小JM愛玩樂。反轉彩虹村。遊走舊式屋村享受簡單快樂

小JM愛玩樂。反轉彩虹村。遊走舊式屋村享受簡單快樂

11月係報讀K1嘅「面試旺季」,我家小JM出年都準備要返學,所以亦都難逃面試。隨著最後一場面試嘅完結,我並無諗住要分享所謂嘅「面試技巧」或「面試攻略」,因為我明白到小朋友即使係久經練習都好,臨場亦未必可以一如往常般願意回答老師問題,小JM係一個觀察型嘅小朋友,面試嘅節奏急速,往往都唔太願意開口講野,最多臨走前先願意講幾句。但亦好開心見到原來有啲老師都會觀察小朋友表現從而了解小朋友,而非「一次定生死」。

撰文、圖片:傑。斯與晴

遊走舊式屋村彩虹村

當日面試結之後,爸爸就帶咗我同小JM去彩虹村,等小JM可以睇下舊式屋村嘅面貌,同時亦可以感受一下舊式屋村獨有嘅特色。彩虹村係香港最早期興建之公共屋邨之一,除咗四周充滿舊日痕跡之外,其實七彩繽紛嘅外牆亦係吸引之處,更因為設計獨特嘅關係,係1965年榮獲香港建築師學會嘅建築獎項銀牌添。

一個咁有特式嘅公共屋邨又點可以唔帶小JM去體驗一下呢?由於到達彩虹村已經差不多中午時分,我地小JM家第一時間當然係揾地方「醫肚」先啦。爸爸決意捨棄一般食肆或連鎖店,反而找尋獨有嘅舊式快餐店。

餐廳內嘅裝修雖然有點陳舊,但話語間聽出大家都好融洽
餐牌高掛於牆上一角

其實媽媽讚成食呢間傳統餐廳都有啲私心架,因為我想要尋回兒時食過嘅「蕃茄雞脾飯」味道呀。今次我地就叫咗兩個碟頭飯,分別係:餐肉雙蛋飯、蕃茄雞脾飯
老老豆豆,個雞脾飯又真係似以前細個食嘅味喎,連小JM都話好食添。

食完飯之後,媽媽去咗一間舊式士多買嘢飲。呢間士多裏裏外外都充滿懷舊足跡及情懷,令我諗起以前細個住係西貢時,家門樓下嘅舊式鋪仔同士多。

鋪內嘅格局及食品都一樣令人懷念。舊式嘅果糖及玩意,已經唔太易搵到啦。呢度剛好有「吹波膠」,於是媽媽都忍唔住要買來玩。不過好似比以前嘅細枝咗咁嘅?

就係我遊走於店內嘅時候,爸爸就俾小JM玩咗彈波波機。小JM雖然係第一次玩,但竟然俾小JM來咗個全中「All-in」。

快樂其實可以好簡單,一蚊就已經令小朋友有無限歡樂!雖然獎品係隨機出,但能夠贏得禮品已經可以令佢地樂上半天。小JM憑自己嘅「實力」以一蚊換來兩份小禮物,一份係星星貼紙,而另一份就係具懷舊感嘅伸縮紙棒。只係一枝伸縮紙棒就已經令小JM玩到忘我。

 


而我呢,就緊係吹波膠啦!話晒都算係兒時回憶呀嘛~吹完個波仔就俾小JM拎咗,已經叫咗佢小心啲玩,點知都係好快爆咗。唔多唔少,一枝吹到三、四個波波左右。想叫小JM拎住來影相,但佢就玩到忘晒形。都唔知捕咗幾耐先影到張似樣少少~要上來呢個平台都好容易,我地經三號梯就已經可以上到來。

 

當日因為假期嘅關係成個平台有好多人,唔單止有香港人,仲有台灣旅客添~我地仲互相幫大家影相添。因為係突然成行,所以無帶腳架,就只好同爸爸兩個輪流揸機影相係啦!一齊來睇下爸爸、媽媽眼中嘅彩虹村人像又係點架啦!

 

媽媽視覺,爸爸熱愛籃球,所以來到見到有球場亦不忘問波友借籃球過手癮。唔知點解,影完出來又好似變咗有故事性咁,都幾特別。亦因為有籃球在手,所以就促成咗以下呢幾張相:

 

爸爸視覺爸爸話要不經意,所以隨意就好。我亦只求唔變大媽。覺得點?還可以呀嘛?

趣事一則,話說當小JM自己跑緊玩緊時,爸爸話不如自拍一下。正當我地打算自拍嘅時候,怪事發生啦!你睇!多咗隻手呀!唔駛驚,係小JM知我地自拍夾硬要做攝石人啫。

 

請注意彩虹邨雖然係舊式屋村,但依然有好多人住架,所以係影相嘅同時最好先問準一聲及避免打擾到邨民喔!

前往方法:
1.) 港鐵彩虹站 C3或C4 出口
2.) 途經彩虹村丹鳳樓附近的巴士:
10, 111, 11C, 21, 258D, 259D, 268C, 269C, 3D, 3M, 3P, 62X, 671, 9, 95, N121, N216

更多精選內容