林盛斌

Bob 林盛斌 搬大屋 養四條Queen

育兒

廣告

「吸金王」阿Bob( 林盛斌 )老是常出現,行出街總有他的嘜頭在左近。Bob 近年密密做,全因家中四條queen—太太Pearl (黃碧玲)、大女霏霏(林霏兒)、二女熹熹(林熹兒),去年九月再誕下細女機機(林機兒)。繁重的工作令Bob難以陪伴家人,為免錯過女兒的成長片段,太太會拍下女兒的有趣相片及短片,他隨身攜帶平板電腦,利用小休時間閱覽,注入正能量!早前Bob更決定細屋搬大屋,租住加多利山3,000呎豪宅,與陳慧琳做鄰居,只要四條queen 生活安逸,幾辛苦都值得!

 

撰文:Ling 攝影:黃大立(部分相片由受訪者提供)
化妝:Kings@KINGS MAKE UP
髮型:Winnie Lau@KINGS MAKE UP
場地:Medium-Party & Event Room (tel: 3170 7648)

榮升金牌經理人
Bob為了家庭拼搏事業,去年開設廣告製作公司轉型做老闆,今年增設藝人部,旗下藝人有鄭融、「巨星幫」劉威煌及台灣組合Lollipop@F的大中華地區獨家推廣代理。Bob表示一直心願有自己公司,明白一個人能力有限,希望建立團隊幫助更多人,「上年有拍檔搵我成立呢間公司,至今只係成立咗九個月,託賴得到好多客戶支持,好感恩生意都唔錯,今年再遇上音樂人莊冬昕同鄧智偉,我哋一拍即合成立藝人部,依家先簽兩三個,希望半年後再多啲,過半年又再多啲,希望有個大嘅藝人班底。」

他一個人接job接到手軟,有時因撞期令機會流失,希望多加介紹旗下藝人,既可捧人又多個賺錢機會,皆大歡喜。「好多嘢自己做唔晒,有啲騷想搵我唱歌,我都唔識唱歌,如果我有藝人就可以介紹俾佢哋去做,唔想放棄機會,我覺得施比受更有福,希望俾多啲工作機會我嘅幕前幕後團隊,原來介紹到工作俾人,令佢哋有個發揮平台,個滿足感係好大,佢哋亦好開心,搵到錢又識到新客戶, 我想keep住呢種感覺, 直到永遠。」

Bob比喻自己在娛圈的地位,如果曾志偉是教授, 他只有中一程度。他亦想過事業有走下坡的一天,但覺得人生有起跌才好玩,「呢行最難係keep住人氣,一有負面新聞可能被迫停工半年,所以呢一刻順利嘅話,做到幾多得幾多。」

三千呎豪宅做Kelly鄰居
入行12年,今年底Bob希望有自己talk show,把自己在娛樂圈的地位推進一步。男人需要讓家人安居樂業,Bob事業已站穩,下一步要安居。細女機機出世後,一家五口迫爆舊居,縱使舊居風水極佳,都要搬大屋安置所有「情人」,最近他們以月租近六位數字,進駐加多利山3,000呎豪宅,與劉德華、陳慧琳做鄰居,睇樓當日Bob即碰見Kelly老公劉建浩。「佢話呢度好呀,搬入嚟啦!我住apartment,佢住house,當然再大間啲啦。我同佢屋企好近,行過去只需30秒!」

近六位數租金
一家五口曾到多處睇樓,住邊間Bob交給囡囡話事,霏霏和熹熹一入到加多利山單位即表現興奮,指明想住邊間房,他笑說:「兩個細路一到去就周圍走,又話呢間房係你嘅,呢間房係我嘅,兩姊妹一路傾。之前都有帶佢哋睇樓,尤其係二女,有啲一入去就喊、扭計,有啲去到就話唔舒服,而呢間一入到去,好寧靜,睇睇吓樓仲瞓着咗,咁我就覺得呢個地方幾好喇。」

一家人住得開心,隨之而來是租金問題,「負擔真係重咗好多,咁多年我未試過租樓,由我同太太搬出嚟住嗰陣已經買樓,當然七、八年前係一百萬都唔使嘅二人蝸居單位,慢慢先樓換樓搬大啲,再大啲,今次要跳出呢個諗法,因為豪宅真係買唔到,首先成個都係嘉道理家族,就算真係有得買,當兩萬元一呎,3,000呎成6,000 萬!我有6,000 萬都唔會買,依家租一年大約100萬,都住唔到60年啩!」

B+風水旺丁旺財
人一世物一世,Bob希望家人有優質舒服的生活環境,惟有繼續努力賺錢,添置其他物業收租幫補,其旺角舊居亦以近四萬元放租,一點也不便宜,但經過一輪網上宣傳,睇樓大有人在。「間屋風水好好,有A級,旺丁旺財。」他好注重風水,是住屋必睇指標之一,新居風水都值B+,比舊居爭少少,「我搵到B+已經好叻㗎喇,都係旺丁旺財,之前有啲單位一係旺丁,一係旺財,甚至兩樣都冇。依家爭啲嘅,我會用自己方法微調,師傅同太太都識。住咗呢度之後個感覺係唔同咗嘅,返到屋企個舒服程度,同以前真係爭好遠,係好滿足嘅。」

地方寬闊了,房間大了,Bob仍堅持三姊妹一間房,保持親密關係,「間房好大,一個人一間房冇意思,第一佢哋好細個,第二我覺得姊妹一間房,感情先會好,起碼我同細佬係咁,太太同佢家姐都係咁,到佢哋十幾歲需要私人空間先再調動。」

熹熹比姐姐怕醜,但嗲功叻啲。

升小一具大家姐風範
搬屋另一考慮要近學校,小朋友花太多時間搭車會很疲憊,霏霏剛升上大角嘴天主教小學(海帆道)一年級;熹熹則原校升讀九龍靈糧堂幼稚園K1,現時新居都近兩間學校。負責女兒學業的Pearl指霏霏起初有適應問題,對於長時間返學、有小息也顯得不習慣,但隨着結交新朋友,現在返學好開心。「學校功課量OK,唔算好忙,反而係出面多興趣班,有學英文、Phonics、數學、普通話、鋼琴、豎琴、游水、體操……但對比起同齡小朋友,佢算輕鬆㗎喇。」

校內興趣班也多籮籮,霏霏選擇了冷門樂器柳琴,Pearl覺得西樂學習早已足夠,着女兒選中樂,「我同佢一齊睇中樂資料,佢對柳琴最有興趣。」她覺得霏霏升上小一後,性格變得成熟,愈來愈有大家姐風範,「佢一向都錫妹妹,但依家會更主動教妹妹做嘢,盡個大家姐責任。」

平板電腦教女
Bob在教學方面放手給太太安排,很感恩太太把三個女教得好,知書識禮,培養出正確學習態度。而他就負責做個玩樂爹哋,在家會陪她們用流動平板電腦Samsung Galaxy Tab玩小遊戲、睇卡通片,或上網搜尋資訊,他坦言生活在現今社會,利用新科技教仔女是大勢所趨。「我用平板電腦多過用手機,因為貪個mon大啲,兩姊妹可以一齊睇。平板電腦令小朋友好快接觸到新事物,想睇咩係princess,一搜尋princess就見到公主係點樣,唔只卡通人物,仲睇到真人公主!小朋友接收新事物能力好高,所以俾佢哋用冇問題,觸控仲可以刺激腦部手部,最緊要唔好玩太耐,家長要同仔女協議,每日大約玩10至15分鐘。」

Bob慨嘆自己太忙,錯失了囡囡不少成長片段,在外工作時又心掛掛,所以最近他以自己的Samsung Galaxy Tab作監察裝置,配合新安裝在家的Belkin NetCam高清監察鏡頭,監察女兒一舉一動,有時囡囡對着鏡頭做鬼臉,工作中的他已感到很窩心,提起精神工作,繼續努力為四條queen賺錢養家!