑強戰鬥心,但比賽總有輸贏,Glen覺得學識面對失敗最重要,「以前佢贏唔到會發爛渣,永遠都想第一,我同佢講爸爸同爺爺成日都輸,由細到大都會輸,有乜所謂啫,輸咗咪下次再勁啲囉,四驅車輸咗咪問人囉,爸爸唔夠叻就問場內哥哥,點樣將部車改得快啲,點樣唔飛出軌道,令佢更加勇於發問去改進。」

四驅車零件 多,與真車一樣, 父女玩砌車時可以順道教知識,如何令架車運行這些原理。
四驅車零件多,與真車一樣,父女玩砌車時可以順道教知識,如何令架車運行這些原理。

嚴控飲食減肥

5歲的Gianna仍在摸索嗜好的階段,玩車以外還有打跆拳道、騎馬、溜冰、游水、小提琴、英數及普通話等等,時間表排得滿滿,仲忙過大人,Glen安排如此多活動,主要想小學前找到嗜好專注發展。「佢唔覺得辛苦,小朋友精力好好,尤其係佢,俾佢做多啲活動減肥仲好。」
Gianna有keep住做運動,經常跳跳紮,但身形依然略胖,主要是飲食未控制得好,Glen無奈道:「佢唔單止食零食,最慘佢正餐都食好多,分量同大人一樣,一定要減少無無謂謂嘅食物,好似依家出街好多人認得佢,尋日同佢去街市,賣蛋哥哥都會俾糖佢食,一出街就好多人請佢食嘢。」不過Glen沒出面阻止,想測試她的定力,「我就睇吓佢點樣,我教過佢唔可以再食,我喺度佢都好乖冇攞嘅,但我唔喺度佢一定攞,即刻食㖭呀!」

10 11

(左圖) Gianna有兩架戰車,一架是這部白粉紅戰車,另一部是粉藍加粉紅。

(右圖) Gianna愛玩動態活動,爸爸不怕她變得男仔頭,因為她太貪靚,甚麼都要粉紅色。

升讀拔萃小學

Gianna參加過兩輯《爸B也Upgrade》後,第一輯被人批評她有公主病,Glen揚言一定會教好她,果然第二輯乖巧了不少,其進步亦得到學校肯定,上年獲頒「最佳進步獎」,Glen大讚學校對她的影響最大,着重訓練紀律,其次是做個好榜樣給弟弟看。「我成日話你係大家姐,成個李家家族你最大,我同我老婆嗰邊都係,你真係一個大家姐,兩個表妹一個表弟,同埋細佬,所以佢就識乖喇。」

「大家姐」即將升小一,幸運地因為爸爸校友加分,入到九龍塘熱門學校拔萃小學,「我讀嗰陣係男校,依家變咗男女校,教學仲好OK嘅,我做兒童節目嗰陣有拔小學生上來做話劇,啲英文幾好喎,又好有禮貌,俾我印象好好。」當年他拔小畢業後直升男拔(現已脫鈎),他最懷念兄弟同心的拔萃精神,「我79年出世嗰屆,我哋成班拔萃仔仲會出嚟食飯,有學界比賽仲會一齊出去睇,個個都三張幾四張嘢㗎喇!佢哋都有嚟呢度玩車!」去拔小交表時,Glen重返母校,覺得學校先進了許多,「校舍靚咗好多,仲有多咗個小食部,多咗好多嘢食。」

今年初他與友人投資過百萬在葵芳開設了四驅車場,短短兩個月建立了 人氣,「其實我俾朋友呃咗,佢細細個上歡樂今宵四驅車比賽攞冠軍,同 曾江比賽你諗吓幾耐,佢成日想實現童夢開四驅車場,早排同佢去芬蘭 旅行,佢晚晚飲大咗煩住我,我唔想佢再煩就應承佢。」
今年初他與友人投資過百萬在葵芳開設了四驅車場,短短兩個月建立了人氣,「其實我俾朋友呃咗,佢細細個上歡樂今宵四驅車比賽攞冠軍,同曾江比賽你諗吓幾耐,佢成日想實現童夢開四驅車場,早排同佢去芬蘭旅行,佢晚晚飲大咗煩住我,我唔想佢再煩就應承佢。」

人緣比讀書重要

相對姐姐,兩歲多的弟弟浩宜性格專心好多,為人慢熱,將來讀書成績應該更佳,Glen因應浩宜的性格,安排了另一條國際化的讀書路,棄宣道轉讀樂基幼兒學校PN班,即將直升K1,他解釋:「佢性格適合國際學校長大,可以自由啲,同埋我想佢思想開放、social啲,相反Gianna就唔啱,讀埋國際學校,佢6歲就離家出走喇!哈哈!」他坦言女兒讀書不太叻,曾考過女拔失敗,但她人緣好喜歡social,相信小學生涯會過得快樂,「人緣好比讀書叻更加重要。」

Gianna肩負起大家姐責任,教弟弟一起打掃家居。
Gianna肩負起大家姐責任,教弟弟一起打掃家居。

 

●撰文:Ling

●攝影:黃大立( 部分相片由受訪者提供)

更多精選內容