腎病妻嘔血昏迷入院 黃翊隱藏憂心完成首次個唱

腎病妻嘔血昏迷入院 黃翊隱藏憂心完成首次個唱

因為《流行經典50年》,令黃翊再次受到觀眾的注目,由廿多年前嘅偶像歌手,轉營成為大排檔老闆,日前終於一償素願,舉行入行以來的首個音樂會!誰知華麗的燈光背後,又是一段血淚史!原來黃翊患腎病的太太陳存正,在丈夫舉行音樂會前,一度舊病復發,更出現嘔血的情況,在深切治療部昏迷了9日,黃翊卻一直默默將情緒隱藏,在台上落力表演,表現出專業精神,幸而太太已經甦醒,一家人終可安心。

撰文:Joanne 圖片:星娛樂專頁、新傳媒資料室

太太一度嘔血 昏迷9日

黃翊在演唱會後表示,太太於10月9日因腎病復發,在家中昏迷。黃翊指當時太太在床上嘔血,於是立即將她送院,之後一直昏迷,雖然有試過睜開眼,但對身邊事物沒反應,因此感到非常擔心!期間亦有是否考慮取消演出,但為了不想令觀眾失望,故黃翊堅持演出,期間更因憂心至跌磅。幸好太太在開騷前甦醒,雖然未能到現場看,但足以令黃翊可以安心演出。

黃翊

其實陳存正早年患有腎,因未能正常排毒,以致體內毒素不斷積聚,令身體變得浮腫,甚至影響視力,去年更曾一度復發,需要入住瑪麗醫院治療,當時黃翊正積極復出歌壇,每天忙着宣傳之餘,亦要時常來回醫院探病。因為唯一能做的就是多陪伴太太,令她感受到自己對她的著緊。

 

因為堅守愛情, 黃翊於90年代初被唱片公司雪藏,當時 黃翊 仍希望靠自己繼續唱,轉到過很多唱片公司自薦,但無人問津,加上長江後浪推前浪,漸漸被人遺忘,出show 價跌至毫無尊嚴,得到前亞視藝人太太陳存正的鼓勵下,把心一橫轉型,轉到市集賣T 恤,之後幫三家姐在大埔街市打理大牌檔,一做十多年。有了穩定的事業, 黃翊 與陳存正組織家庭, 誕下可愛兒子黃睿(Wesley),一家三口紮根大埔,幸福過活。直到近日獲邀復出唱歌得到各方支持,對他來說,最重要是在囝囝面前以歌手身份踏上舞台,令他為爸爸感到驕傲。

囝囝返學校唱〈最愛的你〉

黃翊人氣回升,吸引不少樂迷前來大牌檔幫襯,黃翊謙稱最近生意「好咗少少」,十多年來他一直堅守大牌檔,逢星期一至日晚市都會坐鎮樓面,絕少放假。「始終自己生意,要親力親為。節目出街後多咗好多人嚟睇我,睇下我呢個黃翊喺舖頭會擺甫士吖?還是真係做嘢!好多人嚟到會同我傾下偈,影下相,我都好開心嘅。」黃翊更經常親自接訂座電話,想聽聽黃翊把聲,打去訂位有機會聽到!

_J3A4631
黃翊 更經常親自接訂座電話,想聽聽黃翊把聲,打去大排檔訂位有機會聽到!

淡出樂壇後, 黃翊 專心打理大牌檔及照顧妻兒,不再現身幕前唱歌,在家中亦只做一個「浴室歌手」,絕少在妻兒面前唱歌,更從沒有對囝囝提及以前的「威水史」,直至去年再現電視螢幕,才驚悉爸爸曾是一名歌手,興奮到返學校與同學分享。

{"IPTC-DATA":"NMG","data":{"photoID":2411421}}
黃翊 在上世紀80年代末出道,4年間推出過6張大碟及1張精選碟,當中以親自作曲填詞的〈最愛的你〉取得最好成績,而這首歌亦是 黃翊 心中的最愛。

黃翊 起初仍未能打開心理關口,婉拒了節目編審的邀請,但對方多次游說,加上妻兒鼓勵,終於打動他復出開金口,他坦言最希望在囝囝面前重踏舞台。「佢冇睇過我正式上台唱歌,又覺得爹哋係流嘅,我要證明畀佢睇爹哋係得嘅!同埋佢讀國際學校,唔係好識中文歌,淨係識Justin Bieber嗰啲,依家佢都覺得〈最愛的你〉好聽,有次仲哼起〈最愛的你〉,同學問佢哼緊咩歌,我聽到真係好開心。」

5
自黃翊人氣翻升後,連帶其大牌檔生意高朋滿座, 黃翊 推介店內招牌菜籠仔糯米蒸膏蟹、醬烤骨、金牌雞、炸乳鴿、酥炸花枝丸、炸大腸、椒鹽腰果雞軟骨及椰皇燉奶等。

對唱歌仲有團火

黃翊坦言少唱歌只因沒有工作需要,其實內心一團火從沒有熄滅。「我心裏一向仲有團小小嘅火,從來都冇熄到,我聽到鍾意嘅歌會記低,通常都有少少難度,例如有啲位比較高音,但我唔會喺老婆阿仔面前唱嘈住晒,我會沖涼嗰陣入去嗌下,試下自己個音到唔到。」太太存存證實老公無講大話,十多年都無聽到老公唱自己的歌,直到《流行經典50強》才第一次聽到。 黃翊 笑言不單止老婆阿仔,連廿多歲的外甥仔都無聽過。「佢哋一向覺得舅父流流哋,直到今次我先認真地喺電視機面前唱歌,佢哋終於覺得原來舅父有啲料到,都好啦!」

繼《流行經典50強》反應熱烈後,獲邀做續集《流行經典50年》的首集嘉賓,再唱多幾首飲歌。如果得到樂迷支持,他會積極考慮開show,再續未圓的夢。「經過今次有人搵番我出嚟唱歌,我團火變大咗,只要開心、舒服、好玩,我會繼續唱好歌俾大家聽。」 黃翊 透露正考慮舉辦小型音樂會,以歌會友,但條件是不能太辛苦之餘,又不能求其唱幾首。「我希望做到好聽、好睇、開心,所以我要諗清諗楚。」

2
黃翊 從不強迫囝囝學習,尤其是放假應該多休息去 玩,更不應該在假期中迫小朋友學習,但當兒子提出想學某種興趣,就會提醒兒子不能半途而廢,一旦半途而廢就不能再學,令小朋友考慮得清清楚楚。

囝囝吹色士風有功架

黃翊 笑言他們一家三口是名副其實的音樂「細」家,太太陳存正是1992年「十九區歌王之王爭霸戰」亞軍而入行,Wesley 的歌唱天份亦遺傳了父母,黃翊讚揚道:「佢聲音、音準、拍子全部都做得唔錯,所以我最近俾佢學多啲音樂嘅嘢。」最近Wesley 主動學習吹色士風,貪其好聽又夠型,「有次喺爸爸朋友嘅party 上聽到人玩saxophone,覺得好聽好型,所以我想試下。」

7
對於Wesley的將來,黃翊 兩夫婦讓他自由選擇,Wesley揚言將來想做YouTuber, 自己拍片吹saxophone兼做動畫放上網分享。

黃翊 發覺他學了幾個月已經進步神速,有能力不斷跳級。「佢初學有本書仔跟住,但老師一路幫佢跳嚟學,好快已經唔需要本書仔,學書仔以外嘅嘢,所以我相信佢對音樂絕對有天份。」 黃翊 更說,吹色士風一定要識George Michael 的首本名曲〈CarelessWhisper 〉,「唔識呢隻歌硬係爭少少,所以最近我迫佢學呢隻歌,佢上手上得好快,所以我拍咗片擺上網,你哋以為佢好叻, 其實佢NG 咗好多次㗎!」想聽聽Wesley 吹〈Careless Whisper 〉,密切留意《Sunday Kiss 》facebook 喇!

6
黃翊 金口一開,靚聲依然,他指十多年來沒有刻意練聲,或與健康生活習慣有關。「可能我個人不煙不酒,又鍾意做運動,尤其是打網球;同埋我成日喺舖頭做嘢好大聲嗌:幾多位呀?嗌得多把聲都仲喺度。」

崇尚自由學習

訪問當日Wesley 滿口英文,但有努力用中文表達自己,而且「鬼仔」口音不多,明顯有下過工夫。正就讀國際學校的Wesley在學校講英文,返家與父母溝通則中英夾雜, 黃翊 與存存正努力與囝囝多講中文,雙語齊俱。

黃翊 兩夫婦坦言不喜歡香港傳統教學方式,對小朋友太辛苦,返足全日學回家仍要面對七八樣功課,他們希望囝囝從輕鬆環境下自由學習,絕不強迫,故選擇供他讀國際學校,寧願自己工作辛苦,都希望囝囝讀得開心。「國際學校嘅學費真係好貴,我要勤力啲,做多啲嘢去供佢讀書。我唔想個仔放學返嚟冇得relax,要即刻做功課做到夜晚10點,冇晒生活。」

讀國際學校亦有利Wesley 將來海外升學,因媽媽持美國護照,Wesley 亦於美國出世,將來或有機會返美國讀書,所以黃翊希望他能說得一口流利英語,「唔想佢去到美國畀人笑。」不過如果囝囝在香港讀得好,又想留低,當然不會捨得讓他離開。

11a
囝囝跟爸爸留長髮,還試過染髮、電鬈髮好野性,不過轉讀新國際學校後要剪短,因為新校的校風比較嚴謹。

10

9 8

太太抗焦慮抑鬱

眼見囝囝健康快樂成長, 黃翊 與存存已心感滿足,一家人簡單生活就是最好。存存在湊仔的過程上,歷盡許多艱辛,在囝囝小二時確診患上焦慮抑鬱症,後來更引發腎小球腎炎,當時晚晚失眠,精神狀態極差,吸收不到營養,水腫高峰期達160磅,經常見暈要call 白車。「連我個仔對call 白車都好熟悉,點樣處理我暈低。」

存存的焦慮情況由囝囝出生後,慢慢累積到小二時爆發,因為對囝囝過分緊張,不能放鬆自己而捱出病來。「生完小朋友之後,唔知係咪荷爾蒙影響定其他原因,我覺得自己多咗焦慮,成日擔心阿仔會死,我好驚,對眼要望實個仔,瞓覺都唔敢放鬆,佢郁一郁我就醒,個人好alert。」即使有老公和親友幫忙,存存對囝囝仍然好緊張,甚至覺得幫忙的人也不及自己做得好,凡事要親力親為,寧願放棄休息都要照顧他。

11b
Wesley好鍾意打機,最令父母激氣是出街前叫他關機,叫4、5次都當耳邊風,激到父母咆哮,Wesley話有時都不知自己錯在哪。 黃翊 無好氣道:「係咪火都嚟埋吖,但冇辦法呀,惟有講多兩句同佢解釋囉。」
13
兩夫婦教仔必站同一陣線,沒有好人衰人之分,即使意見不合會私下傾清楚才教仔,令他不會感到混淆。
12
黃翊 留了多年長髮,無打算剪短,自從年過40就懶得gel頭,「gel頭化妝搞呢搞路,當年我做到驚咗,依家梳兩梳紮起佢,前面又冇嘢拮住隻眼,我覺得咁樣仲精神,如果你鍾意 黃翊 , 黃翊 就係咁㗎喇!」

對小朋友別過分緊張

存存患病後經常進出醫院, 黃翊 即當起全職爸爸,6點起身為囝囝煮早餐,接送返學放學,存存感激這段時間老公的幫忙,「如果冇佢我冇咁快康復。」這個病纏繞她數年,已經比其他人康復速度快,而最大的失眠問題,亦慢慢有改善,現在大約上床半小時後就能入睡。「原來瞓覺都要學㗎!咪埋眼後要叫身體慢慢放輕,當你以為自己放輕咗,其實未放輕嘅,要一路再叫自己放輕,直到瞓着覺。」

黃翊在存存患病時,每朝6點起身全日湊仔。

她奉勸所有媽咪對小朋友不必過分緊張,當發覺自己能力所限,要找親友幫輕自己,不要堅持一力承擔。「媽媽一定要休息,我嗰陣冇休息,結果捱病咗,病咗唔單止自己痛苦,連身邊所有人都會痛苦,所以一定要保持身體同心境健康,先係對家人最好。」

14
每逢大年初一,一家三口都會在家門留影。

15

16

更多精選內容