蔣麗莎

【今次冇擺烏龍!】陳浩民大女攞全校優秀學生獎 蔣麗莎:比看爸爸拿獎更加激動

育兒

廣告

藝人陳浩民一直被人封為「多仔公」,事關佢同太太蔣麗莎Lisa五年內育有3女1仔,去年蔣麗莎喺微博到留言話六歲半嘅大女陳雅薷(Elizabeth)要入讀小三,點知原來係搞錯學制,搞咗個大烏龍。不過,今次蔣麗莎冇搞錯喇!佢喺社交平台到分享咗Elizabeth獲頒全校優秀生獎嘅相,仲話比起老公得獎更加開心!

撰文:Kammy | 圖片來源:微博

蔣麗莎:比看爸爸拿獎更加激動

藝人陳浩民同太太蔣麗莎於2011年結婚,短短5年間已經育有4個仔女,而大女陳雅薷(Elizabeth)今年已經7歲!雖然上年Lisa搞咗個大烏龍,計錯數以為大女連跳兩級升小三,不過今次終於冇搞錯喇,佢喺社交平台到分享咗Elizabeth獲頒全校優秀生獎嘅相,仲大讚囡囡好叻女!

Lisa今次仲帶埋囝囝陳璟逸去見證Elizabeth攞獎一刻,佢仲喺社交平台話比起見到老公攞獎更開心:「全校優秀學生頒獎典禮,恭喜雅薷,以你為榮……加油小妞。媽媽永遠是你們的鐵粉。2019繼續保持,戒驕戒躁(看你拿獎,比看爸爸拿獎更加激動,莫名感動)。」言語間都睇得出佢為愛女感到驕傲!唔少網民都話佢教得好好,仲話Elizabeth美貌智慧並全!

搞錯學制 誤以為大女讀三年級

去年蔣麗莎上載咗張Elizabeth幼稚園畢業照,更留言話有一種好似即將送囡囡出國留學嘅不捨感覺!不過有心水清網民問點解唔係讀小一,蔣麗莎就回應網民囡囡係跳咗兩級,而且唔係7歲,而係6歲半!不過事後陳浩民就否認女兒跳班一事,話只係太太誤將英國學制當成香港學制。

大女獲網友大讚

成績表全部「表現優異」

不過,其實Elizabeth成績一向優異!之前喺微博上載大女嘅成績表,見佢科科都剔咗星星嗰欄,代表佢「表現優異」,蔣麗莎梗係最開心,仲話:「想不到陳家出了一個『學霸』為你感到驕傲~戒驕戒傲,繼續保持! ​​​​」

大女做小助手 陪媽媽出埠拍戲

大女雅薷年紀小小,但乖巧懂事又幫得手,之前蔣麗莎返內地長沙拍戲,就帶雅薷跟身充當小助手,大女幫媽咪手推行李拎嘢無扭計,蔣麗莎都忍唔住大讚佢!

蔣麗莎 教子有方

其實陳浩民經常留國內拍戲,湊仔女嘅重任當然交畀太太啦!睇返蔣麗莎嘅微博,都見佢平日親力親為湊仔女,甚少旨意工人姐姐,加上見佢經常一拖四帶小朋友周圍去都絕對冇難度,就知佢管教小朋友有一手!