網民無理攻擊 欣宜神回盡顯高EQ

網民無理攻擊 欣宜神回盡顯高EQ

日前謝婷婷生日,同佢由細玩到大嘅欣宜,就喺IG PO咗一張兒時同婷婷一齊影嘅合照,祝好友生日快樂。點知明明係一件開心事,都惹嚟網民無理攻擊,不過欣宜唔止冇動氣,一句神回,盡顯高EQ,受到一眾網民激讚!

撰文:Sunday Kiss 圖片:鄭欣宜IG、YouTube截圖

「不是父母,你什麼都不是!」

其實欣宜自出道以來,都係喺爭議性中成長,身形、家庭背景等,都成為一眾「口痕友」攻擊嘅理由!好彩欣宜爭氣,靠自己嘅努力同實力,近年喺圈中發展愈來愈好,終於得到觀眾嘅認同!早前仲登上紅館,開第一次紅館個唱!

憑電影《29+1》,更首次提名香港電影金像獎「最佳女配角」。

前兩日(7/9),謝婷婷生日,欣宜就PO出一張兒時合照,祝呢位青梅竹馬嘅姐姐生日快樂!但係竟然惹嚟一名網民嘅無理攻擊!

該名網民話欣宜只係靠父母,「不是父母,你甚麼都不是!」。點知欣宜咁啱又睇到留言,仲親身回覆,表示認同:「你說得對,我們全部都是。」

網民激讚神回覆

事後欣宜得到大批支持者激讚,讚佢EQ高,仲表烈欣宜嘅努力係有目共睹!

欣宜今日出席活動時,被記者問及事件。欣宜指好感激網民嘅支持,覺得有啲受寵若驚。當時只係臨出門口見到,好Casual咁去回覆,自己冇受留言影響情緒,亦都冇動怒。仲話如果心情唔好就會嬲,嬲就會迫自己唔睇同唔回覆啲留言。

欣宜話自己今年已經31歲,唔再係剛入行嘅BB,就算做唔到一個典範,都想喺歌迷面前做好啲,要識得為自己發聲,等人知道自己唔係好蝦,但係最緊要係有禮貌同講道理!

其實欣宜展現高EQ,已經唔係第一次。2014年,畀譏諷因「自暴自棄」而「翻脹」。欣宜喺FB專頁撰寫長文表白,自己因為減肥致長期胃痛,因為減肥根本已經唔知「飽」嘅滋味。因此,佢決定只要健康,不要消脂。不少網民睇過後都表示感動,更送上鼓勵。

貼文短短一晚,就得到7千幾個分享,近10萬個讚好!

但係要數最經典嘅,一定係喺2008年,肥姐嘅追思會上,為父親辯護,表現大方得體嘅一幕。

追思會上,肥姐生前好友鄧光榮當眾指控欣宜父親鄭少秋,多年來未盡父親責任,要秋官上台公開交代。當年嘅追思會係喺紅館舉行,座上客超過6千人,而且更有電視台現場直播。

秋官在欣宜陪同下上台,更為父親辯護。「咁多事情都係誤會,今日追思會為紀念媽咪,唔好咁多是非,或者被有心人做出來嘅嘢影響懷念媽咪。我同屋企人好了解,我哋知道真相就得喇。」幾句說話,大方得體,事後全場鼓掌,21歲嘅欣宜,已經好有大將之風。

 

 

更多精選內容