【虎羽有云】一歲BB沖繩親子遊(一) 景點篇

【虎羽有云】一歲BB沖繩親子遊(一) 景點篇

沖繩唔同東京大阪,並冇JR貫穿成個地方。以往我哋去日本,淨係搭JR已經夠玩又方便。相信有好多朋友,係決定去沖繩之後都會考慮到底會唔會自駕遊。

撰文、圖片:虎羽有云|編輯:Sundaykiss

Wilma媽本身有一個多年雪藏牌,Wilma爸本身亦唔識揸車,所以本身都研究咗好耐,打算非自駕,而且亦已為方便撘巴士,book咗旭橋車站附近嘅民宿。去到Plan行程嘅時候,發現地方之間其實真係好難搵車搭,所以最後補鐘自駕了!

由於係自己揸車,時間方面就彈性好多,今次嘅行程編排都好自由,所以嚟緊就以景點篇、購物篇、美食篇嚟總結今次沖繩5日4夜之旅,等大家編行程時參考一下喇!

美麗海水族館

第一個介紹嘅地方係第一次去沖繩必去嘅水族館。美麗海水族館位於海洋博公園入面,由那霸揸車去都要2個鐘~公園入面其實除咗水族館之外,仲有好多其他設施。沖繩鄉土村、植物園、海洋文化館,仲有日本唯一一個珊瑚礁潟湖內海灘翡翠沙灘。如果係自駕遊可以慢慢玩的話,呢度可消磨大半日時間!

沖繩:美麗海水族館
沖繩:美麗海水族館

而3歲以上嘅小朋友,未進館前亦可以喺館外嘅攀爬區先放放電!一入水族館,就有海底生物觸摸池,有唔同樣貌嘅海星、海參等等。魔王芊仲細,就由揹住佢嘅爸爸代摸喇!區域內亦設有洗手區。

沖繩:美麗海水族館

最矚目嘅當然係黑潮之海水槽。作為全世界第三大嘅水槽,仲有3條鯨鯊,大人小朋友睇見都會嘆為觀止。下午3點同5點都有鯨鯊餵食,據說極震撼,但我哋就冇抽時間睇了。

沖繩:美麗海水族館
沖繩:美麗海水族館
沖繩:美麗海水族館
沖繩:美麗海水族館

水族館旁仲有海牛館,海豚表演show,同最近閉館嘅海龜館。有興趣的嘅朋友可以預返時間參觀。而且海豚表演show嗰邊亦設有海豚餵食體驗,每日有4個時段可以報名,詳細時間可以睇呢個網頁:https://goo.gl/yubnGs

沖繩:美麗海水族館
沖繩:美麗海水族館
沖繩:美麗海水族館

另外,館同館之間有相當大嘅草地,同一望無際大海,喺流動美食車買杯咖啡喺度同小朋友散步亦相當不錯呢!

沖繩美麗海水族館

地址:沖繩縣國頭郡本部町字石川424番地
Mapcode:553 075 797*74
電話:098-048-3748
乘車:單軌県庁前站→站牌「県庁北口(沖縄県議会正對面)」やんばる急行バス巴士→「記念公園前」下車
營業時間:0830 ~ 1830 (3 – 9月營業至2000)
閉館前一小時不再接受進場
門票:(1600前)成人 1,850 日圓 / 高中生 1,230 日圓 / 中小學生 610 日圓

(1600後售票及進場)成人 1,290 日圓 / 高中生 860 日圓 / 中小學生 430 日圓
海豚餵食體驗:500日圓 / 組

美國村

如果要悠閒咁度過一整日,美國村確係可以停留好耐嘅地方。呢度係沖繩開發嘅旅遊區,仿效美國西海岸街道嘅場景,周圍都充滿美國懷舊嘅氣息。商店、戲院、餐廳、遊戲機中心、海灘、有名嘅摩天輪商場等等,令到美國村嘅內容相當豐富。

而喺美國村Depot Island 3F嘅THE CALIF KITCHEN更加係沖繩有名嘅親子餐廳,設有遊戲區,如果想揀一間海景餐廳,呢間會係媽媽們嘅首選吧!

沖繩:美國村
沖繩:美國村

由那霸揸車嚟只係40分鐘左右,如果冇安排太多主題樂園活動可以將美國村排入去呢~

不過想溫提各位,雖然呢度有好多特色嘅鋪頭,但如果係想瘋狂購物買衫、BB嘢的話,呢度就並唔係大家嘅戰場。喺服飾方面,美國村嘅商店對香港年輕媽媽嚟講可能唔太吸引吧。

美國村

地址:沖繩縣中頭郡北谷町字美濱
Mapcode:33 526 484
乘車:從「那霸巴士總站」乘20、28、29、43、112號→「桑江」下車

沖繩兒童王國

雖然個名叫兒童王國,但實際上佢係一個動物園為主嘅複合式遊樂園,有供人釣魚嘅水池、花園沙地、兒童遊樂設施等等。

沖繩兒童王國
沖繩兒童王國

買飛入場之後,係一個俾人影相嘅直升機,同大象造型嘅植物裝置,當日有一大堆疑似日本媽媽谷聚會喺度排隊影相。另外近入口位置亦有幾隻收費騎乘嘅小馬。

呢個日本最南端嘅動物園飼養咗超過二百種唔同嘅動物,除咗動物園常見嘅大象、獅子、長頸鹿等,亦有少見嘅食蟻獸,同埋其他琉球群島棲息嘅動物。

沖繩兒童王國
沖繩兒童王國
沖繩兒童王國
沖繩兒童王國
沖繩兒童王國
沖繩兒童王國
沖繩兒童王國
沖繩兒童王國

除咗可以睇動物之外,兒童王國亦有一個區域可以觸摸同埋餵食一啲小型嘅動物,例如天竺鼠、兔仔、雞仔。但因為芊羽仲係好細,佢爸爸就冇俾佢餵了。

呢個樂園特別之處,仲係佢每種動物嘅介紹牌都會畫出小朋友同動物嘅比例,亦有寓教於樂嘅講解(大概可以從漢字估意思吧),係值得同小朋友一去的。

沖繩兒童王國Okinawa Zoo & Museum

地址:沖繩縣沖繩市胡屋5-7-1
Mapcode:33 561 766*72
乘車:從「那霸巴士總站」乘21、24、63、90號、110號→「中之町」下車,步行約15分鐘

電話:098-933-4190
營業時間:4 – 9月 0930 ~ 1800(10 – 3月營業至1730)
閉館前一小時不再接受進場
週休時間:週二
門票:成人 500日圓 / 中高生 200日圓 / 4歲以上及小學生100 日圓
(3歳以下免費)

OwiCafe

喺國際通有兩間貓頭鷹Cafe,一間喺巿場本通嘅喺網上見到評語其實較為乾淨,但最後我哋都係去咗大街嗰間,因為有水豚鼠!!

沖繩:OwiCafe

話就話Cafe,其實就冇嘢食嘅。行樓梯落到去,就會有親切嘅店員招呼你,教你使用佢嘅自助售票機。除咗入場券,餵食券(分兩種,一種係可以餵大部份嘅動物,另一種係餵水瀨,各300日圓一小碗),同貓頭鷹企喺你隻手嘅(600日圓),或抱刺蝟嘅券(800日圓),都係喺呢部機度買。

沖繩:OwiCafe

揀完想要嘅體驗,就可以入去參觀啦~入面嘅場地唔算大,大概係得三百呎,養咗大概十幾隻唔同品種嘅貓頭鷹,仲有一隻鸚鵡,極大隻嘅水豚鼠,兔豚鼠,天竺鼠,一隻不知名雀仔,同埋兩隻極可愛嘅水瀨。

沖繩:OwiCafe
沖繩:OwiCafe
沖繩:OwiCafe
沖繩:OwiCafe
沖繩:OwiCafe

Wilma媽就揀咗hold貓頭鷹,Wilma爸就餵動物。我哋入場嘅時候掛住餵水瀨(芊羽餵得超開心),另一pair情侶已經揀咗可以上手嘅貓頭鷹。最後職員將收埋咗既一隻巨型貓頭鷹俾我擺手,要用雙手先夠力呀!

沖繩:OwiCafe
沖繩:OwiCafe

俾貓頭鷹你之前,職員會比一對類似放熱手套你先戴上。呢度嘅所有體驗都冇時間限制,你敢摸的話絕大部份動物都任摸任影,當然太細嘅小朋友,家長要睇實佢哋唔好攻擊小動物啊!

沖繩:OwiCafe
沖繩:OwiCafe

Owi Cafe 沖繩保護動物園

地址:沖繩縣那霸巿松尾2丁目8-16
Mapcode:33 157 411*73
乘車:單軌美榮橋站步行10分鐘
電話:090-9596-2960
營業時間:1200 ~ 2300
門票:成人 1000日圓 / 小童 540日圓

瀨長島UmikajiTerrace

瀨長島係一個沿住山嘅開放複合式商場,純白色嘅希臘建築設計,再加埋面向無邊際嘅海景,環境絕美!佢嘅位置同機場、outlet都非常近,大概只有15分鐘車程,好適合一落機租完車就去,或者作為回程臨還車嘅最後行程。

除咗買手信嘅商店,亦有好多唔同種類嘅食肆,有時間嘅話,喺度飲下啤酒,望吓海,睇吓起飛降落嘅飛機,已經係一個非常寫意嘅下午。只要係好天氣,無論早上、黃昏、夜晚,都係極推介必去嘅好地方,尤其係睇日落呢!

沖繩瀨長島
沖繩瀨長島
沖繩瀨長島

瀨長島

地址:沖繩縣豐見城市瀨長174番地6
MapCode:33 002 602*22
乘車:單軌赤嶺站→出車站→南口方向→黃色店家招牌→瀬長島(ホテル前)
接駁時間:0830起到2030 一個小時一班,座位約24位。
電話:098-851-7446
營業時間:1000 ~ 2100

今個簡短嘅景點篇希望可以俾大家一啲行程嘅靈感,嚟緊嘅美食篇,同埋最重點嘅購物篇(今次Wilma媽旅程重點係主攻買嬰兒用品),請大家好好期待呢~

延伸閱讀:

【台灣親子遊】宜蘭民宿。戶外遊樂場

更多精選內容