【甜到惹蟻!】陳豪拍劇忙爆心繫妻兒 陳茵媺狂晒恩愛

【甜到惹蟻!】陳豪拍劇忙爆心繫妻兒 陳茵媺狂晒恩愛

三年抱三嘅陳豪同陳茵媺,近日又搬咗去南區豪宅,頭家開支咁大,身為一家之主嘅陳豪,要搵多啲自然就少咗時間陪伴妻兒。不過佢哋兩公婆出名恩愛,最近忙拍新劇嘅陳豪,再忙都要抽幾個鐘同老婆Aimee拍吓拖,哄得Aimee心花怒放,頻頻喺ig晒恩愛!

撰文:Joanne 圖片:陳茵媺ig

老公胸前晒巨鑽

要孭起一個五口之家,陳豪真係忙到冇時停,之前暑假都冇時間陪老婆仔女,Aimee只好一個帶住3個細路返加拿大!不過陳豪都好積極爭取時間做個好老公,同好爸爸,好似當日Aimee幾仔乸返嚟香港,佢不但親自去接機,仲要逐個啜番啖,睇佢咁肉緊,就知佢真係好掛住妻兒!

阿Kay笑甜到有糖尿!

其實Aimee都一樣成日掛住個老公㗎!好似上星期Aimee喺 ig PO咗張同老公抱抱嘅合照,話老公最近因為忙於拍劇,好耐冇同佢二人世界拍吓拖,所以好感激老公有幾個鐘都留嚟陪自己!公然晒恩愛,都已經夠閃,如果留意到Aimee放喺陳豪胸膛上嗰隻手,手上面嗰粒巨鑽,就更加閃到令人眼都盲!最搞笑係,連阿Kay謝安琪都睇唔過眼,話佢哋兩公婆甜到搞到佢有「急性糖尿病」!

愛你閃不完

今日(2/10)陳豪又出咗埠拍劇,行開冇耐,Aimee就已經忍唔住流露出對老公嘅依依不捨,仲話掛住老公,最好就係碌手機睇相喇!呢張陳豪同一對仔女嘅合照,Aimee就最歡喜喇!因為幾個笑容已代表一切!最後Sweet爆講咗佢「I love you baby!」,講完仲要Tag埋老公個名!真係甜到惹到一地都係蟻!

更多精選內容