【攞定紙巾!】大台真係得「膠劇」? 回顧幾段爆喊父子情

【攞定紙巾!】大台真係得「膠劇」? 回顧幾段爆喊父子情

「制服劇」曾經係大台嘅皇牌,但係近年網民成日都話:「拍咩部咩部門,最後都係愛情劇!」。而家大台熱播嘅《跳躍生命線》,都可以話係近年難得將「專業」同「感情線」攞到平衡嘅作品,特別係何廣沛同李成昌嘅一段麻甩父子情,既貼地又感人,有搞笑亦有催淚,特別能夠觸動觀眾!過去唔少大台劇都拍唔少令人難忘嘅父子情,不如一齊嚟重溫吓,有邊齣令你爆喊過?

撰文:Joanne 圖片:新傳媒資料室、myTVsuper

《跳躍生命線》 李成昌 何廣沛

一開始李成昌同阿仔何廣沛一齊住喺劏房,兩父子成日互窒,老土講句,雖然窮,但係生活得好開心。

父子情

但係老豆當年因為爛賭欠落一身債,老婆受唔住要同佢離婚,帶咗個細仔走,頭家散咗都未令佢改變。

直至連累何廣沛被收數佬放火燒傷背脊,喺背脊留低咗一片傷痕。

傷在兒身,痛在父心,每次見到個仔身上嘅疤痕,又痛,又內疚。

終於的起心肝,仲想斬手指戒賭。

父子情深,阿仔又點會畀老豆傷害自己。

父子同心,終於喺10年內還晒啲錢,重新做人。

劇集出街後,贏到唔少口碑,何廣沛受訪時就話,如果唔係用老戲骨李成昌帶佢入戲,都好難拍得出一段咁濃郁嘅父子情。

《降魔的》 馬國明、金剛、阮小儀

「的士佬驅魔」,初初一聽呢條戲軌,都以為係「膠劇」。點知劇情愈發展愈催淚!尤其係馬國明發現常客金剛小儀係自己嘅親生父母呢段戲,都搞到唔少觀眾感到意外之餘又爆喊!

馬明發現成日坐佢車嘅金剛小儀其實係鬼魂,翻查30年前嘅新聞後,發現金剛小儀間麵店火燭,兩公婆因而被燒死,留低一個4歲仔。馬明相信佢哋因為唔捨得個仔,所以一直留喺人間。

後來馬明終於查出,金剛小儀就係自己嘅親生父母。

父母因為受自身執念所困,無法解脫。

於是馬明一次又一次返去麵店,一次又一次想幫父母走出困局,…

點知一次又一次咁目睹父母慘死…

見到馬明又心痛,又無可奈何,點會唔心痛⋯

經歷好多次失敗之後,「石敢當」教馬明突破幻象。終於令金剛小儀清醒過來

金剛小儀記番起生前死後嘅一切,一家三口終於相認。

盡訴心中情後,三仔乸深情擁抱,你睇嗰陣有冇爆喊?

《踩過界》 王浩信 羅樂林

《踩過界》係王浩信榮登視帝之作,飾演失明律師,又貪錢又有正義感。其中同羅樂林一段父子情仇,真係睇到心又酸,鼻又酸!話說盲俠6歲失明之後就被父親遺棄,後來敢另組家庭,對老豆又愛又恨。點知喺老豆再出現,已經患上漸凍人症。

尤於唔想死得冇晒尊嚴,羅樂林要求王浩信幫佢安樂死。

點知因為呢個決定,令到王浩信惹上官非。一段長達3分鐘嘅法庭自白戲,盲俠終於肯流露內心真正嘅感受!

對老豆咁衰只係想迫老豆自己努力去生活求存,想佢去見安樂死醫生,只係想圓老豆去瑞士嘅心願,令老豆知道個有個仔會喺佢身邊照顧佢同鼓勵佢,可能會令老豆振作,唔會想再揼低佢!

最終兩父子冰釋前嫌,盲俠陪老豆走完最後一程路。

王浩信突破嘅演出,加上羅樂林神級嘅演技,觀眾唔喊爆就有鬼喇!

《情越雙白線》 黃浩然 鄭則士

《情越雙白線》係一個好典型講浪子回頭嘅故事,不過有影帝級嘅鄭則士坐陣,點都有啲睇頭。故事講揸的士搵食嘅鄭則士,後生嗰陣掛住搵食,忽略咗阿仔成長嘅過程,個仔愈大愈反叛,一開始就已經因為醉駕撞死人,搞到自己要坐監,老頭又因為要為個仔補償畀死者家屬,賣咗兩個的士牌,後生捱落嘅,一鋪清晒袋。

到黃浩然出監,兩父子由唔體諒到慢慢開心見誠,兩個麻甩佬一直唔願意表達關心,到一齊學習溝通,重新建立關係。

結局冇BBQ,不過都係大團圓結局,阿仔生性發憤,搵份好工,娶個靚老婆。不過成套劇有好多老戲骨坐陣,仲有見到鄭則士吓吓鬧仔鬧到全身震晒,你都戥佢肉緊!

《巴不得爸爸》 陳錦鴻 吳卓羲

牌面係穿越劇,又玩懷舊,劇情似係左抄右抄,但係結局總有一啲小驚喜。吳卓羲係典型世界仔,因為老豆陳錦鴻又古板又鍾意「唔怕蝕底」咁幫人,連累到佢都冇發圍。但係一次意外,穿越返去老豆後生時,成為難兄難弟,亦重新再認識自己老豆一次。

點知回到現代,吳卓羲發現自己原來只係老豆執番嚟,一直以為老豆對自己唔夠好,原來自己由細得到嘅父愛,並唔係理所當然,老豆亦係一個貫徹始終,對任何人都無私付出嘅大好人。

《烈火雄心II》 王喜 成珈瑩

呢齣絕對係編輯嘅私心推介,瑤瑤同紀德呢後父女情,真係睇一次喊一次。王喜同老婆宣萱唔理屋企人反對,係都要結婚,仲生咗一個女,但係宣萱喺個女仲係BB嗰陣就意外死咗,王喜就一個人湊大個女。

本來做消防係因為要擔起頭家,收入穩定,但係一支公要養大個女,所以令王喜日日返工都要就住就住,因為唔錫身啲,個女就會連老豆都冇埋。

瑤瑤大個,雖然得6歲人仔,但係肥嘟嘟,好精靈,仲要角色設定係非常之識諗,人細鬼大得嚟,又好識體諒人,咁得人鍾意嘅角色,原來就係為咗結局嗰陣,等觀眾喊到收唔到聲。

兩父女又似情人,又似朋友,咩都可以傾。

就算嗌完交,好快又會好番。

後來王喜發奮,成為一個敢做敢當嘅消防員,可惜喺一場工廈大火中,為咗要救魯莾貪功嘅細佬鄭嘉穎,最終殉職。

次次睇到瑤瑤喊住講呢兩句對白,編輯都一樣都忍唔住跟佢一齊喊⋯⋯

更多精選內容