憤世嫉俗證件相 陳柏宇太太:「要好好面對哩五年」

憤世嫉俗證件相 陳柏宇太太:「要好好面對哩五年」

歌手陳柏宇(Jason)升呢做咗爸爸後,有女萬事足。Jason幾乎每日都喺社交網大晒囡囡Abigail嘅生活照,似乎非常享受做新手爸爸!昨日,Jason同太太符曉薇(Leanne)帶著啱啱滿月嘅囡囡去影證件相,Leanne晒出Jason抱女影相嘅相片,呢位緊張爸爸抱著愛女表情神同步,場面十分搞笑。

撰文:Chloe | 圖片:陳柏宇IG 、 符曉薇 IG

緊張爸爸陳柏宇抱女影相 表情神同步

昨日,Jason同太太符曉薇(Leanne)帶著啱啱滿月嘅囡囡去影證件相。Leanne晒出Jason抱女影相的合照,相中爸爸坐凳仔抱住囡囡,只見Jason「硬晒軚」定格微笑對著鏡頭,而囡囡Abi就仲瞓緊覺。太太無奈留言:「究竟係Abi影相定你影,你笑得咁開心又望著鏡頭做乜?」場面非常搞笑。

 

隨後,Jason亦留言:「only one of us is actually taking their passport photo(其實只係我哋其中一個影證件相)」

影完相,Jason就開心推著豪華BB車,帶小公主行街街。

小公主Abi都係用Silvercross喔

憤世嫉俗證件相 陳柏宇太太:「Abi要好好面對哩五年」

到咗傍晚,終於夠鐘幫B女攞相啦。不過,當媽媽Leanne將啱啱晒好嘅相拿到手時似乎都嚇咗一跳,仲即刻影低同大家分享,佢留言話:「哩個咁不滿嘅樣要用五年,今日去整passport ,眼都未開就要拍佢醒影張相,點知佢整個憤世嫉俗樣出黎,好好面對哩五年嘅passport 。」

符曉薇笑指:「佢爸爸勁鍾意」

不少網民睇完Abi呢張「憤世嫉俗」證件相都「笑咗出聲」,紛紛留言:「永久保存」、「呢個樣真心正」、「好搞笑」,另有網民笑指:「佢好可能會憎你一世」、「慘慘豬」。雖然Leanne見到呢張相都「唔知嬲好定笑好」,不過就直言:「佢爸爸(Jason)勁鍾意」。

無頸家庭

自爆「爆笑」生產經過 陳柏宇太太:「條粉蛋喊到豬頭咁」

Leanne日前於社交網分享囡囡出世當日嘅「生產記」,佢留言話:「首先25號9點幾起身痾尿,點知好似唔識停咁,仲有少少血,心諗呢啲會唔會叫做穿羊水呢,我仲喺廁所大叫陳廣偉(Jason),點知條粉蛋以為我叫佢執屎執尿,佢扮聽唔到繼續瞓覺。」

穿羊水陳柏宇懶理:「拍戲嗰啲唔係咁」

見老公繼續瞓唔理自己,Leanne唯有自己打畀醫生求助,醫生聞言即叫佢入院,然後:「我入房拍醒條粉蛋,出門口嘅時候我仲同佢講,攞埋個走佬袋出去,點知佢同我講話唔使,佢話唔似有啲乜,人哋拍戲嗰啲唔係咁,如果真係要生嘅先返嚟攞,最弊嘅係我竟然聽佢講。」

陳柏宇陪產 不忘搞爛gag

安全到達醫院之後,去到醫院姑娘檢查完確實係穿羊水,即刻call醫生返嚟接生。Jason當時仲以為老婆未省得,好得戚咁同姑娘開玩笑:「條粉蛋仲同姑娘講,乜同拍戲咁大分別嘅,乜穿羊水咁平淡,姑娘同佢講嗰啲係做戲。之後入到手術室門口,條粉蛋換完套藍色手術室衫出黎,好正經同我同姑娘講,你好我係今日嘅醫生,呢個時候麻醉科醫生行過嚟,同我哋介紹自己,點知條粉蛋好厚面皮咁講,原來你係醫生,我以為我自己係醫生,啲醫生護士喺度好開心咁樣笑,仲同我講你先生好搞笑,我問番佢哋搞事定搞笑丫,之後我就推入手術室。」令Leanne哭笑不得。

陳柏宇陪產「喊到豬頭咁」

臨產一刻,Leanne開始好緊張,因為佢聽聞女人生B都要經歷超粗麻醉針同10級痛:「喺嗰個時候先開始緊張,因為聽好多朋友講打背脊嗰支麻醉針係好痛,啲醫生同護士好溫柔,一路叫我唔好緊張,話支針好幼 唔會痛。竟然真係唔痛,之後我下半身已經進入麻醉嘅狀態。」

「喺嗰個時候10分鐘唔使我個女就出咗世,成個過程我都唔係好感受到好痛的感覺。聽到佢(囡囡)喊果下真係滴咗幾滴眼淚,之後望佢條粉蛋(Jason)佢已經喊到豬頭咁。醫生仲問佢剪唔剪臍帶啊,佢即刻say no 。」

陳柏宇升呢做爸爸 即變晒女狂魔

Ablgail嘅個人ig開咁短短接近兩日嘅時間,就已逾9千人追縱,認真犀利!

當然,喺Ablgail嘅ig度會見到老竇Jason不斷為愛女更新可愛靚相!

仲有片睇!

望著前世情人,Jason都忍唔住伸手不停同囡囡互動下。

提前報到的Ablgail,重5.2磅,算係細碼b,細細粒,頭仔得老竇個拳頭咁大咋。

每張相都配有老竇嘅精心留言,好似以下呢張,Jason就寫住:「roar(咆哮)!!」

陳柏宇「痴漢湊女法」 有女萬事足

自從B女 Abi出世後,陳柏宇日日夜夜都掛住湊女。老婆符曉薇形容「個女一出世就有個痴漢永遠跟著佢」

呢個男人真係好恐怖,佢自己影個女就算啦。仲要逼我幫佢同個女合照,你睇佢個樣幾滿意,你睇我個女個樣幾無奈。

網民感嘆符曉薇正印地位不保

好多網民都留言話,媽媽正印地位已不保,變成陳家第三位,甚至形容為「地下粒塵」都唔係。更有網民提議生多個仔,但B仔大過錫返媽媽。

 

圖片:符曉薇@Instagram
圖片:符曉薇@Instagram

生B唔可怕 最可怕係…

最後Leanne仲話原來生仔並唔可怕:「手術半個鐘唔使就完成,原來生小朋友都唔可怕。最可怕係個老公日日夜夜對住你個女係咁影係咁影。」

符曉薇做母乳媽媽 嘆:「滴滴皆辛苦」

老婆大讚:「100分老豆同老公」

有佢係度,我又真係輕鬆好多。餵奶換片氹訓覺佢全部都做。真係100分老豆同老公!

陳柏宇心痛寶貝女打針一齊喊

Leanne係Instagram分享第一次同囡囡去打針嘅經歷,「今日第一次見個女打針,個女打針喊好正常,點知我望去我老公度,佢又喺度喊。」見住寶貝女因打針而喊,做父母難免會心痛,明嘅明嘅!Leanne忍唔住又再問呢位感性老豆陳柏宇,「我問佢我陀b時抽左咁多次血,又唔見你喊?」無嘅,呢位有女萬事足嘅老豆,黎緊有排佢喊啦!

【媽媽心聲】坐月被問「最無聊的問題」 陳柏宇太太:「泵奶、餵奶、氹訓覺」

更多精選內容