花數萬醫銀屑病 張頴康:「最怕遺傳俾仔女」

花數萬醫銀屑病 張頴康:「最怕遺傳俾仔女」

藝人張頴康一直受俗稱「牛皮癬」嘅銀屑病而困擾,近日聯同家人一家三口拍皮膚產品廣告時指,雖然已患銀屑病超過十年,亦曾花數萬蚊打針,但病情已經好咗九成,最怕銀屑病會遺傳俾仔女。

文:JK|圖:新傳媒資料庫、張穎康Instagram、張穎康 麥雅緻 Facebook專頁

「牛皮癬」困擾張頴康逾十年

藝人張頴康近年一劇接一劇,但佢自2006年起一直受「牛皮癬」困擾,之前一直都係以化妝遮掩著患處,仲要戒口控制病情,甚至多年嚟四處訪尋中西名醫求診,過往曾經試過花上幾萬銀打針醫病!但為人父母嘅最擔心莫過於寶貝仔女,張頴康同太太麥雅緻育有一仔一女,佢指雖然銀屑病無傳染性,但有遺傳性,佢最怕將銀屑傳俾下一代。

可幸嘅係,而家銀屑病情已經好返九成,現時亦有利用藥物控制好病情,近日一家更獲邀為皮膚產品廣告拍宣傳硬照,仲有產品贊助!張頴康仲笑著口咁話:「贊助夠我打兩年幾療程喇。」

張頴康戰勝銀屑 去泳池游水

張頴康過去曾為銀屑關護會拍攝短片時同喺社交平台上出文分享病況,指以往曾怕旁人目光而只夠著長衫長褲,唔敢着短衫短褲,佢講過:「諗番以前每次去健身室都係要着長衫長褲!着長衫長褲,唔係因為要焗啲汗出嚟,而係要遮住身上面一撻撻嘅紅印!」因為銀屑病控制得好,張頴康而家已經可以出街著短衫短褲:「已經去到PASI 90,夏天嘅時候可以着短衫短褲出街,可以去海灘游泳池游水,唔使再理旁人目光!」

銀屑病 遺傳俾仔多過俾女?

而太太麥雅緻亦都好支持佢,雖然張頴康講過張太初時唔了解銀屑,甚至猜忌佢係唔係出過去「滾」,但張太之後都有搵資料了解銀屑,先無再誤會,但同樣怕銀屑會遺傳俾仔女,特別係第二胎嘅仔仔,張頴康講過﹕「太太有上網搵方法幫我一齊對抗銀屑。銀屑無傳染性,但就有遺傳性,我嘅爸爸同爺爺都好似有,而且係遺傳俾仔多過俾女,所以當老婆有咗第二胎仲要係仔嘅時候我都擔心過,希望佢會冇事啦!」

銀屑病 其實沒有傳染性

銀屑病(俗稱牛皮癬)病發時,患者身上會長紅疹,手肘、關節外側甚至頭部皮膚都會變得紅腫及呈現銀色皮屑,病情嚴重時徵狀更可佈滿全身,身體任何地方會變得脆弱,容易無故破損,甚至流血。唔少人誤會銀屑病者會將病傳菌傳染,但其實銀屑係源於自身免疫系統失調,唔會有傳染性,但有遺傳性。

而PASI(Psoriasis Area and Severity Index)即係指出銀屑病面積同嚴重程度嘅指數,而上文張穎康提到嘅數字90代表經過治療後,比起用藥同療程前已經有90%嘅改善。而相信銀屑病人同張頴康一樣,都會以亦PASI 100呢個目標進發,而醫治銀屑最需要嘅就係堅持!

4歲遭母離棄 太太不離不棄 張頴康終夢想成真

今年36歲的張頴康加入TVB的日子不短,不過一直以來都係做一啲三、四線的不起眼角色,不過佢一直都沒有放棄,最後成功入屋!其中《回到三國》中傻頭傻腦的范根、《師父·明白了》中的冷酷殺手「江太平」,以及《愛我請留言》中飾演何志安等,都獲觀眾的讚賞。不過講到令佢成功上位的角色,當然係《一屋老友記》的「三寶」!

憑「三寶」首奪獎

努力多時,張頴康在《TVB馬來西亞星光薈萃頒獎典禮2016》中,奪得「飛躍進步男藝員」一獎,亦係佢入行16年來首個獎項。張頴康在台上表示,自己六年前因需要錢成家立室,所以轉行做一個要中港兩邊走的文員。誰不知某日發生車禍,佢就回想自己十年來連配角都未演過,好唔甘心,所以決意重返TVB!當時太太麥雅緻就講咗句︰「你繼續發你嘅夢啦,錢唔好再諗,屋企由我嚟頂!」

講完一番感言,張頴康最後在台上大大聲道出愛的宣言︰「多謝老婆!老婆我愛你!我永遠愛你!」不單台下的呂慧儀及滕麗名感動落淚,唔少觀眾都睇到眼濕濕!

坎坷童年

除了演藝路上波折重重,張頴康原來亦有個孤苦童年。佢曾透露母親在自己4歲時離家出走,所以自小由祖母照顧;至於父親則在佢10歲時另娶內地太太,從此兩父子分隔兩地,關係漸行漸遠。雖然缺乏母愛下成長,不過張頴康並沒有走上歪路,只是性格變得內向寡言。

另外張頴康堅持以自己真名出道,而且一直好好保存自己與母親唯一的合照,就係希望他朝可以與母親相認!雖然能否母子重逢仍是未知之數,不過相信觀眾一定睇到佢的付出,繼續支持佢發個好夢,「坎坷過後有艇搭」!

幸福一家四口

為彌補童年遺憾,張頴康一直希望盡早成家立室,佢在六年前迎娶同為藝人的麥雅緻,婚後兩年誕下可愛女兒小豆,之後太太更誕下細仔「小花生」,湊成好字!張頴康亦曾坦承,全靠老婆填補了佢心靈上的缺口!

更多精選內容