【小小暖男】中咗甲流進食篇 3款開胃湯水食譜

【小小暖男】中咗甲流進食篇 3款開胃湯水食譜

流感高峰期,小朋友中咗甲流冇晒胃口點算好?裕喬喬中左甲型流感第一日根本乜胃口都冇⋯⋯淨係肯食奶⋯⋯夜晚煲咗粟米肉碎粥都淨係食咗幾啖⋯⋯肉赤死阿媽⋯⋯所以煲粥之餘都煲埋湯,等佢唔食野都有啲營養落肚先~~

撰文&圖片:小小暖男日記 | 編輯:Chloe

嚇死阿媽系列:中左甲型流感

啱啱去完旅行番黎都未回魂,點知又俾裕喬喬嚇到魂魄都唔見埋。。。話說去完旅行番嚟都好地地,食得行得玩得,仲帶左佢去剪頭髮~點知星期六嘅凌晨就出事喇。。。

嗰晚正正常常9點幾10點就上床飲埋奶瞓覺,但佢飲到一半就瞓著咗。零晨3點幾就係咁郁,問佢係咪餓,佢話係就再沖奶俾佢食~食完好快又瞓番~~點知過左一陣,4點零就係咁郁,就睇下佢做乜事啦~~點知一摸個額頭⋯⋯出事喇,滾到好似暖手蛋咁⋯⋯一量體溫就升到上40度⋯⋯嚇到阿媽我即刻醒咗,搵退燒藥、幫佢換衫同抹身~~食左藥退咗啲, 佢瞓得番就由佢瞓,但我完全唔敢瞓,因為佢第一次燒到咁高溫咋~呢一刻勁驚佢會燒到傻咗。。。


終於捱到朝早,等到診所開門,即刻狂打電話去掛號,都要等14個呀。去到醫生伯伯度,講番個情況同埋近期有外遊,醫生都建議做快速測試(其實佢唔建議,我都會要求做埋個測試囉)好彩呢個家庭醫生有得做測試,檢測結果係證實裕喬喬係中左甲型流感⋯⋯好彩既係唔駛入院,不過都要食特敏福,醫生仲話會燒幾日先退,呢鑊真係肉赤死阿媽喇!

燒到紅卜卜⋯⋯奶又唔食、水又唔飲⋯⋯好彩裕喬喬退燒都算快,食左藥一日後,朝早已經冇咩燒,係夜晚有番燒,燒到38度~~我地照俾退燒藥佢食~~

病咗一日,個樣都叫有番精神~去到第二日,基本上精靈番哂~完全冇燒喇

BB半夜發燒 小建議:

1. 半夜發燒可大可小,尤其而家流感高峰期,真係配定平安藥看門口~不過d藥都係診所倒出黎,未食過既都只係放到3個月,開過既真係放1個月就要掉喇

2. 要搵定邊間診所有得做流感測試,唔係就要去醫院等架喇~~

媽媽必學 3款開胃湯水食譜

甜酸開胃 蕃茄薯仔湯

仔仔病咗冇乜胃口,梗係要喚醒個胃,煲番個甜甜酸酸既蕃茄薯仔湯最好喇~~材料簡單又易吸收到營養,咁先有力量去打敗病菌架~~

材料:

黑毛豬肉眼 1大舊(約$40)

紅蘿蔔 1條

粟米 1條

蕃茄 4個

薯仔 1個

佛手瓜 1個

洋蔥 1個

做法:

1. 將舊肉眼洗淨出水待用

2. 將所有蔬菜去皮切粒

3. 跟住將所有材料放哂入煲,加水煲約1.5-2小時就得喇~~

蕃茄炒蛋

材料:

蕃茄 4個

雞蛋 3隻

蒜頭 1粒

糖 半茶匙

水 少少

做法:

1. 蕃茄洗淨𠝹十字,浸熱水3分鐘,撈起去皮,切細粒待用

2. 雞蛋打發成蛋液;蒜頭切成蒜蓉

3. 開猛火燒紅隻鑊落油,等到個鑊出煙就收細火落蛋液,用鏟推下蛋液,見雞蛋熟就可鏟起

4. 隨即落蒜蓉爆香,跟住落埋蕃茄粒,加入少少水及糖煮成蓉,最後加番雞蛋煮多陣就上碟

P.S.:

1. 因為裕喬喬冇乜胃口,所以特登將蕃茄切碎切爛一點,等佢易d食到,正常既只要將蕃茄一開4就可以夾到蕃茄黎食

2. 加糖可以吊起蕃茄個味,真係唔想落既都可以,但會變得好淡

3. 想個蛋唔老,要燒紅隻鑊跟住快炒先得架!

魚翅瓜栗子湯

魚翅瓜原來屬於南瓜既一種,所以含有豐富既胡蘿蔔素~~另外仲有豐富維他命B雜同多種氨基酸~~氨基酸有助身體製造蛋白質和肌肉;胡蘿蔔素既對眼睛好;維他命B雜能促進身體新陳代謝。而且佢仲有能抑制脂肪合成的丙醇二酸,以及能控制糖尿病等保健效果廣泛、也有普通瓜類沒有的葫蘆巴鹼,具有增加新陳代謝、明顯抗癌防癌的功效~~(網上資料)

一個瓜就咁有益處,配埋佛手瓜就更加perfect ~~~

材料:

黑毛豬肉眼 1舊(約$40)

栗子 20-30粒

鮮百合 1個 (或用乾百合亦可)

魚翅瓜 1個

佛手瓜 1個

粟米 1條

無花果 2粒

做法:

1. 肉眼洗淨出水待用

2. 栗子滾水煲3-5分鐘,用毛巾一搓去皮同殼

3. 百合撕開一瓣瓣清洗乾淨;佛手瓜去皮切成一舊舊;粟米去皮再一開二;無花果沖洗一下便可

材料多到⋯⋯爆煲喇⋯⋯

4. 將所有村料掉哂入煲,煲2個鐘到就飲得喇~~

作者介紹:

小小暖男日記 在職媽媽將會變做全職媽媽, 希望囝囝可以快樂地成長~我家裕喬的PAGE, 媽媽盡量每日UPDATE喲~

 

更多精選內容