【食譜】轉天氣化痰止咳 龍脷葉蘋果湯

【食譜】轉天氣化痰止咳 龍脷葉蘋果湯

踏入轉天氣的季節,時冷時熱,真係令唔少人都會傷風感冒。而且抵抗力比較無咁好的朋友,有時傷風、感冒之後都會再咳一排,特別係小朋友,佢哋又唔識吐痰,好容易會因為啲痰令佢哋咳唔停。今次介紹呢個龍脷葉蘋果湯清甜潤燥,更有化痰止咳的功效。

撰文&圖片:荔枝媽媽 | 編輯:Chloe

化痰止咳 龍脷葉蘋果湯

不如簡簡單單煲個湯,用食療來「自療」呀。今次會用到龍脷葉,味甘性平,功能清肺熱、治痰火咳嗽、失音喉痛,以完整大片質厚者為佳。一般踏進秋冬才算是龍利葉的當造期,我行咗好多菜檔都搵唔到,都最後去一啲推車仔的婆婆檔口先買到。

龍脷葉對化痰止咳有不錯嘅效果,用龍脷葉配合南北杏、蜜棗煲湯飲,對咳同埋痰多嘅人都有幫助。如果係比小朋友想清感冒之後嘅咳嗽,可以加1-2個蘋果一齊煲,蘋果對潤肺都好有功效架,而且蘋果仲可以令啲湯更甜,更加好味同易入口呢。


材料:

龍脷葉 10多片

南北杏 1兩

蜜棗 3-4 粒

蘋果 2個.

無花果 2粒

做法:

1./ 龍脷葉、南北杏、無花果、蜜棗洗淨備用。

2./蘋果去皮,去核,切件備用。

3./ 鍋內注入清水,把所有材料放入煲內,用6碗水滾起後,以慢火煲1小時即可。

蘋果有解暑、除煩、開胃、生津的功效,秋冬都可以多煲蘋果。而南北杏就有止咳平喘,潤燥通便,蜜棗亦具有清心潤肺、調胃補血的益處。

如果係感冒收尾,唔想咁肥膩,可以唔加肉類來煲。

呢款湯清熱潤肺且平和,平時飲用都好有益架,全家都岩飲。如果當家常湯水,就可以加埋瘦肉一齊煲。

 

我和孖寶的Facebook Page:荔枝與孖寶

我和孖寶的 Instagram IG#:laichimama

更多精選內容