瞞生私生子 黃秋生一生最正確的事:「冇離婚!」

瞞生私生子 黃秋生一生最正確的事:「冇離婚!」

黃秋生同老婆吳惠貞結婚26年,生咗兩個仔,但夫妻長期處於分居狀態。今年6月,秋生被爆有一私生子,而且已經20歲,事後不單直接承認,更透露太太一早知情!日前秋生接受車淑梅訪問,指自己其實一早就簽咗離婚證書,不過得太太包容,婚姻才得以維繫至今。

撰文:Joanne 圖片:新傳媒資料室、黃秋生Facebook專頁

出軌因為同太太多衝突

喺訪問中,秋生承認當年出軌,係因為嗰幾年成日同老婆常嗌交,自己又「病到七彩」(患上甲狀線疾病),咁身邊啱出現「一個非常非常好的女人」,所以就令佢行歪咗。

黃秋生

與外遇誕下私生子

點知期後同外遇「搞出人命」,生咗私生子William。有一日,外遇忽然抱埋個仔出現,話要畀番個仔佢,點知相隔一陣又話要抱番個仔走,仲打爆秋生副眼鏡。因為呢件事,秋生知道冇辦法瞞落去,於是便一手一抱住細仔,一手抱住私生子,返屋企同老婆吳惠貞攤牌。

簽好離婚協議書

其實當時太太已經忍咗好多年,一度想要分開,秋生當時甚至連離婚協議書都簽好咗,不過因為太太見幾個小朋友當時仲好細,所以最終都選擇再次包容,而嗰份離婚協議書,而家仲鎖喺秋生個夾萬入面。

夫妻最重要有偈傾!

隨住當年做嘅錯事曝光,秋生諗留轉頭,覺得自己當年做得最啱嘅事,就係「冇離婚」,但係太太成日嚇佢,話:「你簽咗名,我哋離咗婚!」雖然兩夫妻依然分開居住,但係夫妻間感情仍然好好,秋生話而家同太太已經昇華成另一種感情:「大家感情好似朋友咁,咩都可以傾,夫妻一齊,最重要係有偈傾!」

更多精選內容