蜘蛛女鄭麗莎  產後修身大法

蜘蛛女鄭麗莎 產後修身大法

長洲兩屆包山后、世界健體小姐冠軍、連續八年香港女子速度攀登排名第一的蜘蛛女鄭麗莎(Lisa),在運動界百足咁多爪,近年還「爬入」其他領域,進修拍戲做演員、開健身中心做教練及擔任慈善工作等等。去年10月她多了一個身份,蜘蛛女變成蜘蛛媽,誕下可愛囝囝汪晉頤(小晉),現已六個月大。做運動員新陳代謝快,Lisa 由懷孕至今冇乜肥過,她透露因為設計了一套簡易修身動作,加上善用健身球,控制坐月飲食,減肥話咁易!只要持之以恒,人人都可以快速修身!

lisa02
眾多運動中,Lisa 最熱衷仍是攀石,曾寫下香港女子速度攀登連續8年排名第一之紀錄,因而得到「蜘蛛女」之名。

發力生仔似舉重
囝囝汪晉頤選了一個特別日子出世—10月1日國慶日,所以他又名「汪國慶」!Lisa笑說不是刻意擇日,是他搶閘提早六日應節,「佢想大家一齊同佢慶祝生日,普天同慶,哈哈!」Lisa覺得女人要經歷生仔之痛,選擇了順產,「陣痛過程中,我知道郁動吓會生得快啲,就唔會痛咁耐,所以入院後我都堅持去坐fitball,扭吓個身鬆吓可以生快啲!唔痛嗰陣就扭,一痛即刻坐低,痛到頂唔順先上番床等生。」

推入產房15分鐘,小晉就呱呱落地,Lisa覺得生仔過程與運動息息相關,「尤其係發力方面,醫生話一個向下撐,一個向上抽,加埋呼吸,然後谷住道氣唔好講嘢洩氣,佢一講我就明!一吸啖氣用力呼,試咗兩次就生咗!呢個呼吸技巧同好多運動相似,舉重都係吸道氣就舉,瑜伽都係咁。」

lisa05
任職金融的Calvin 是住家男,與Lisa一樣非常喜歡小孩,希望繼續添丁創造一個大家庭,犧牲一點二人世界都無所謂。

生六個沒難度
家中多了一個小寶寶後,一家三口樂也融融,Lisa揚言要變成八口之家,「我想生夠六個,生完第一個之後覺得生仔咁簡單,之後再生都冇難度。BB依家愈來愈大粒,我又變番昔日嘅自己,過程好奇妙,自己由零開始造出嚟嘅小朋友,都唔係好辛苦啫。」

餵人奶方面,Lisa餵了個半月就停止,因為BB太旺她,工作接踵而來,「我、先生同哥哥都係飲奶粉大,都冇乜所謂。咁我要生六個,我想做晒想做嘅工作先再生,懷孕、坐月要一年,雖然懷孕唔辛苦,但做唔到我想做嘅嘢都幾難忍,所以我希望平衡好工作同家庭。」

lisa04
小晉帶旺媽媽的工作接踵而來,她亦覺得自己形象去了另一個層次,多了不少品牌留意自己。

坐月過分進補致肥
好多媽媽懷孕期間不算肥胖,坐月才是致肥元兇!中國人坐月樣樣都補,Lisa便與月嫂溝通好,稍稍改良餐單,避免進食過量脂肪。「傳統秘方一日要食八、九餐,又鹹又甜,要飲酒又要飲埋啲汁,咁先叫補。我嘅定義係,我覺得足夠,點解仲要食呢?雖然月嫂話人人都要跟,但我冇跟足,我覺得坐月應保持三至四餐,少鹽少油,例如煮雞酒我會食雞,但唔需要飲埋啲汁,雖然話啲汁係最補,可以驅寒,其實啲汁煮咗雞都夠啦,成pat脂肪點飲呢;啲酒糟補品我亦冇夾硬食,每餐我最多七成飽,唔需要食十成飽,隔兩個鐘又一餐。」

lisa07
Lisa指小晉好爛玩,一見到媽媽取孭帶就笑笑口望實,出街亦超級乖,眼仔碌碌望着身邊事物,特別喜歡伸手摸花花草草。

Lisa解釋無論進食甚麼、有甚麼習俗,都應聆聽身體選擇,不應人云亦云,「我個人西化少少,會用個心去選擇,聽得太多人講自己都唔開心,選擇食乜做乜應以開心為主。」簡單來說就是均衡飲食,毋須過分進補。

健身球當櫈坐
控制飲食加運動,在修身過程必不可少,她謙稱自己回復最佳狀態七成,「始終同比賽係兩回事,比賽時嘅飲食同運動量都好集中。」她建議媽媽們必須從懷孕開始保持適量運動,做瑜伽、玩健身球及多走路都是不錯選擇,而順產亦比開刀更快恢復體力,可以提早復出做運動。

有運動底子的她,新陳代謝比常人迅速,坐月期間開始做健身球及簡單運動, 個多月就緩步跑,踏入第三個月已經打拳及攀石,並為新戲練詠春及洪拳!她
笑言自己比較極端,但一般媽媽都可以利用健身球幫助修身,保持基本運動量。「我喺屋企將fitball當櫈坐,睇電視都坐fitball扭扭吓,可以練到軀幹能力、穩定性同平衡力,而柔軟度同力量上嘅動作,都可以用fitball做到。」

lisa03
Lisa 鼓勵以運動加強親子關係,例如抱B 做sit up,每上一下都可以親親BB,母子都開心。

送囝囝學武術體操
Lisa是冠軍運動員,應該遺傳了強勁運動細胞給小晉,至於會否步媽媽後塵做運動員,就要看他興趣了,待他長大一點,就會讓他嘗試不同運動,尤其是功夫、武術。「我諗會先帶佢做體操,兩歲就可以碌吓、吊吓,做吓伸展拉筋。」不過,音樂同語文都不可或缺,Lisa笑稱要交給老公,「佢讀好多書,我冇咁好耐性拎住本書嚟睇,佢最近先買咗廿本書番嚟,所以靜態教育啱佢多啲。」

lisa08
小晉遺傳了運動細胞,相信好快學識做運動,將來或有機會青出於藍呢。

讀書方面兩夫婦亦不敢怠慢,開始計劃送小晉返playgroup,揀幼稚園都希望一條龍直升小學,省卻煩惱,「打算讀番政府資助學校,唔諗國際學校喇,因為校規嚴謹啲,唔想佢自由度太大,想佢個人有紀律,有系統式操練,等佢再大啲送埋佢去少林寺,學功夫兼學普通話。」

簡易健身球修身
Lisa利用健身球示範了幾款動作,最啱產後媽媽修緊線條,15下為一組,共做3組,更多動作可登入訪問短片參考。
lisa06

想復出健美搶包山
教仔不能空談,必先做好身教,Lisa希望復出參加健美比賽,做個好榜樣,「雖然我已經攞過好多獎項,回望過去我都好滿足,如果我再玩,目標唔會再係世界賽、亞洲賽,而係想證明我生完BB都有能力做到,依家健美界好少媽咪級參賽。」而令她成名的搶包山比賽,她正考慮為囝囝搶多次,「現階段要操fit自己先,我條癮始終喺攀石上,而上年因為有咗冇參加,今年生咗就好番啲,但畢竟成年幾兩年冇操過,後起之秀亦不斷湧現,我覺得如果我生咗小朋友,都仲搶到甚至贏埋,嘩!簡直爆棚呀!」

即使囝囝運動唔叻,讀書唔叻,Lisa都覺得無所謂,最重要建立了正確道德觀,做個好人。她四年前開始擔任國際培幼會大使,助養過一個非洲女孩,誕下小晉後再助養多個埃及男孩。「我希望每生一個都助養一個,做人一定要有禮貌、有愛心,我希望能夠感染我嘅骨肉。」

2
正在sundaykiss.com 播映的「鄭麗莎產後修身操」,Lisa 一連四集教大家搣走拜拜肉健胸收pat pat 及收腰收肚,毋須劇烈運動,只需一張穩陣的櫈、兩個水樽就做得到,即刻登入睇片邊學邊做!

●撰文:Ling
●攝影:黃大立( 部分相片由受訪者提供)
●化妝: Alex [email protected] MAKEUP
●髮型:Wilson [email protected] MAKEUP

更多精選內容