【網民熱話】與拍拖8年女朋友分手 好爸爸一招幫囝囝忘記煩惱
廣告
【網民熱話】囡囡係爸爸嘅前世情人，囝囝就係爸爸嘅知心好友！唔開心嘅時候同爸爸訴苦，爸爸總有辦法幫阿仔解決煩惱。最近有網民於討論區發文，表示自己同女朋友分手，非常傷心，網民爸爸知道後就用一招令佢忘記煩惱，網民表示覺得非常感動，表示係真正嘅「父子情」。
撰文：Sunday Kiss| 圖片： LIHKG截圖、thinkstock、《蠟筆小新》截圖| 編輯：K
好爸爸一招 幫阿仔忘記唔開心嘅事
最近連登討論區有網民發文，表示自己同拍拖8年嘅女朋友分手，拍拖8年女朋友2度出軌，覺得「留得住個人都留唔住個心 」，非常唔開心。食飯時同爸爸講，爸爸就話「人生係會有啲風浪唔會咁平穩㗎啦」，然後用電單車載住囝囝「遊車河」。
「佢開車前問我坐過幾多次佢車，我話十次左右啦。點知佢一出左停車場就猛咁比油，我之前坐佢車都未試過咁快，我偷偷地望到最快去到140km/h，個頭盔啲聲變到達達達達…我個心情即刻舒暢哂」
網民表示「遊」完車河後腦入面諗緊嘅已經唔係一直煩惱嘅感情事，而係心諗「會唔會炒車」，雖然危險，但好有效。網民表示好想同爸爸講：「老豆，好多謝你呀！」
一眾網友就留言表示呢啲真係父愛，希望該網民可以好好珍惜爸爸。而該網民更表示爸爸同佢講「你放工無咩做咪過黎搵我睇戲食飯囉」。真係爸爸先明白點樣令阿仔開心返，父愛就係唔講出口密密地關心自己！
