邊生得出咁大個仔？9大熟齡女星「升級」做阿媽

撰文：Sunday Kiss｜圖片來源：Youtube截圖，myTVsuper截圖，新傳媒資料室

9大熟齡女星「升級」做阿媽

黃淑儀 王綺琴 – 2019年《好日子》

最近播放嘅《好日子》，首集就先介紹黃淑儀（飾演蔡如玉）一家嘅事宜。黃淑儀喺劇中飾演五子女之母，當中飾演齊瑂嘅王綺琴喺第一集中叫黃淑儀做媽媽，相信唔少觀眾都會喺度諗究竟自己有冇聽錯，但佢哋就真係演兩母女！現實中，黃淑儀現年69歲，而王綺琴就54歲，兩人只係相差15年，實際年齡相差唔太遠，似兩姐妹多過母女。

車婉婉 朱敏瀚– 2019年《好日子》

《好日子》中，另一對最離譜嘅莫過於車婉婉同朱敏瀚。現年44歲嘅車婉婉喺實中育有2歲大嘅囝囝BBQ，但係喺戲入面就係育有27歲嘅朱敏瀚，即係17歲就誕下對方，都尚算合理。不過，劇中飾演車婉婉老公嘅張達倫，現時只有41歲，同朱敏瀚只係相差13年…

惠英紅 陳小春 – 2007年《鐵咀銀牙》

呢部08年出街嘅古裝劇，係小紅姐同陳小春喺電視螢幕上嘅首次合作。陳小春飾演狀王陳夢吉，而小紅姐就飾演陳夢吉嘅娘親潘白鳳。同劇演員仲有視后級嘅佘詩曼，同謝天華、元華等。

現實中，小紅姐係1960年出世，而陳小春就係1967年，二人年紀只係相差6年。喺個劇拍攝中嘅時候，小紅姐都曾經有表示過「委屈」，話自己生唔出咁大個仔！

1999年，小紅姐拍《創世紀》嗰陣，係飾演馬德鐘嘅太太，而馬德鐘只係細陳小春一年。

估唔到8年之後，已經「升級」做陳小春阿媽！

而馬德鐘喺《跳躍生命線》，就有35歲嘅李佳芯做佢太太。

仲同28歲嘅張曦雯有感情線！

商天娥 郭晉安 《隔世追兇》

1964年出世嘅郭晉安，出晒名有張童顏，做咗幾廿年男一，做過佢媽媽嘅女演員都唔少！但係「媽媽」嘅實際年齡，就同佢愈來愈相近！最最最離譜嘅，就係2004年嘅《隔世追兇》，1962年出生，只係大郭晉安2年嘅商天娥，就喺劇中飾演佢媽媽！

雖然個劇情係講安仔可以用一部舊手提電話，同20年前嘅爸爸溝通，合作破案，娥姐都會喺20年前，同20年後出現，但係要飾演細自己兩年嘅安仔嘅媽媽，呢個心理關口應該都唔易過！

盧宛茵 郭晉安 《戇夫成龍》＋《阿旺新傳》

盧宛茵喺80年代尾復出之後，就一直開始做「媽媽級」嘅角色。2002年嘅《戇夫成龍》同2005年嘅《阿旺新傳》，盧宛茵都係飾演阿旺嘅媽媽！

實際上，盧宛茵係1953年出世，今年66歲，比起今年55歲嘅郭晉安，只係大11年⋯⋯ 差距唔算好誇張，但係都係生唔出咁大個仔啦！

韓馬利 郭晉安 《創世紀》

1999年嘅《創世紀》，有成百集，支線極多，演員都用得好盡吓！三大男主角之一，飾演馬志強嘅郭晉安，就有羅樂林同韓馬利飾演佢父母！

Mary姐係1954年出世，今年65歲，大過安仔10年，拍埋真係似家姐多過阿媽啦！

苑瓊丹 陳浩民 《封神榜》

呢部2000年嘅《封神榜》，應該係好多8-90後心目中嘅經典，尤其係殷十娘同哪吒呢段母子情，實在令觀眾流咗唔少眼淚。

苑瓊丹喺劇中表現突破，有別過往純搞笑嘅演出。

現實中，陳浩民雖然都有一張童顏，但係1969年出世嘅佢，今年都已經50歲，1963年出世嘅苑瓊丹，只係相差6年！不過兩個人合作絕對擦出唔少火花，默契十足！

劇中殷十娘仲有金吒、木吒兩個仔，飾演金吒嘅鄧兆尊，今年都52歲喇！只係細苑瓊丹4年！

朱咪咪 歐陽振華《醉打金枝》

朱咪咪同歐陽振華呢個組合，當年真係老是常出現！1997年嘅《醉打金枝》，二人首次演兩母子，不過佢哋實質只係相差5歲。

過兩年佢哋再合作拍《陀槍師姐》，咪咪姐就變咗歐陽振華大嫂喇！

薛家燕 呂良偉《富貴門》

家燕媽媽做「媽媽」當然好合理！出道60年嘅家燕媽媽，今年69歲，8歲就出嚟打滾！2009年嘅《富貴門》家燕姐就要做呂良偉同袁詠儀媽媽。

但係呂良偉其實只係細家燕姐7年，聽佢口口聲聲嗌家燕姐做阿媽，都咪話冇違和感啦！