【親子好去處】一站式親子空間登陸荃灣 體驗消防員救火+設計專屬動物

【親子好去處】一站式親子空間登陸荃灣 體驗消防員救火+設計專屬動物

近年香港越來越多親子好去處,例如各種室內遊戲室、親子餐廳、親子會所等等。最近有一站式親子空間進駐荃灣,場內除咗有遊戲區,仲有親子市集、CAFÉ及親子餐廳!實行阿仔盡情放電,阿媽輕鬆行街休息!

撰文:Kamen | 攝影:Issac

一站式親子空間

荃灣愉景新城開放咗一站式親子空間Donut Village,場內除咗有遊戲區,仲有親子市集、CAFÉ及親子餐廳,媽媽們終於可以唔洗眼甘甘睇住小朋友玩,可以放低小朋友去行街食嘢!

Donut Village
Donut Village位於荃灣愉景新城一樓。

專屬手帶記錄遊戲資料

場內有一個Donut Adventure遊戲區,有2個互動遊戲比小朋友參加。每位小朋友都會獲得一條手帶,去指定位置影相後就可以開通。每次參加遊戲前都要拍手帶入場,遊戲內會出現小朋友頭像㗎!

參加AR遊戲前要先開通專屬手帶。
影相記錄!

體驗消防員救火

最吸引嘅遊戲必定係消防員救火體驗!小朋友化身「火速救兵」,擔任唔同崗位去救火及教人,而且每一段時間就會換位,每個小朋友都可以參加各種崗位,緊張刺激!

小朋友化身「火速救兵」,你睇下佢哋幾投入!
小朋友要控制消防直升機、消防車同消防喉。
另外亦可以體驗救護人員嘅工作。

動物農場 DIY專屬動物

而另一個遊戲就係「動物農場」,小朋友可以選擇並列印自己喜歡嘅動物,填上顏色後去指定位置將動物掃描後,動物就會出現喺熒幕上面!小朋友嘅手帶會記錄動物嘅樣貌,透過小朋友「悉心照顧」更會長大。小朋友更加可以派出自己嘅動物去參加比賽!

小朋友選擇喜歡嘅動物列印。
填上顏色,有冇見過藍色嘅馬騮?
係藍色面、紅色身嘅馬騮呀!
亦可以派出自己嘅動物參加比賽!
鬥快拍!小朋友超投入呀!

免費遊戲 AR跑步比賽

而場外亦有一個免費嘅AR遊戲,4個小朋友為一組,原地鬥快跑步!

免費嘅AR跑步遊戲,簡直係放電必玩!

黃巴士Cafe 超可愛冬甩/雪糕

場內有一架1:1嘅黃巴士Cafe,售賣各種可愛嘅食物!其中最受小朋友歡迎當然係雪糕,小朋友食到lamlam利呀!

1:1嘅黃巴士Cafe
超靚嘅冬甩雪糕!
每一款冬甩好好靚,有得食有得睇!

親子市集購物

喺小朋友放緊電嘅同時,媽媽們亦唔怕悶!Donut Village有唔少商舖,除咗有嘢食仲有英國皇室專用嘅BB車添。

Donut Village佈滿親子市集
連英國皇室專用嘅BB車Sliver Cross 都有!

即將開放!Donut Cafe親子餐廳

現時Donut Village仲係試業階段,入面有一間Donut Cafe親子餐廳尚未開放,如果開放就係荃灣區少有嘅親子餐廳,超期待!

Donut Cafe親子餐廳尚未開幕,但眼見好多滑梯同繩網!

Donut Village

地址:荃灣青山公路荃灣段398號愉景新城一樓

更多精選內容