吳雨霏仔仔六個月大 IG曬全家福 「仔仔你是我最好的老師」

吳雨霏仔仔六個月大 IG曬全家福 「仔仔你是我最好的老師」

歌手吳雨霏(Kary)同網球手洪立熙喺2015年拉埋天窗成為夫妻,兩人嘅愛情結晶品Asher喺今年6月出世。琴晚Kary喺IG post咗一張全家福,並指喺過去六個月仔仔令佢學咗好多嘢,仲話仔仔係佢最好嘅老師㖭!

撰文:叮叮|圖片:吳雨霏Instagram|編輯:YIU

Asher令吳雨霏夫婦感情升溫

Kary同洪立熙結婚4年,兩公婆嘅感情似乎自有咗Asher 之後變得更加恩愛。Kary自有Asher 之後都會不時Post 吓老公仔嘅相,多謝老公仔喺佢湊BB湊到累湊到頭痛嘅時候用行動支持佢,例如幫佢較水浸浴,而且仲會自動幫Asher換尿片、沖涼。Kary仲喺老公仔生日嗰日喺IG公開多謝老公,大讚老公仔喺佢嘅好老公、好BB爸爸,更係佢嘅「Superman」。

吳雨霏產後三個月足不出戶照顧仔仔

Kary自有咗仔仔Asher之後就開始減少幕前工作,仔仔出世之後Kary更加三個月冇離開過仔仔冇離開過屋企,絕少出席公開場合,Kary話因為唔希望錯過仔仔嘅每一分每一秒。三個月後Kary終於俾城中名人邢嘉倩,曾昭怡等人拉咗出去聚會,Kary仲話雖然只係短短兩個鐘嘅聚會,但令佢明白到作為一個媽媽要懂得喺照顧仔仔嘅時間同埋自己嘅私人時間取得平衡,媽媽擁有自己嘅私人時間並不可恥。好友宋熙年仲大讚Kary犀利,話佢自己就連留喺屋企三個禮拜都頂唔順,Kary居然留咗喺屋企三個月。

吳雨霏經常喺IG分享做媽咪嘅心得

Kary自誕下Asher 以嚟經常喺IG分享佢做新手媽媽嘅心得,Kary話雖然仔仔初期每隔兩個鐘就會好準時咁扭計要飲奶,就算係夜晚都喔唔例外。不過Kary一啲都唔介意仔仔令到佢冇咗訓覺時間,仲話好享受做母乳媽媽㖭!另外,吳雨霏喺產後極速修身,就連丁子高都忍唔住問點解Kary生完仲係咁fit。Kary就喺IG story同各位媽媽分享產後紮肚方法,推介各位媽媽使用,仲話絕對唔係廣告,係私心推薦,用家親自見證!

Asher半歲大 正面仍然未曝光

Kary仔仔Asher琴日半歲大喇,Kary喺Instagram分享咗一幅全家福,相片入面見到老公洪立熙同仔仔著咗父子裝,兩個人都係著牛仔色系嘅衫,而仔仔Asher就由爸爸托住,鬼馬嘅Kary就從後攬住仔仔,仲將仔仔嘅小手擺喺老公塊面上面,真係隔住個屏幕都感受到Kary一家有幾咁幸福。Kary仲話多謝仔仔喺過去六個月為佢帶嚟咁美好嘅時光,多謝仔仔發掘咗佢嘅潛能,令佢學識咗好多嘢,仲話仔仔係佢最好嘅老師。雖然自己唔係亦從來唔會係一個完美嘅媽媽,但佢會盡力做Asher最好嘅媽媽。最後祝願Asher平安快樂長大!Kary夫婦三年抱兩!Kary繼續同大家分享Asher嘅動向同做媽咪嘅心得啦!

更多精選內容