3款簡易野餐小食 5個step完成

3款簡易野餐小食 5個step完成

小朋友K1學校旅行~去左佐敦谷公園玩,本身諗住帶個麵包就算⋯⋯媽我好懶~諗諗下又想佢有個難忘嘅回憶⋯⋯都係整嘢食啦!因為朝早起身時間無多,諗左啲可以同步可以整嘅小食,只需個半鐘完成三款簡易野餐小食啦!

撰文、圖片:初初媽媽編輯:YIU

3款簡易野餐小食

飯團、魚魚餅、牛油果醬蛋,一啲都唔失禮架,賣相仲好吸引~

依家成日都話去旅行好開心!野餐好開心!
如何一個半小時完成之步驟:
1)首先一起身就洗米煮飯先,一個鐘後可以整飯團~
2)跟住就開滾水烚熟啲雞蛋,呢度大約烚10至12分鐘至熟
3)開好pankcake粉,開機準備夾魚魚餅

由於今次時間比較趕,所以買咗現成pancake粉,味道都不錯,不會太甜~759買的。

魚魚餅食譜(可整約12塊)

Pancake粉 250g
雞蛋兩隻
牛奶200克(可改其他液體)
1)全部材料撈勻就得喇~

如果唔想用pancake粉,可以參考之前類似食譜:
香蕉魚魚餅

無蛋香蕉鬆餅

南瓜紅苺乾冬甩圈

用gemini 機,呢個幾好用啊~簡單易用,容易起模,唔燶底,有五款模,格仔餅同冬甩圈係經常用的~

唔使落油,直接不兩匙羹落去至9成滿,可以加夾心都得,今次落咗提子乾、朱古力碎

跟住蓋上,焗8分鐘~完成!

放在網上放涼先好入盒。即時食好香架,外脆內軟。12塊呢度大約整咗一個鐘。

放咗三個鐘後,變咗軟身蛋糕口感。類似雞蛋仔放淋咗咁,小朋友食都唔錯嘅~

牛油果醬蛋食譜(10個份量)

雞蛋5個
牛油果1個
整魚魚餅其間烚蛋熟左喇,先放入冷開水浸5分鐘,之後就好易剝殼架啦~跟著將雞蛋切半~蛋黃取出

涼緊蛋呢個時候準備牛油果,皮變黑左,個頭尾用手按下有少少軟身就熟喇!

牛油果用叉壓爛,將蛋黃加入壓蓉就可以喇,不過我就再加左少少沙律醬拌勻,超好食!放入唧花袋,唧落蛋上面就得喇!或者用匙不落去都得~

可以落少少檸檬汁牛油果醬度,防止氧化變色~不過我冇理~由佢啲色變暗左!味道一樣好食啦~

飯團食譜(6個份量)

珍珠半杯米
日本飯素少許
兒童紫菜6小塊

醋一小匙
啱啱好整完魚魚餅,啲飯就煲好喇!

加左呢款飯素,city super買的。

唔想加飯素,可以參考之前類似食譜:三文魚有機低鈉紫菜卷/飯團

紫菜用呢款,有機低鈉紫菜(紅蘿蔔味)

小朋友啱食!獨立包裝,方便當零食又得!

紫菜1小包有6塊。不少少飯落保鮮紙,包住用手壓實造型~再加上一塊紫菜,好簡單啊!

完成,個半鐘就搞掂啦!再拎多兩條香蕉,唔怕小朋友唔夠啦!

之前美食展的~超力保溫袋~

飯團同雞蛋我放咗落保溫袋,加咗個乾冰keep涷。三個小時後食冇問題!

其他媽媽都有整小食呀!開餐啦!雞翼、三文治、水果、烚粟米、烚蛋都好適合小朋友野餐架!可以參考一下。

 

初初媽媽
Hello~我係初初,懷孕時已辭去工作,轉做全職媽媽,仔仔出世後開始分享親子好去處、幼兒食譜、生活點滴及我的產後扮靚減肥心得。

下一頁:零食含有害反式脂肪可損心臟血管 81款安全零食一覽

更多精選內容